1 Khaix an Yawbax pawk lox ah nin, 2 “Mawh hoik teem maix ka pui pa iak riang yuh ka mawx? mai hoik taoh maix ka taix pa awn riang yuh ka mawx? 3 Mawh hoik tawx maix krax keud ka pui pa ang koe pingnya cuyi yuh ka mawx? hoik paoh maix tix tawx rhawm keud dong sawn ka pui khankix yuh ka mawx? 4 Mawh hoik krai maix gumlox in ka pui mawx? mawh khwan pui mawx pa kieh maix krai lie? 5 Pa yum pa ot greem tiex daux simeeig mai pa ot greem rawm khankix hoik sikua heue. 6 Meung yum hoik plak tix sidawng sivoe ngai Nawh Cao mai krax laux leeing ang lai pon kheem heue. 7 Nawh Cao hoik tawm hoik di raoma piang dee yi mai Nawh Cao teuk teue ti deuh haktiex piang pa ang lai koe ceu pa joh pa jhan tix ceu kawx heue. 8 Nawh Cao hoik kie ti deuh rawm ka daux paiawm pa kied pu ceep mai paiawm khankix ang lai dud lai ghah heue. 9 Nawh Cao hoik kheem ti deuh pakngai dang ngeung Nawh Cao mai rurie paiawm Nawh Cao piang an heue. 10 Nawh Cao hoik tat ti deuh mee rhoi praix piang rawm khankix, ka sinax mee pa riang mai pa faik heue. 11 Rong raoma khankix hoik sikua mai daox deng ka krax pa sidiex gau Nawh Cao heue. 12 Nawh Cao sidiex rawm sigrit sigra ka sibrawm tix mai kieh yiien, khaix an Nawh Cao yieh bhaung ting laux ka pingnya tix heue. 13 Khwan Nawh Cao phan ka can pa koe daux raoma khankix mhawm grang mai taix Nawh Cao hoik phan ka siyawng pa kied phai heue. 14 In khankix kawn mawh ngie pa iak pa liied ka Nawh Cao mai kawn mawh ngie awm mhong ex lox supsiep khaing Nawh Cao! mawh kheu nan mawh pui mawx pa sang pon tawng lox sibrawm sinum praix Nawh Cao lie?”