1 Khaix an cao kaing naing khankix, pa mawh Yawhanan kawn simex Kare mai Yezanix kawn simex Hosha mai pui khankix jah ka pui iak tom hoek ka pui ting khawmuik hoek bleeh, 2 mai ah nin ka cao jhai Yeramix, “Yuh bwanson rieb ka lox khyox khaw yix ka maix mai rawg bwan son yix ka Siyiex, pa mawh Siyiex maix, son pui pa kawn deuk khawmuik, kheu mawh yix pa deuk ceeix ngie khaing daux pui pa hun, awm pa yaox maix, 3 sonsang jhi Siyiex krax pa sang caw yix tix lawng mai ceu pa sang khaw sang caw yix ti yuh khankix heue.” 4 Khaix an cao jhai Yeramix ah nin ka kix, “Aux hoik mhong heue. Aux tak sang rawg bwan ka Siyiex, pa mawh Siyiex pex tete awm pa krai pex, can pa deeh pawk Siyiex ka pex khankix, aux tak sang deeh krai pao an ka pex heue. Aux tak ang lai mox tix ceu kawx khaing pex heue.” 5 Khaix an kix ah nin ka Yeramix, “Kieh Siyiex mawh pa mawh meh mai mhai rug pa kaux sijax daux sinax yix, phan yix ang hawt ti yuh an kuceu awm pa hoik tawm Siyiex pa mawh Siyiex maix hoek ka yix khaing maix, 6 viang an mawh pa mhawm ang ah, pa caox ang ah, yix tak sang cu nghiet ka lox krai Siyiex pa mawh Siyiex ex, ka pui pa ploi yix hu ka maix, sonsang mawh an pa mhawm piang yix, yam cu nghiet yix ka lox krai Siyiex pa mawh Siyiex ex heue.” 7 Khaix hoik rheung kao ngaix, gumlox Siyiex hoek ka Yeramix heue. 8 Khaix an nawh kok ka Yawhanan kawn simex Kare mai cub cao kaing naing pa ot tau mai nawh khankix, jah ka pui iak tom hoek ka pui ting, 9 mai ah nin ka kix, “Siyiex pa mawh Siyiex ceu pui Isarelax pa hoik kieh pex aux hu khyox khaw tang pex ka plak sivoe Nawh Cao ah nin, 10 “Phan pex kawn ca ot ka daux haktiex in, Aux tak sang pang sang sum pex mai ang yieh pex laux mai Aux tak sang sum pex mai ang lai reeig ka pex heue. Mawh kheu Aux deeh doh keud ka grawng pa laux leeing, pa viex Aux hoek piang pex heue. 11 Paw doh koe krax lhat graung ka simiang Babulon, pa mawh pui pa lhat pex ka, Siyiex ah nin, paw doh lhat graung ka nawh, mawh kheu Aux ot tau mai pex, sonsang taoh ka pex mai sonsang deeh teei pex lih khaing daux tawm taix nawh heue. 12 Aux tak jhi krax caux rhawm tix ka pex mai nawh tak sang caux rhawm piang pex mai tak kieh pex deeh ing ka haktiex cao tix heue. 13 Viang mawh nan, phan pex ah nin, yix ang lai ot ka daux haktiex in mai ang cu nghiet ka gumlox Siyiex, pa mawh Siyiex pex 14 ah nin, ang mawh, yix sang hu ka meung Ejiptux ka dee ang yix lai pub ka naing mai dee ang yix lai mhong ka lox teettawng mai ka dee ang yix cai rhawm ka blah mai yix tak sang hu pang tix ot tan heue. 15 “Pui Yudax pa kawn deuk khankix eue, nghiet ka gumlox Siyiex yam in liak! Siyiex Cao kru naing raoma, pa mawh Siyiex ceu pui Isarelax ah nin, phan pex veeh ngai tix sonsang laig ka daux meung Ejiptux mai rug ot tan tete, 16 Khaix an vaig lawm pa lhat graung pex ka, tak sang krup pex ka daux meung Ejiptux mai sibhawm praix ceu pa hoik lhat graung pex ka, tak sang hawt khaix pex ka daux meung Ejiptux mai pex tak yaox tix yum tan heue. 17 Mawh kheu nan, pui ku kaux pa veeh ngai tix hu ka meung Ejiptux mai sonsang ot tan, kix tak yum ka vaig mai ka sibhawm praix mai ka jhawm saux preng heue. Pui tix kaux kawx tak ang lai deuk mai ang lai glawd khaing pa laux leeing, pa sang viex Aux hoek piang kix heue. 18 Grawh grawng nawh, Siyiex Cao kru naing raoma pa mawh Siyiex ceu pui Isarelax ah nin, Awm hoik klup Aux krax song rhawm mai krax meet rhawm tix lih piang pui ot ka veng Yerusaliem khankix, awm an, Aux tak sang klup krax meet rhawm tix lih piang kix yam laig ot kix daux meung Ejiptux heue. Pex tak sang yaox ti kham pa jhax lawg, pa daox deng, pa nunai mai lox sibriem mai pex tak ang lai pon ti yaox ka dee in khaix in tix bawg kawx heue. 19 Pui Yudax pa kawn deuk khankix eue, Siyiex hoik krai grawng pa dex dawd mai pex, paw hu ka meung Ejiptux kieh pex kriem tawng ka tawx Aux satix ka pex daux in singaix heue. 20 Grawh grawng nawh, pex hoik mawh pui pie lhen ka daux rhawm yam ploi pex aux hu ka Siyiex, pa mawh Siyiex pex ka daux pa ah nin, rawg bwan son yix ka Siyiex, pa mawh Siyiex ex mai awm pa krai Siyiex, pa mawh Siyiex maix khawmuik, awm an deeh krai pao grawng an ka yix mai yix tak sang hawt ti yuh an heue. 21 Aux hoik krai pao grawng an ka pex daux in singaix, viang mawh nan, pex ang lai cu nghiet ka lox Siyiex pa mawh Siyiex pex mai ka can pa hoik tawm Nawh Cao hoek ka pex khaing aux heue. 22 Mawh kheu nan, yam in kieh pex kriem tawng ka sang yaox pex ti yum ka vaig ka sibhawm praix mai ka jhawm saux preng khankix ka dee koe rhawm pex ti sang hu bang tix ot heue.”