1 Gumlox Siyiex hoek ka Yeramix ah nin, 2 “Siyiex pa mawh Siyiex ceu pui Isarelax ah nin, tiem tix priex gumlox pa hoik krai Aux ka maix khawmuik ka daux phuk lai maix heue. 3 Siyiex ah nin, jhak heue, singaix bawg yam hoik hoek mai Aux tak deeh viex pui Aux Isarelax mai pui Yudax khankix hoek khaing krax pa giex laung, Siyiex ah nan heue. Aux tak sang kieh kix deeh ing ka haktiex pa hoik tawx Aux ka keeing kix mai kix tak sang pon tix cie an heue.” 4 In khankix mawh gumlox pa hoik krai Siyiex son grawng pa dex dawd mai ceu pui Isarelax mai ceu pui Yudax khankix heue. 5 Siyiex ah nin, “Ex hoik mhong lox ceu pa singax mai krax lhat graung pa ang mawh krax pa nhim heue. 6 Mhaing ti yaox mai jhak ti yaox, mawh sax keh simex ka kawn ngie lie? Mawh kheu nan, Aux yaox joh simex ku kaux taix tix piang nyoi tix, awm saux bun pa keh kawn tix mai lheung pakngai khawmuik, kheu jao grawng pa yuh ka mawx lie? 7 Alo! singaix an phex mawh singaix pa ting lhaong ang lai koe singaix pa awm an mai mawh bawg yam laux rhawm ceu pui Yakop, viang mawh nan, nawh tak sang mawh pa taoh tix lih khaing an heue. 8 Siyiex Cao kru naing raoma ah nin, ka daux singaix an, Aux tak sang raig ti tik iak khaing ngawg kix mai tak sang pat ti tik maox pa vien pex khankix heue. Pui tang meung khankix tak ang lai baox kieh kix mawh siliex tix bawg kawx heue. 9 Viang mawh nan, kix tak sang yuh kaing jhaw Siyiex, pa mawh Siyiex kix mai Davit, pa mawh simiang kix, ka pui pa tak sang yaog Aux ka son kix heue. 10 Mawh kheu nan, Siyiex ah nin, kawncau Aux Yakop eue, paw lhat graung ceu pui Isarelax khankix eue,Ref 30:10-11 Ye 46:27-28paw laux rhawm kheu, Aux tak sang taoh maix khaing dee pa kied singai mai ru maix pa kaoh khaing haktiex pa giex laung pex heue. Ceu pui Yakop tak deeh hoek mai koe krax laux lee tix mai krax yiien yawg tix mai pui tix kaux kawx tak ang pon yuh nawh koe krax lhat graung heue. 11 Siyiex ah nin, mawh kheu Aux ot tau mai maix, sonsang taoh ka maix, viang Aux kieh haktiex pa hoik kieh Aux maix prung prang rairuat tix ot mawh pa sidah kawx, Aux tak ang kieh maix hoek dee sidah heue, viang mawh nan, phan Aux ang tawx krax kham geu ka maix, maix tak ang hoek krax rahsee heue. 12 Siyiex ah nin, jhawm saux maix mawh pa nu moi, mawh kheu dee mat maix mawh pa kied kin heue. 13 Ang koe pui sang teem maix mai ang lai koe pui pai sonsang moi jhawm saux maix heue. 14 Pui pa moh maix khankix, hoik piawm ka maix, kix ang lai sawg lai chawk maix heue. Mawh kheu Aux hoik kieh maix mat, ka krax mat pa tawx pui koeng, tau mai krax kham geu pa kied lang teung kin kheu jao pa kied haoh hun krax lud maix mai phimap maix khankix heue. 15 Maix lai yiiem yo kheu jhawm saux ti yuh ka mawx lie? Mawh kheu kied haoh hun krax pa lud maix, jhawm saux ceu pa laux rhawm maix ang chix moi heue. Mawh kheu hoik nie haoh hun phimap maix, Aux tom yuh ceu in khankix ka maix heue. 16 Mawh kheu nan, can pui pa sang kiied tix ih ka maix, tak sang deeh kiied tix ih ka nawh mai can pui koeng maix khankix tak sang hoek ka daux pa giex laung, can pui pa yuh con ka maix tak sang deeh hoek ka daux krax pa deeh con mai can pui pa tud rhim ka maix Aux tak sang deeh kieh nawh hoek ka daux pa tud rhim heue. 17 Siyiex ah nin, viang pui hoik tik hoik vud ah nin, in mawh veng Zion pa ang pui tix kaux lai priex lai jhung ka, viang mawh nan, Aux tak deeh kieh maix nyawm ot siu koe mai deeh pai ka jhawm saux maix khankix moi heue. 18 “Siyiex ah nin, jhak heue, Aux tak deeh viex nyiex gox ceu pui Yakop khankix hoek mai koe krax caux rhawm piang dee ot dee koe nawh khankix, mai tak deeh sum veng piang ton cao tix mai nyiex haw tak deeh awm grang pakpeung pa dawg koe tix heue. 19 Khaix an kix tak ting bwanson yaogyaw Siyiex ka lai rhax mai lox pui pa yuh pa nyawm rhawm, Aux tak sang kieh kix pre haoh hun mai kix tak ang lai dieh hu heue. Aux tak sang yaog min plakngai kix mai kix tak ang lai mawh pa iak heue. 20 Kawn praix kix khankix tak sang awm phao ka mai pui hun khankix tak mawh pa kaux cong ka plak sivoe Aux mai Aux tak sang tawx krax ciyang ka pui khankix pa yeen ya ka kix heue. 21 Ru kix khankix tak sang mawh simiang kix mai cao pa kwang ka kix tak sang mawh pa kaoh khaing daux sinax kix. Khaix an Aux tak kieh kix greed tix dex mai kix tak greed tix hoek dex Aux heue. Siyiex ah nin, mawh pui mawx pa kan rhawm tix sang greed tix dex Aux lie? 22 Pex tak sang mawh pui Aux mai Aux tak sang mawh Siyiex pex heue.” 23 Jhak heue, bhaung keukanglux pa song rhawm Siyiex tak phlu tix hu sijheeng mai keukanglux an tak sang taih piang kaing pui pa caox caig khankix sigrien sigre heue. 24 Krax pa kied kin song rhawm Siyiex, tak ang nyang greed nyang yeet tom hoek bawg yam ang Nawh Cao nyang bax hoik yuh krax pa keud Nawh Cao ka daux rhawm daux rhi tix tom grum naog heue. Khaix singaix an pex tak sang tawng ka heue.