1 Khaix an Yawbax pawk lox ah nin, 2 “Ka daux in singaix, aux yaox ti kham geu ka ceu pa kied song ka daux pa ngia tix mai taix aux hoik simeue kheu jao grawng pa ngia aux heue.” 3 Kieh aux tawng ka dee sang sipub tix ka Nawh Cao, sonsang pon hoek aux ka dang ngeung Nawh Cao liak! 4 Aux tak sang tang grawng see ka plak sivoe Nawh Cao mai kieh lox pa thung thiang naog ka jheeh tix heue. 5 Aux tak tawng ka lox pawk Nawh Cao ka aux mai doh rhawm ka ceu pa krai Nawh Cao ka tix heue. 6 Mawh sang thung thiang Nawh Cao ka aux tau mai sibrawm pa kied ting Nawh Cao lie? Ang mawh nan! Nawh Cao tak nghiet ka aux heue. 7 Pui rahsee pon kah kum tau mai Nawh Cao mai aux tak pon luad luan khaing krax prawng krax ciyang leeing ju heue. 8 Jhak heue, aux hu sivoe, viang mawh nan Nawh Cao ang ot tan mai yam deeh aux plak khaix aux ang tien yaox ka Nawh Cao, 9 Yam yuh Nawh Cao kaing ka plak gwiex, aux ang tie maong ti jhak ka Nawh Cao, yam deeh veeh Nawh Cao tix ka plak khawn dawm aux ang tien yaox ka Nawh Cao heue. 10 Viang mawh nan Nawh Cao tawng ka krax hu aux, khaix hoik ciied Nawh Cao ka aux, aux tak lih mhawm awm khri heue. 11 Aux hawt grawng lawng khaix caong Nawh Cao tom sidah mai aux ang lai via khaing dau krax hu Nawh Cao heue. 12 Aux ang tik ka gumlox pingnyap pa kaoh khaing jheeh Nawh Cao, aux hoik priex gumlox pa kaoh khaing jheeh Nawh Cao, nie lheu ting ngawh khaing pa ih tix heue. 13 Viang mawh nan mawh pui mawx pa sang pon tieh loh ka rhawm Nawh Cao pa ang chix tieh loh tix, tix bawg kawx lie? Nawh Cao tak yuh awm pa koe alo Nawh Cao tix sang yuh heue. 14 Grawh grawng nawh ka son aux Nawh Cao yuh tix tawx pa hoik tat ti deuh tom grum naog mai ceu an khankix tom nie koe tau mai Nawh Cao heue. 15 Mawh kheu nan aux hoik koe pa yaoh yee ka plak sivoe ngai Nawh Cao, yam keud aux ti yaox grawng in aux koe krax lhat graung ka Nawh Cao heue. 16 Grawh grawng nawh Siyiex hoik yuh rhawm aux laux mai cao pa ting sibrawm hoik kieh aux yaoh yee, 17 mawh kheu ang Nawh Cao tik aux laig ka daux pa faik mai ang lai mox pa kied faik an khaing pakngai aux heue.