1 Khaix an Siyiex ah nin ka aux, “Viang Mose mai Samoelax hoik cung tix ot ka plak sivoe Aux kawx, rhawm Aux ang lai simi lai jhak ka pui in khankix heue. Grheu kix lih khaing plak sivoe ngai Aux mai kieh kix hu heue.”Ref 15:1 Lih 32:11-14; Si 14:13-19; 1Sam 7:5-9 2 Ref 15:2 Jhi 13:10Phan kix chawk ah nin ka maix, yix sang hu plak mawx lie? Khaix an maix tak krai ka kix ah nin, Siyiex ah nin, “Pa hoik tat ti deuh mawh pa yum, kieh hoek krax yum mai pa hoik tat ti deuh mawh pa pah ka vaig, kieh yum ka vaig, pa hoik tat ti deuh mawh son sibhawm praix, kieh koe krax sibhawm praix mai pa hoik tat ti deuh mawh son pa giex laung, kieh hoek ka daux pa giex laung heue.” 3 Simiang ah nin, “Aux tak sang deuh ceu pa laux leeing pon ceu piang kix, pa mawh vaig lawm pa sang pah, sox khankix pa sang sileed hu, sim piang raoma mai totiag piang haktiex khankix pa sang kiied mai pa yuh laux leeing heue. 4 Aux tak sang baox kieh kix yaox krax kha rhawm ku meung piang haktiex khawmuik, kheu jao grawng pa yuh Manashe, kawn simex Hezakiyax simiang meung Yudax ka daux veng Yerusaliem heue.Ref 15:4 2Sim 21:1-16; 2Been 33:1-9 5 “Veng Yerusaliem eue, mawh pui mawx pa sang caux rhawm ka maix lie? Phan ang mawh nan, mawh pui mawx pa sang laux rhawm tau mai maix lie? Phan ang mawh nan, mawh pui mawx pa sang veh tix chawk grawng nyawm ot maix lie?” 6 Siyiex ah nin, “Maix hoik tik vud ka Aux mai hoik deeh plak khaix. Mawh kheu nan, Aux tak nyeu taix tix piang maix mai yuh maix laux leeing, Aux koe krax khi rhawm mai ang lai pon gun heue. 7 Aux tak sang keem ti tik kix ka bia, ka siviex laig daux haktiex an, Aux tak kieh kawn simex kawn bun kix som nai, Aux tak sang yuh ceu pui Aux khankix laux leeing, kheu ang kix nyang veeh tix ing khaing daux krax hu tix heue. 8 Miex mai tak nie baox haoh hun khaing mhaik pa koe daux rawm sigrit sigra ka plak sivoe Aux, aux tak sang viex pui pa yieh laux hoek piang kix mai piang miex pui awn ju an khankix, ka daux bawg yam jung singaix, Aux tak kieh krax kha rhawm mai krax lhat graung hoek dom mawx dom an piang kix heue. 9 “Bun pa hoik keh kawn aliah kaux, tak dieh riang mai dud rhawm. Singaix nawh hoik klip, yam kawn mawh plak pon singaix, nawh koe krax kaig tua mai kied laux rhawm. Ka pui pa kawn deuk khaing daux kix kawx, Aux tak sang ap tix tawx kix ka vaig lawm plak sivoe pui koeng kix,” Siyiex ah nan heue.

10 Miex aux eue, Aux koe krax kha rhawm, kheu hoik keh maix aux, mawh pui pa koe krax simah simiang mai pui pa thung thiang piang haktiex khawmuik heue. Aux ang sax tawx taik rom sonsang pon tix rao mai pui khankix kawx ang sax tawx taik rom sonsang pon rao ka aux. Pui ku kaux koe krax jhax lawg ka aux heue. 11 Siyiex ah nin, “Aux tak sang tawx ceu pa mhawm ka maix mai pui maix pa kawn deuk khankix tete, Aux tak sang kieh pui koeng deeh hoek tix khyox khaw tix ka maix tete, yam koe krax nu krax kin mai ka daux bawg yam koe krax kha rhawm heue. 12 Mawh pon raig pui tix kaux kaux ka rhiem, pa mawh rhiem pa kaoh khaing plak laong mai tawng khankix lie? 13 Sinngao kraung khrai maix khankix Aux tak sang tawx ka pui tud rhim ka daux pa ang koe ngawh koe jum, phimap pa yuh maix khawmuik, ka daux haktiex dee kwang maix khankix heue. 14 Aux tak sang kieh maix hu tau mai pui koeng maix khankix, ka daux haktiex pa ang maix tawng heue. Mawh kheu ngu pa meet rhawm Aux tak gleeing ka pex heue. 15 Siyiex eue, Maix Cao tawng ka heue. Doh keud ka aux mai hoek kia ngien ka aux mai deeh pawk bix ka son aux piang pui pa yuh krax kha rhawm ka aux liak, paw teei aux luan dee singai ka daux krax lang gun yeung Maix Cao, tawng ka hoik yaox aux tix kham geu lox sibriem simiang son Maix Cao heue. 16 Siyiex pa mawh Siyiex Cao kru naing raoma eue, aux hoik yaox ka gumlox Maix Cao mai aux hoik teei ti ih mai gumlox Maix Cao hoik mawh pa nyawm rhawm mai pa gaux rhawm ka daux rhawm aux, mawh kheu aux mawh pa hoik kok tix ka min ceu kaux Maix Cao heue. 17 Aux ang lai ngawm ka deeh khrawm pui pa ang nab yam mai aux ang lai yuh pa gaux rhawm. Aux hoik ngawm nong nong kheu sibrawm plawng taix Maix Cao, mawh kheu Maix Cao hoik kieh aux naog ka pa song rhawm heue. 18 Kheu krax saux ngia aux lai koe sijheeng mai krax mat krax lheet aux lai ang chix pai grai kheu grawng pa yuh ka mawx lie? Mawh tak sang kieh Maix Cao ceu an hoek piang aux, awm rawm klawng pa hit ang koe dee een rhawm tix ka mai awm rawm pa nai pa nawk lie?

19 Mawh kheu nan, Siyiex ah nin, “Phan maix deeh ing, khaix an, Aux tak sang deeh viex maix hoek maix tak yaox tix cung ka plak sivoe aux, phan maix gwieh ceu pa mhawm lih khaing ceu pa caox maix tak sang mawh pa awm jheeh Aux heue. Kieh kix deeh ing hoek ka maix, viang mawh nan maix tak ang lai ing hoek ka kix heue. 20 Aux tak kieh maix mawh guh veng tawng pa kaux cong ka son ceu pui in mai kix tak sang puing ka maix mai ang pex maix, grawh grawng nawh, Aux ot tau mai maix sonsang taoh ka maix mai Aux tak sang taoh maix heue, Siyiex ah nan heue. 21 “Aux tak sang taoh maix lih khaing tawm taix pui caox caig mai Aux tak deeh laug ti teei maix khaing tawm taix pa lhat graung maix heue.”