1 Gumlox Siyiex hoek ka aux ah nin, 2 “Maix tak ang pon ti teei moeng mai ang pon tix koe kawn simex kawn bun khankix ka dee in heue. 3 Grawh grawng nawh, Siyiex ah nin son grawng kawn simex kawn bun pa keh ka dee in khankix mai son grawng miex kix pa keh kix mai keeing kix pa pon tix cie kix ka daux haktiex in heue. 4 Kix tak sang yum caox mai ang koe pui yiiem doe mai ang lai koe pa sang sipaung kix, mawh kheu nan, kix tak awm aing piang ca haktiex heue. Kix tak laux leeing ka lawm vaig mai ka sibhawm praix mai tokaux yum kix tak mawh priex ih sim mai totiag khankix piang haktiex heue.” 5 Siyiex ah nin, “Paw laig ka daux nyiex yum mai paw yiiem grai mai paw laux rhawm son kix, mawh kheu Aux hoik teei ti tik krax pa nhim Aux, khawm krax moh pa caux rhawm aux mai krax pa caux rhawm Aux khankix khaing ceu pui in, Siyiex ah nin heue. 6 Pui ting pui iak khankix tak sang yum tau ka daux haktiex in mai tak ang lai yaox ti sipaung kix mai ang lai koe pui yiiem grai son kix mai ang pon ti pat tokaux cao tix mai ang pon khlao hauk kaing tix pak son kix heue. 7 Ang koe pui sivit blah ka pui pa yiiem grai son pui yum mai ang koe pui khu rhawm kix son pa yum mai ang koe pui tawx kawk nyaux ka pui pa khu rhawm yam yum miex keeing kix heue. 8 Awm an maix paw laig ka daux nyiex yuh pawie dee khan kheu sonsang ngawm mai ih nyaux tau mai kix heue.” 9 Siyiex Cao kru naing raoma pa mawh Siyiex ceu pui Isarelax ah nin, “Jhak heue, Aux tak sang kieh inkix grai khaing dee in ka plak sivoe ngai maix mai ka daux baux singaix ju maix, pa mawh lox nyawm rhawm mai lox pa gaux rhawm, pa mawh lox sinaw lox bunkrih pa sang yuh ka paox tix heue.Ref 16:9 Ye 7:34, 25:10; Jhi 18:23 10 “Yam krai maix lox ceu in ka pui in khankix, kix tak ah nin ka maix, Siyiex lai krai grawng pa sang koe krax pa ting laux leeing in piang yix, kheu jao patix lie? Phan ang mawh nan, mawh lud yix ka ceu patix lie? Phan ang mawh nan, mawh yuh yix phimap pa lud piang Siyiex pa mawh Siyiex yix ka ceu patix lie? 11 Khaix an maix tak deeh ah nin ka kix, Siyiex ah nin, mawh kheu jao hoik tik vud keeing pex khankix ka Aux mai kix hoik hu hawt khaix siyiex tang kaux tang hak khankix mai hoik yuh kaing jhaw son kix mai hoik krub ka kix mai hoik tik vud ka Aux mai ang lai priex rien ka gumlox tat jhawm prawng Aux heue. 12 Pex hoik nie lheu yuh pa caox khaing keeing tix, jhak heue, mawh kheu ku kaux hoik hawt hu awm krax keud rhawm cao tix, tom ang pui tix kaux kawx lai nghiet ka Aux heue. 13 Mawh kheu nan, aux tak grheu pex lih hu khaing haktiex in mai laig ka daux haktiex pa ang pex tawng mai khawm pa ang keeing pex khankix tawng mai pex tak sang yaox ti yuh kaing jhaw siyiex tang kaux tang hak an khankix ku singaix tan, ka dee ang Aux lai jhi krax pa caux rhawm tix ka pex heue.

14 Mawh kheu nan, Siyiex ah nin, “Jhak heue, singaix bawg yam pa ang kawn pui lai tiextu ti ah nin tak sang hoek, Siyiex hoik teei kawn praix Isarelax khankix lih khaing daux meung Ejiptux mawh pa im ju heue. 15 Mawh kheu nan, daux singaix bawg yam pa tiextu kawn pui ti ah nin tak hoek, Siyiex pa teei kawn praix ceu pui Isarelax khankix lih khaing haktiex plak laong mai khaing haktiex an khawmuik, khaing haktiex pa hoik grheu Nawh Cao kix to, mawh pa im ju heue. Grawh grawng nawh, Aux tak deeh viex kix hoek ka daux haktiex pa hoik tawx Aux ka keeing kix heue. 16 Siyiex ah nin, jhak heue, aux tak sang ploi pui pa teei kax tom nie mai kix tak sang miiet ka kix, khaix an, Aux tak sang ploi pui leue tiag tom nie mai kix tak sang jaw ka kix, khaing gawng ku gawng mai khaing ton ku ton mai khaing daux rang khankix heue. 17 Mawh kheu ngai Aux jhak piang krax hu kix khawmuik mai kix ang chix mox tix plak sivoe ngai Aux mai krax lud kix ang lai chix mox khaing ngai Aux heue. 18 Tak deeh viied son krax lud mai phimap kix ra son, kheu hoik seeing yuh kix haktiex Aux, kix hoik kieh haktiex sinngao Aux hoik naog ka tokaux yum pa seeing brai mai ka riang rao krub pa seeing brai khankix heue. 19 Siyiex pa mawh riang rao aux mai nyiex tab aux mai dee peung aux, singaix yam yaox aux krax kha rhawm, pui tang ceu khankix tak hoek, khaing dee sidah haktiex ka Maix Cao ah nin, “Keeing ex khankix hoik pon sinngao pie kheem, pa giex going mai pa ang koe bwanson tete heue.” 20 Pui mawx pa sang pon yuh siyiex, son tokaux tix pa ang tie mawh siyiex lie? 21 Mawh kheu nan, jhak heue, yam in aux tak kieh kix tawng tix bawg, ka grawng plawng taix Aux mai pa ting sibrawm Aux mai kix tak sang tawng mawh min ceu kaux Aux Siyiex heue.”