1 Khaix an Eliphat ceu pui Teman pawk lox ah nin, 2 “Awm pon kawn pui bwanson ka pingnya pa yuh cao tix, khex sang pon yuh pui bwanson ka Siyiex lie?” 3 Mawh tak pon kieh maix cao pa ting sibrawm nyawm rhawm kheu pa rahsee tix lie? Phan ang mawh nan kheu pa rahsee pa mhawm maix tak kieh krax haok hwan bwanson koe ka Siyiex yuh ka mawx lie?Ref 22:2-3 Job 35:6-8. 4 Mawh kheu jao lhat graung maix ka Nawh Cao, Nawh Cao tom sidiex gau ka maix mai yuh see ka maix lie? 5 Ceu pa caox caig yuh maix mawh pa kied ting lhaong mai phimap maix mawh pa ang lai koe dee sidah sidu ang mawh lie? 6 Grawh grawng nawh maix hoik rien ti teei kraung khrai pa tang puxaik maix ka daux pa ang rahsee mai peeik ti teei kraung ceep kix pui hot pui sibhawm heue. 7 Maix ang sax tawx pui taug mao nyaux rawm mai ang sax tawx pui cai rhawm sawm heue. 8 Viang mawh nan, pui pa koe sibrawm hoik teei giex tix cie haktiex mai pui koe min plakngai hoik pon tix ot ka dee an heue. 9 Hoik grheu miexmai hu dee singai mai taix yi tix mai hoik raig taix kawn doe graig heue. 10 Mawh kheu nan, kie pa taong hoik koe hawt vung viang maix mai krax lhat graung pa hoek dom mawx dom an tak tawx krax kha rhawm ka maix, 11 phan ang mawh nan pa faik tak sang bleeh son ang maix lai chix yaox mai rawm pa kied ting tak kheem piang maix heue. 12 Mawh ang Siyiex ot daux raoma ka dee lhaong lie? jhak ka simeeig pa kied ting lhaong khankix mai kix kied lhaong tete, 13 grawh grawng nawh maix ah nin, Siyiex tawng ceu patix lie? Mawh sang pon prawng Nawh Cao see ka daux pa kied faik an lie? 14 Paiawm pa kied pu ceep kheem ka Nawh Cao son ang Nawh Cao chix yaox mai Nawh Cao lailing piang mee dee choek raoma heue. 15 Mawh kawn sang lawng maix ka krax prim tix, pa mawh diang krax pa hoik sax hu pui caox khankix, 16 pui pa hoik tat ti tik num riah sivoe hoek bawg yam cie kix, pa hoik kheem rawm hu dee singai khankix ang mawh lie? 17 Kix ah nin ka Siyiex, lih hu khaing yix, mawh sang pon yuh cao pa ting sibrawm patix piang yix lie? 18 Nawh Cao hoik kieh nyiex kix naog tau mai ceu pa mhawm, viang mawh nan kieh krax keud pui caox khankix, singai khaing aux heue. 19 Pui rah pui see khankix gaux rhawm ka yaox tix an mai pui pa ang koe phimap khankix tak nyiah maung pui caox, 20 pui koeng ex khankix hoik laux leeing tete mai ngu hoik gleeing ka can pa kawn deuk kix heue. 21 Yam in kieh maix yuh paox pie tau mai Nawh Cao mai ot ka daux krax pa nhim, phan yuh nan ceu pa mhawm tak hoek ka maix heue. 22 Yuh bwanson rieb ti teei lox sidiex gau pa kaoh khaing daux jheeh Nawh Cao mai priex gumlox Nawh Cao ka daux rhawm tix heue. 23 Phan maix deeh hoek ka cao pa ting sibrawm mai tik krax lud tix khankix luan dee singai khaing nyiex gox maix, maix tak sum tix mawh pa kaux cong heue. 24 Phan maix khrawm khri awm phawng tiex daux nyiex tix mai khrawm khri Awphirax ka daux rawm klawng awm lon simaox, 25 mai phan Cao pa ting sibrawm mawh khri ka maix mai mawh mau pa kied koe ngawh jum ka maix, 26 khaix an maix tak koe krax gaux rhawm ka daux cao pa ting sibrawm, mai maix tak maong ti jhak ka Siyiex heue. 27 Yam rawg maix bwan ka Nawh, mai Nawh Cao tak nghiet ka maix mai maix tak pon bwanson ka sijax mukheu yuh tix heue. 28 Kaing jhaw pa yuh maix khawmuik tak haok hwan ting lhaong mai pa riang tak jhan piang krax hu maix heue. 29 Siyiex yeen ti tik ka pui ting rhawm mai yaog ka pui pa awn rhawm heue. 30 Pie ka pui pa ang koe dee luan khaing phimap kawx, Nawh Cao tak taoh lawd ka nawh mai nawh tak hoek krax taoh ka khawn taix pa singax singeh tix khankix heue.”