6
Yeen Pui Midian Ka Pui Isarelax
1 Pui Isarelax khankix yuh pa caox caig ka plak sivoe ngai Simiang Siyiex, mawh kheu nan Simiang Siyiex ap kix ka daux tawm taix Midian aliah num heue.
2 Pui Midian pex ka pui Isarelax khankix, mawh kheu jao pui Midian, pui Isarelax tom kaung ti ot daux tiex daux rang ka dee kaux cong son cao tix ka piang gawng khankix heue.
3 Yam ruat pui Isarelax simie nghox koi, pui Midian mai pui Amaliet, khawm pui pa ot ka plak lih singaix khankix hoek puing ka kix heue.
4 Kix hoek yuh tab mai yuh simie pa hoik sum kix laux leeing tom hoek ka veng Gaza mai ang lai prah pa ih, pex, yung, mawie mai la khankix son pui Isarelax,
5 Kix hoek tau mai to brie eei tix mai khawm nyiex gox tix, awm sido pa kied haoh hun tau mai kala uk pa ang lai uik simin mai hoek laig sonsang yuh haktiex laux leeing heue.
6 Mawh kheu nan pui Isarelax hoik kied hot sibhawm, kheu jao pui Midian khankix mai pui Isarelax riag yo ka Simiang Siyiex heue.
7 Yam riag yo pui Isarelax khankix ka Simiang Siyiex, kheu jao pui Midian khankix,
8 Simiang Siyiex deeh ploi cao jhai, son pui Isarelax ah nin, in mawh gumlox pa ah Simiang Siyiex ka pui Isarelax, “Aux hoik viex pex lih khaing dee yuh pex siliex,
9 Aux hoik taoh pex lih khaing daux taix pui Ejiptux mai khaing daux taix pui pa khin pex khawmuik mai Aux hoik grheu kix ka plak sivoe pex mai hoik tawx haktiex kix ka pex heue.
10 Aux mawh Simiang Siyiex pex, paw lhat graung ka siyiex pui Amawrix, ka daux haktiex dee ot pex, viang mawh nan pex ang koe krax cu krax nghiet ka gumlox Aux heue.”
Grawng Gideon
11 Kawncau Simiang Siyiex hoek mai ngawm ka greem khaox tiah, pa koe ka daux yaong Awpharax, pa mawh cie Yawsha pui Abezarix, Gideon kawn simex Yawsha pah ka nghox ca ti hawt dee biiet kix rawm plix siiet, sonsang mox nawh ti khaing pui Midian khankix heue.
12 Kawncau Simiang Siyiex hoek bleeh ka nawh ah nin, “Simiang Siyiex ot tau mai maix, pa mawh pui pa ting riang rao mai pa koe rhawm kwa heue.”
13 Gideon deeh ah nin ka Nawh Cao, “Simiang aux eue, phan Maix ot tau mai yix, ceu inkix hoik lih koe ka piang yix, jao pa ti lie?” Mai pa daox daing pa yuh Nawh Cao, pa hoik krai keeing yix ka yix ah nin, “Simiang Siyiex hoik viex yix lih khaing daux meung Ejiptux, ceu an koe dee mawx? Yam in Simiang Siyiex hoik tik vud ka yix mai hoik ap yix ka daux taix pui Midian khankix heue.”
14 Simiang Siyiex deeh veeh ti jhak nawh ah nin, “Hu ka daux riang rao pa hoik pon maix, maix tak deeh taoh pui Isarelax, khaing daux taix pui Midian, ang hoik mawh Aux pa ploi maix lie?”
15 Mai Gideon deeh ah nin ka Nawh Cao, “Simiang Siyiex eue, aux tak pon taoh pui Isarelax yuh ka mawx? doeh nyiex aux mawh pa kied iak ka daux cub pui Manashe mai aux mawh pa kied iak khaing daux nyiex ma keeing aux heue.
16 Mai Simiang Siyiex deeh ah nin ka nawh, “Aux tak ot tau mai maix tete mai maix tak pex pui Midian awm pui tix kaux heue.”
17 Khaix an nawh dee ah nin ka Nawh Cao, “Yam in phan aux mawh pa hoik pon bwanson ka plak sivoe ngai Maix Cao, jhi aux yaox mhai rug tix ceu sonsang tawng aux Maix Cao mawh pa sikah tau mai tix heue.”
18 Aux rawg maix ang nyang hu khaing tin, tom hoek bawg yam deeh viex krax tan tix hoek mai deuh ka plak sivoe Maix Cao, mai Nawh Cao deeh ah nin, “Aux tak pau tom yam deeh hoek maix heue.”
19 Khaix an Gideon deeh ing ka nyiex mai khre kawn pex awn tix mu, khawm blah phawng nghox ca pa ang viex susaix tix Epha mai sau nex ka daux khrawng tix mu mai rawm nex tung pex ka daux aw tix mu mai viex ti tan ka kawncau Siyiex, hawt greem khaox tiah,
20 Kawncau Siyiex ah nin ka nawh, “Teei nex in mai blah pa ang sau susaix hu deuh ka piang rang mai lhauk rawm nex tung ka piang, “mai nawh yuh awm an heue.
21 Khaix an kawncau Simiang Siyiex nyee khaox gix pa giex tix mai teeh ka nex mai blah pa ang sau susaix ankix, ngu lih khaing rang mai gleeing ka nex khawm blah pa ang sau susaix mai kawncau Simiang Siyiex deeh grai khaing plak sivoe ngai nawh heue.
22 Gideon hoik tawng ka mawh Nawh kawncau Simiang Siyiex, mawh kheu nan Gideon ah nin, “Simiang Siyiex eue, aux hoik yaox kawncau Maix plakngai taw plakngai heue.”
23 Simiang Siyiex deeh ah nin ka nawh, “Kieh pa nhim koe tau mai maix, paw koe krax lhat graung maix tak ang yum heue.”
24 Mawh kheu nan Gideon sum khu dee tan son Simiang tix mu tan mai kok ceu kaux an mawh Simiang Siyiex Shalon, an mawh pa koe ka daux yaong Awpharax pui Abeza tom in singaix heue.
25 Ka daux sawm an Simiang Siyiex ah nin ka nawh, “Teei kawn mawie awn keeing maix mai mawie mhaing koe ju aliah num ra mu tix mu mai yieh ti tik khu dee tan Balax, pa hoik sum keeing maix mai kid ti tik khaox riang grang Asherax khankix pa koe hawt praok nawh,
26 mai deeh sum khu dee tan tix mu, son Simiang Siyiex maix, ka piang rang in awm pa krai Aux mai teei kawn mawie mhaing ra mu tix mu an gleeing krax tan pa gleeing, ka khaox riang rao pa hoik kid maix ti tik ka heue.
27 Mawh kheu nan Gideon kok siliex tix khankix kao kaux mai yuh awm pa hoik ah Simiang Siyiex ka nawh, viang mawh nan jao lhat nawh ka pao nyiex keeing tix mai ka pui pa ot ka daux veng khankix, nawh ang pon yuh plak ponngaix mai nawh yuh an plak ponsawm heue.
Khu Dee Tan Balax
28 Yam kaoh pui pa ot ka daux veng ponngawb caocao, kix yaox khu dee tan Balax hoik prung prang laux leeing mai khaox rong riang grang Asherax pa koe hawt praok an, mawh khaix kid ti tik mai hoik tan kawn mawie ra mu tix mu ka piang khu dee tan pa hoik baox sum ti tan heue.
29 Mawh kheu nan kix chawk ah nin ka paox ti, tix kaux lai tix kaux, “Mawh mawx pa yuh ceu in?” Khaix hoik ciied kix ti yaox ka grawng an, kix ah nin, “Mawh Gideon kawn simex Yawsha pa yuh ceu in heue.”
30 Khaix an can pui pa ot ka daux veng ah nin ka Yawsha, “Viex kawn simex maix lih sonsang yum nawh, mawh kheu nawh hoik prung prang ti tik khu dee tan Balax mai hoik kid ti tik khaox riang grang Asherax an khankix pa koe hawt praok an heue.”
31 Mai Yawsha ah nin ka pui pa cung ti yuh see ka nawh khankix, “Mawh sang ot pex plak Balax ah nin ka aux lie? mawh sang deeh taoh pex ka nawh lie?” Kieh pui pa krai lox son nawh, mawh pa yum ka sang bah riang praix, phan nawh mawh Siyiex tete, khu dee tan pa hoik prung prang an, kieh nawh krai lox ka son cao nawh heue.
32 Mawh kheu nan jah ka daux in singaix, nawh kok ceu kaux kawn nawh mawh Yerubalax, kheu ah nawh nin, “Kieh Balax deeh krai lox ka son cao tix, ka pui pa hoik prung prang khu krub dee tan nawh laux leeing heue.”
33 Khaix an pui Midian mai pui Amaliet, ceu pui plak lih singaix khankix khrawm paox ti khawmuik, kix tiang ka plak an mai bang tix ot ka daux ngawd Yezerelax heue.
34 Khwan Simiang Siyiex lih ka piang Gideon, khaix an nawh phlu teettawng mai pui Abeza khrawm paox tix hoek ka plak khaix nawh heue.
35 Mai nawh ploi cao cau khankix hu ka haktiex Manashe khawmuik, pui Manashe kawx khrawm paox ti hawt khaix nawh, nawh baox ploi cao cau khankix hu ka haktiex Asha, haktiex Zebulun mai ka haktiex Napthalix mai kix kawx khrawm paox ti hawt khaix nawh khawmuik heue.
Grawng Mhai Rug Hauk Yung
36 Mai Gideon deeh ah nin ka Siyiex, “Phan maix cao sang deeh taoh pui Isarelax, ka taix aux awm pa hoik ah Maix Cao,
37 aux tak deuh hauk yung ka daux glah dee pah nghox, phan rawm ciex koe ka piang hauk yung an mai haktiex mawh pa kroh, khaix an aux tak tawng ka sang deeh taoh Maix Cao ka pui Isarelax khankix, ka daux taix aux, awm pa hoik ah Maix Cao heue.”
38 Yam kaoh nawh ponngawb caocao singaix khaix, nawh siyiet hauk yung an mai rawm ciex lih khaing hauk yung, tom naog ka daux pheung tix mu heue.
39 Khaix an Gideon deeh ah nin ka Siyiex, “Paw nyang song rhawm ka aux liak, kieh aux baox krai lox tix bawg ha, aux rawg tix baox cheuk ti deuh hauk yung tix bawg, kieh rawm ciex kroh ka piang hauk yung mai kieh rawm ciex lan piang tiex khawmuik heue.”
40 Mai Siyiex yuh ka daux sawm an, mawh hauk yung pa kroh ngie, viang mawh nan tiex khawmuik hoik lan ka rawm ciex heue.