7
Pui Gideon Pa Vao Loe Yieh Kaux
1 Yerubalax pa mawh Gideon mai can pui pa ot mai nawh kaoh caocao mai hu bang ka praok rawm daux Harot, pui Midian khankix bang ka plak laong khaing kix, ka daux ngawd hawt caong gawng Mawre heue.
2 Mai Simiang Siyiex ah nin ka Gideon, “Pui pa ot tau mai maix kied nie, Aux ang pon ap pui Midian khankix ka daux taix kix, Aux lhat pui Isarelax khankix yaw rang di tix khaing Aux ah nin, plawng taix cao Aux hoik deeh taoh ka aux heue.
3 Mawh kheu nan krai pao pui mhong ah nin, “Pui pa koe krax lhat graung mai pa khi rhawm khankix, kieh nawh dee ingRef 7:3 Pi 20:8. caocao khaing gawng Gilat mai pui deeh ing ra mheen, kawn deuk tix mheen kaux heue.”
4 Mai Simiang Siyiex ah nin ka Gideon, “Pui khankix kawn nie tete, viex kix hu ka dee nyaux rawm mai Aux tak cheuk ti yaox kix, son maix tan, ka pui pa ah aux pon ti hu pui an tak mawh pa hu tau mai maix, ka pui mawx pa ah aux ang pon ti hu, pui an tak ang pon ti hu tau mai maix heue.
5 Mawh kheu nan nawh viex kix hu ka dee nyaux rawm mai Simiang Siyiex ah nin ka Gideon, “Pui pa lied ti nyaux rawm ka dak tix awm sox maix tak gwieh ti deuh tix cub mai pui pa grux ngawng tix nyaux rawm maix tak gwieh kix tix cub heue.”
6 Pui pa dawm rawm lied tix nyaux ka daux taix tix, simin ti yaox koe pui loe yieh kaux, pui pa kawn deuk khankix mawh pa grux ngawng tix nyaux rawm heue.
7 Khaix an Simiang Siyiex ah nin ka Gideon, “Ka pui loe yieh kaux inkix, pa hoik lied ti nyaux rawm Aux tak taoh maix ka mai ap pui Midian khankix ka daux tawm taix maix, kieh pui pa deuk khankix deeh ing ka dee ot tix heue.
8 Mawh kheu nan pui khankix teei ti viex priex ih tix mai viex teettawng ka daux taix tix mai nawh ploi pui Isarelax pa kawn deuk khankix deeh ing ka nyiex gox cao kix ku kaux mai nawh yut ngie pui loe yieh an tau mai tix, pui Midian hoik bang ti ot plak greem ka daux ngawd heue.
9 Daux sawm an Simiang Siyiex ah nin ka nawh, “Kaoh heue, lih hu ka dee bang pui koeng maix khankix, mawh kheu Aux hoik ap kix ka daux taix maix heue.”
10 “Phan maix koe krax lhat graung kok kawncau maix Phura hu tau mai maix,
11 mai maix tak mhong ka ceu pa ah kix, khaix ceu an khawn taix maix tak koe riang rao, sonsang lih hu dee bang kix, mai nawh lih hu tau mai kawncau Phura, ka dee pau kru naing ka plak praix tab dee bang kix heue.”
12 Yam an pui Midian mai pui Amaliet mai pui pa kaoh khaing plak lih singaix khankix, kied haoh hun awm haoh hun sido khankix mai kix laig it ka daux ngawd khawmuik mai kala uk kix kawx mawh pa ang lai dak uik simin awm mhaik rawm sigrit sigra heue.
13 Yam hoek Gideon tan nawh mhong ka krai pui, grawng camaox tix ka paox grawm tix khankix ah nin, “Aux camaox blah nghox ca tix lon bang lia hoek ka dee bang pui Midian, hu krox ka nyiex gox tix lhang, nyiex gox an pluk pliak mai laux leeing heue.”
14 Paox grawm nawh deeh ah nin, in ang mawh grawng tidtix, mawh vaig Gideon kawn simex Yawsha, pui Isarelax, mawh kheu Siyiex hoik ap pui Midian mai khawm kru naing kix khawmuik ka daux taix nawh heue.”
15 Yam hoik mhong Gideon ka krai kix camaox an mai dee bleeh, nawh krub ka Simiang Siyiex, nawh deeh ing ka dee bang pui Isarelax khankix ah nin heue. “Yaog tix kaoh, mawh kheu Simiang Siyiex hoik ap cub kru naing pui Midian ka daux taix pex heue.”
16 Khaix an nawh gwieh pui loe yieh koe loe cub mai kieh kix viex teettawng ku kaux, ka daux taix tix tau mai aw tiex pa koe kawk ngu ka plak daux heue.
17 Mai nawh ah nin ka kix, “Jhak ka aux mai hawt ti yuh awm aux mai pau tix jhak aux, yam hoek aux ka dex mee dee bang kix, pex tak yuh awm pa yuh aux heue.”
18 Yam phlu aux teettawng mai pui pa ot tau mai aux ka teettawng, pex pa ot ka praok dee bang kix khawmuik tak phlu teettawng ah nin heue. “In mawh vaig Simiang Siyiex mai Gideon heue.”
19 Pui tix yieh pa hu tau mai Gideon hoek ka tab dee bang kix greung sawm, yam taug khraox loh cao pau tab paox ti mai kix phlu teettawng viex tix mai pah aw tiex pa koe daux taix tix max heue.
20 Cub pui naing nawh khawm loe cub phlu teettawng tix mai pah aw tiex max, kix giex kawk ngu ka taix khawn gwiex mai giex teettawng ka taix khawn dawm mai yo ah nin, “Vaig Simiang Siyiex mai Gideon heue.”
21 Pui tang cung ka dee ot tix hawt vung viang tab mai kru naing kix khawmuik riag yo mai to tua tix heue.
22 Yam phlu pui loe yieh kaux ka teettawng tix, Simiang Siyiex kieh vaig kix, ra lai mug ka paox ti ka daux tab kix khawmuik mai kru naing ankix, lih to ka plak veng Bietshita, pa koe plak see veng Zererax, tom hoek ka mee haktiex veng Abelmehawla pa koe hawt veng Tabat heue.
23 Pui Isarelax khrawm paox ti ka haktiex Napthalix, haktiex Asha mai haktiex Manashe mai hawt ti pheet pui Midian heue.
24 Mai Gideon ploi pui cau tix khankix hu ka gawng Epharem mai tawm lox ka kix ah nin, kieh pui Midian hoek mai pau diang rawm Yawdan tom hoek ka yaong Bietbarax haktiex hawt rawm Yawdan heue. Pui Epharem kawx khrawm paox tix mai pau diang rawm, tom hoek ka yaong Bietbarax heue.
25 Mai kix hoik pon giex cao kaing naing ting pui Midian ra kaux, pa kaux Awrebax mai Zebax, kix pah Awrebax piang rang Awrebax mai pah Zebax ka dee biiet Zebax rawm plix siiet, kix hawt khaix pui Midian mai viex kaing Awreba mai kaing Zebax hoek ka Gideon, ka toi rawm Yawdan heue.