1 In mawh gumlox lai tiiem pa sipaox cao jhai Yeramix khankix khaing veng Yerusaliem ka kuad song pa kawn deuk pa hoik teei hu mawh pui pa giex laung ka cao giex kaing li, cao jhai mai pui hun khankix pa hoik rhim Nebukhaneza kix hu mawh pui pa giex laung khankix khaing veng Yerusaliem, hoek ka veng Babulon heue.Ref 29:1-2 2Sim 24:12-16; 2Been 36:10 2 In mawh khaix hoik lih hu simiang mai miex laux simiang mai pui sieh khankix, cao kaing haktiex Yudax mai veng Yerusaliem khankix, cao pa chix kaing taix mai cao pa chix kaing rhiem khankix khaing veng Yerusaliem heue. 3 Lai an hoik sipaox tix ka daux tawm taix Elasa kawn simex Shapham mai Gemarix kawn simex Hilakix, pa hoik ploi Zedekix simiang haktiex Yudax kiex hu ka veng Babulon ka Nebukhaneza simiang veng Babulon ah nin, 4 Siyiex Cao kru naing raoma, pa mawh Siyiex ceu pui Isarelax ah nin, ka kix pa hoik teei hu mawh pa giex laung khawmuik, pa hoik kieh Aux kix lih hu khaing veng Yerusaliem hoek ka veng Babulon, 5 sum nyiex khankix mai ot ka daux an, sum sipeem khankix mai ih plix an heue. 6 Teei tix koe moeng sonsang koe kawn simex kawn bun, mai teei kawn simex pex khankix koe moeng mai tawx kawn bun pex khankix koe mex, sonsang keh kix kawn praix baox pre haoh hun tan mai ang koe krax pa dieh pa dieh ka heue. 7 Sawg krax pa nhim son veng, ka dee hoik kieh Aux pex mawh pa hoik rhim tix hu mawh pui pa giex laung mai rawg bwan ka Siyiex son veng an heue. Grawh grawng nawh, phan veng an koe pa nhim, pex kawx tak koe pa nhim heue. 8 Grawh grawng nawh, Siyiex Cao kru naing raoma, pa mawh Siyiex ceu pui Isarelax ah nin, paw doh kieh cao jhai pex mai cao sibawk pa ot ka daux sigreung pex khankix pon pie lhen ka pex mai paw doh nghiet paw yum rhawm ka grawng camaox pex pa kieh pex camaox khankix. 9 Grawh grawng nawh, kix hoik gruh krai lox jhai pa lud loe ka pex, ka daux ceu kaux Aux, Aux ang tie ploi kix hu; Siyiex ah nan heue. 10 Grawh grawng nawh, Siyiex ah nin, khaix hoik naog atixgliah num ka daux veng Babulon, Aux tak sang hoek kia ngien mai yuh lox sijax mukheu pa mhawm Aux naog ka pex mai kieh pex deeh hoek ka dee in heue.Ref 29:10 2Been 36:21; Ye 25:11; Dan 9:2 11 Siyiex ah nin mawh kheu Aux hoik tawng ka krax keud pa sang keud tix khankix ka son pex, pa mawh krax keud pa nhim mai ang mawh krax pa caox caig, sonsang tawx krax pa keud pot jun pot pa sang hoek ka son pex heue. 12 Khaix an pex tak kok ka Aux mai hu rawg bwan ka Aux mai Aux tak nghiet ka lox pex heue. 13 Pex tak sawg Aux, yam sawg pex Aux khawm rhawm tix mai tak yaox ka Aux heue.Ref 29:13 Pi 4:29 14 Siyiex ah nin, Aux tak sang kieh pex yaox tix mai Aux tak sang deeh viex pex ing khaing krax pa giex laung heue. Aux tak sang deeh khrawm pex khaing haktiex an khankix mai khaing dee an ka dee hoik grheu Aux pex, Siyiex ah nin, Aux tak sang viex pex hoek khaing dee pa kieh Aux pex hu mawh pa giex laung heue. 15 Pex hoik ah nin, Siyiex hoik yaog ti deuh cao jhai khankix ka son ex, ka daux veng Babulon tan heue. 16 Mawh kheu nan Siyiex ah nin, son grawng pa dex dawd mai simiang pa ngawm piang dang ngeung simiang Davit mai son grawng pa dex dawd mai pui khankix, pa ot ka daux veng in khawmuik mai son grawng pa dex dawd mai puxaik pex khankix pa ang nyang bax lih hu tau mai pex ka daux krax pa giex laung heue. 17 Siyiex ah nin, jhak heue, Aux tak ploi vaig lawm, sibhawm praix mai jhawm saux preng khankix hoek piang kix mai Aux tak sang kieh kix awm plix ruh pa kied sium tom ang lai chix tix ih ka heue. 18 Aux tak hawt pheet kix ka vaig lawm, ka sibhawm praix mai ka jhawm saux preng khankix mai Aux tak sang ap kix hoek ka daux krax pa kha rhawm daux sinax meung haktiex an khankix khawmuik pa koe piang ca haktiex sonsang mawh pa jhax lawg mai pa daox deng pui ka mai pa sibriem pui ka mai pa ang koe min plakngai, sinax ceu pui khankix, ka dee hoik grheu Aux ti tik kix heue. 19 Siyiex ah nin, mawh kheu kix ang nghiet ka gumlox Aux khankix, yam yaog Aux tix kaoh caocao mai ploi kawncau mau soi cao jhai Aux khankix hu krai ka kix kawx, pex ang nghiet ka, Siyiex ah nin heue. 20 Mawh kheu nan, pex khawmuik pa mawh pui pa ot ka daux krax pa giex laung khankix, pa hoik ploi Aux khaing veng Yerusaliem hoek ka veng Babulon eue, nghiet ka gumlox Siyiex heue. 21 Siyiex Cao kru naing raoma pa mawh Siyiex ceu pui Isarelax ah nin, son grawng pa dex dawd mai Ahap kawn simex Kolayax mai Zedekix kawn simex Maseyax, pa gruh krai lox jhai pie lhen ka pex ka daux ceu kaux Aux, jhak heue, Aux tak sang ap kix ka daux taix Nebukhaneza simiang veng Babulon mai nawh tak sang pah kix yum ka plak sivoe ngai pex heue. 22 Mawh kheu jao grawng kix, can pui Yudax, pa giex laung khawmuik, pa ot ka daux veng Babulon mai jhax lawg ah nin, kieh Siyiex yuh maix awm Zedekix mai Ahap pa hoik gleeing simiang veng Babulon ka daux ngu heue. 23 Grawh grawng nawh, kix hoik yuh ceu pa laux min plakngai ka daux ceu pui Isarelax khankix mai hoik lud vao tau mai moeng paox plawg tix khankix mai hoik krai lox pie lox lhen ka daux ceu kaux Aux, ka pa ang Aux sax tawm ka kix heue. Aux tawng tete mai mawh cao pa kham sakse, Siyiex ah nin heue. 24 Tak krai ka Shemayax pa mawh pui yaong Nehalam ah nin, 25 Siyiex Cao kru naing raoma, pa mawh Siyiex ceu pui Isarelax ah nin, Maix hoik sipaox lai hu ka daux ceu kaux tix, ka pui khankix pa ot ka daux veng Yerusaliem, ka Zephanix kawn simex cao giex kaing li mai Maseyax mai ka cao giex kaing li khawmuik ah nin, 26 Siyiex hoik yaox maix mawh cao giex kaing li tang cao giex kaing li Yehoyadax sonsang mawh cao kaing ka daux nyiex bwan Siyiex mai piang pui ku kaux, pa hoik yhot pa keud tokaux cao tix mawh cao jhai sonsang sau maix nawh ka daux thawng mai sau gang ka kix heue. 27 Yam in maix lai ang sidiex gau ka Yeramix pa mawh pui yaong Anatok pa ah tokaux tix mawh cao jhai ka maix, kheu jao pa yuh ka mawx lie? 28 Mawh kheu nawh hoik sipaox lai hoek ka yix ka daux veng Babulon ah nin, krax pa giex laung in mawh pa kied rheung, sum nyiex mai ot ka daux, sum sipeem mai ih ka plix khankix heue.” 29 Yam in cao giex kaing li hoik phat cao jhai Yeramix mhong ka lai in heue. 30 Khaix an gumlox Siyiex hoek ka Yeramix ah nin, 31 “Sipaox lai hu ka pui pa ot ka daux pa giex laung khawmuik ah nin, Siyiex ah yuh nin, son grawng pa dex dawd mai Shemayax pui yaong Nehelam, mawh kheu Shemayax hoik gruh krai lox jhai ka pex pa ang Aux tie ploi nawh hu mai nawh hoik kieh pex een rhawm tix ka daux pie lhen,” 32 mawh kheu nan, Siyiex ah nin, “Jhak heue, Aux tak sang tawx krax ciyang ka Shemayax pui yaong veng Nehelam khawm pui daux nyiex ma nawh khankix, nawh tak ang koe pui pa sang ot ka daux sinax ceu pui in pie tix kaux kawx, Siyiex ah nin, nawh tak ang yaox ka ceu pa mhawm, ka pa tak sang yuh Aux tix tawx son pui Aux khankix, kheu jao gau sawn nawh grawng pa tieh deeh feen ka Siyiex heue.”