1 Lheu khaing an Yawbax deeh toe lox kab tix ah nin, 2 “Awm im ju Siyiex Cao pa ting sibrawm pa teei grawng see aux hu dee singai mai pa hoik yuh khwan ju aux hoek ka daux pa kham geu, 3 glang yam kawn im ju aux mai yam kawn toek aux bhawm pa tawx Siyiex ka meeh tix, 4 jheeh aux tak ang lai sikah lox caox caig mai dak aux tak ang lai ah lox pie lhen heue.” 5 Sonsang ah aux mawh pex pa khaw caw, kieh an mawh pa singai khaing aux, tom hoek bawg yam sang yum aux kawx, aux tak ang thiang ka ah aux tix mawh pa khaw caw heue. 6 Aux giex tix priex krax pa rahsee tix kaux cong mai aux ang ploi ka, rhawm aux tak ang lai koe dee deuh phimap ka cao tix, glang yam im ju aux heue. 7 “Kieh pui koeng ka aux mawh awm pui caox caig mai kieh pui pa kaoh deeh tieh feen ka aux, mawh awm pui pa ang rahsee heue. 8 Grawh grawng nawh phan Siyiex teei ka ju pui tud rhim, krax keud pot jun pot kix ka sinngao pa pon tix sang koe bwanson yuh ka mawx? 9 Mawh sang nghiet Siyiex ka lox riag yo nawh, yam hoek krax pa kha rhawm piang nawh lie? 10 Tak sang koe krax nyawm rhawm nawh ka daux cao pa ting sibrawm lie? Tak sang rawg nawh bwan ka Siyiex jheung jheung lie?” 11 “Aux tak sang gau pex ka grawh grawng taix Siyiex mai aux ang lai mox ka can ceu pa koe tau mai cao pa ting sibrawm an heue.” 12 Jhak heue, tokaux pex khawmuik hoik yaox ka ceu pa mawh an tete, pex lai kawn kieh rhawm keud pa giex going naog ka daux rhawm ti yuh ka mawx lie? 13 In mawh nyum pa pon pui caox khaing Siyiex mai mawh sinngao cie pui pa yuh krax kha rhawm pa hoik pon rieb khaing taix cao pa ting sibrawm, 14 viang kawn praix nawh koe tom nie kawx tak yum ka lawm vaig mai kawn praix nawh khankix, sawg miex ding kawx tak ang kub ih heue. 15 Can pui kix pa kawn deuk khankix kawx tak mawh pa sang sipaung tix ka daux meung yum, mai cub miexmai kix kawx ang yiiem doe kix, 16 viang nawh pum tix priex mau awm phawng tiex mai khrawm ti deuh kraung ceep awm glaox kawx, 17 viang nawh khrawm ti deuh an khankix kawx, pui rahsee tak sang ceep ka mai pui pa ang koe dee lud tak sang gwieh tix cai ka mau an heue. 18 Nawh sum nyiex tix awm kawn pung piang shiah mai awm nyiex gox pa yuh cao pa pau yam heue. 19 Yam laig it pui magmi nawh ang lai pon khrawm ti deuh kraung khrai mai yam blah nawh ngai tix sinngao nawh hoik grai uik heue. 20 Krax lhat graung tak hoek piang nawh awm kheem rawm mai bhaung ting tak sang tah nawh hu dee singai ka daux ponsawm heue. 21 Bhaung plak lih singaix tak tah nawh luan hu dee singai mai bhaung an tak pih ti tik nawh lih khaing dee ot nawh heue. 22 An mawh pa kha rhawm pa tawx Siyiex lih piang nawh mai ang lai koe krax caux rhawm ka nawh, nawh tak simie ti luad luan khaing tawm taix sibrawm Nawh Cao heue. 23 Pui khankix tak dieh taix tix ka nawh mai tak nyiah maung nawh mai grheu nawh lih khaing dee ot nawh heue.