1 Yam an ka daux khix aliah, Ishamelax kawn simex Netanix kawn simex Elishama, khaing daux paox nyiex ma simiang mai khaing daux cao kaing greem simiang khankix, hoik hoek ka Gedalix kawn simex Ahikam daux veng Mizapa, tau mai pui kao kaux heue. Kix ih priex preem tau ka daux veng Mizapa heue.Ref 41:1-3 2Sim 25:25 2 Khaix an Ishamelax kawn simex Netanix mai pui kao kaux pa ot tau mai nawh khankix yaog ti kaoh mai mug Gedalix kawn simex Ahikam, pa mawh kawn simex Shaphan ka vaig mai pah ka nawh pa mawh pui hoik yaog simiang Babulon mawh cao kwang ka haktiex heue. 3 Ishamelax baox pah pui Yudax pa ot tau mai Gedalix ka daux veng Mizapa khawmuik mai pui naing Khaladie pa yaox nawh baoh tan khawmuik heue. 4 Khaix hoik pah ka Gedalix yum, ka daux ra singaix kawx ang koe pui tawng ka grawng an tix kaux kawx. 5 Pui khankix hoik hoek khaing veng Shekhim, khaing veng Shilaw mai khaing veng Samarix, tixdaix kaux tau mai pa hoik khlao hauk bheup tix khawm kraung caox tix khankix mai pa pat tokaux tix, tau mai krax tan nyawng bhawng daux taix tix sonsang viex an khankix hoek ka daux nyiex bwan Siyiex heue. 6 Ishamelax kawn simex Netanix lih hu khaing Mizapa sonsang rieb kix, tau mai pa yiiem tix mai sipub ka kix mai ah nin ka kix, “Hoek ka Gedalix kawn simex Ahikam heue.” 7 Mawh kheu nan, yam hoik laig kix ka daux veng, Ishamelax kawn simex Netanix, pah kix mai taing kix ka daux tiex, nawh khawm pui pa ot tau mai nawh khankix heue. 8 Viang mawh nan, ka daux sinax kix, koe pui kao kaux pa ah nin ka Ishamelax, “Paw pah yix liak, grawh grawng nawh, yix koe sinngao pa mawh nghox ca, rawm bee mai rawm hia khankix ka daux kaung heue.” Mawh kheu nan, nawh deeh yoi tix mai ang lai pah kix tau mai puxaik kix heue. 9 Daux tiex dee hoik tik Ishamelax tokaux yum, pa hoik pah nawh Gedalix mai pui nawh khankix, mawh daux tiex pa hoik kaong simiang Asa ti deuh kheu jao lhat tix ka Basha simiang Isarelax heue. Ishamelax kawn simex Netanix, hoik sau pui pa pah nawh khankix naog ka daux an heue. 10 Khaix an Ishamelax hoik viex pui pa kawn deuk khankix pa ot ka daux veng Mizapa, hu mawh pui pa giex laung khawm kawn bun simiang mai pui pa kawn ot ka daux veng Mizapa khankix, ka pui pa hoik ap Nebuzaradan cao kaing naing piang pui naing pa pon simiang khankix ka Gedalix kawn simex Ahikam heue. Ishamelax kawn simex Netanix, hoik viex kix hu mawh pui pa giex laung mai viex kix hoek bleeh ka ceu pui Amon khankix heue. 11 Viang mawh nan, yam hoik mhong Yawhanan kawn simex Kare mai cao kaing naing pa ot tau mai nawh khankix ka grawng krax caox caig yuh Ishamelax kawn simex Netanix khawmuik. 12 Kix kok pui khawmuik mai hu sonsang puing ka Ishamelax, kawn simex Netanix mai kix yaox nawh hawt rawm dung ting pa koe ka daux veng Gebion heue. 13 Mawh kheu nan, yam yaox pui hun pa ot tau mai Ishamelax khankix ka Yawhanan kawn simex Kare mai cao kaing naing pa ot tau mai nawh khankix, kix kied gaux rhawm ka heue. 14 Khaix an pui pa hoik viex Ishamelax hu mawh pui pa giex laung khaing veng Mizapa khawmuik deeh veeh ti ing mai hu ka Yawhanan kawn simex Kare heue. 15 Viang mawh nan, Ishamelax kawn simex Netanix pon glawd khaing Yawhanan tau mai pui nawh khankix daix kaux mai kix hoik hu ka ceu pui Amon heue. 16 Khaix an Yawhanan kawn simex Kare mai cao kaing naing pa ot tau mai pui nawh khankix hoik viex can pui pa kawn deuk khawmuik khaing veng Mizapa, ka pui pa hoik taoh nawh khaing Ishamelax kawn simex Netanix khaix hoik pah nawh ka Gedalix kawn simex Ahikam mai pui naing pa kied ting riang rao khankix, kawn simex Ahikam mai pui naing pa kied ting riang rao khankix mai kawn nyawm mai pui sieh khankix, ka pa hoik viex nawh khaing veng Gebion heue. 17 Kix lih hu mai ot ka yaong Khimaham pa koe dex veng Bieliehiem, kix koe rhawm ti sang hu ka meung Ejiptux, 18 grawh grawng nawh, kheu jao lhat kix ka pui Khaladie khankix, jao hoik pah Ishamelax kawn simex Netanix ka Gedalix kawn simex Ahikam, pa hoik yaog simiang Babulon nawh mawh cao kwang ka daux haktiex an heue.