1 Siyiex ah nin, “Raoma mawh dang ngeung AuxRef 66:1-2 Mat 5:34; Cau 7:49-50 mai haktiex mawh ngot dee deuh Aux caong tix, nyiex pa tak sang sum pex son Aux koe dee mawx lie? dee pa sang laux lee Aux tix koe dee mawx lie? 2 Siyiex ah nin, ceu an kix khawmuik, ceu pa lih ti koe khawmuik mawh pa yuh taix Aux heue. Viang mawh nan, ka ceu pa tak sang jhak Aux, mawh pui pa hot pa shia, pa koe rhawm awn rhawm tiem, pa koe krax laux rhawm mai pa koe krax graung ka gumlox Aux heue.” 3 “Pui pa pah mawie awm pah nawh pui, pui pa appong ti tan kawn yung, awm siyied nawh ngawg sox, pui pa tan ti tawx krax tan phawng nghox ca im, awm tan nawh ti tawx nham lig, pui pa gleeing nyawng bhawng, awm nawb nawh bwanson ka riang griang heue. Pui inkix hoik laug ka daux krax hu cao kix mai ka daux rhawm kix koe krax khaw rhawm khaw rhi ka krax pa seeing brai kix heue. 4 Aux tak sang laug ka krax pie lhen yuh kix mai viex krax pa lhat graung kix hoek ka piang kix heue. Grawh grawng nawh, yam kok Aux, pui tix kaux kawx ang tie pawk, yam sikah Aux, kix ang tie nghiet ka. Kix hoik yuh ceu pa caox ka sivoe ngai Aux mai hoik laug ka pa ang Aux koe krax khaw rhawm ka heue.”

5 Pex pa koe krax graung ka gumlox Nawh Cao khankix eue, nghiet ka gumlox Nawh Cao heue. Puxaik pex khankix pa koeng ka pex, pa hoik grheu pex lih kheu jao ceu kaux Aux hoik sax ah nin, “Kieh Siyiex koe min plakngai, son tak sang pon ex ti yaox ka krax pa gaux rhawm pex. Viang mawh nan, kix tak mawh pa kaig tua heue.” 6 Ref 66:6 Jhi 16:1,17Lox pa sinum siaox khankix ka daux veng mai koe lox pa lih khaing daux nyiex bwan, mawh lox pa deeh viied Siyiex ti tawx ka pui koeng Nawh khankix heue. 7 Sivoe ang nawh nyang bax saux, nawh hoik keh kawn tix, sivoe ang nawh nyang saux ki, Nawh hoik keh kawn simex heue.Ref 66:7 Jhi 12:5. 8 Mawh pui mawx pa sax mhong ka ceu in lie? Mawh pui mawx pa sax yaox ka ceu in lie? Mawh haktiex mawx pa tak sang keh ka daux tix singaix ngie lie? Phan ang mawh nan, mawh haktiex mawx pa hoik keh ti lih ka daux tix taix neh lie? Grawh grawng nawh, yam kawn taug kham kawn bun veng Zion ka krax saux pa sang keh, nawh hoik keh kawn praix tix heue. 9 Siyiex ah nin, “Aux hoik kieh bawg yam pa sang keh nawh hoek mai ang kieh nawh keh lie? Siyiex maix ah nin, Aux pa hoik kieh krax pa kawn koe, khex sang nyeep ti deuh daux vaig lie?” 10 Pex pa moh ka veng Yerusaliem khankix eue, gaux rhawm tau mai Nawh heue. Pex pa koe krax khi rhawm son nawh khawmuik, gaux rhawm ka riang pa gaux rhawm tau mai nawh, 11 tak sang kieh pex koe krax fah rhawm mai peuex tix rawm teeih nawh tom sak, kieh pex pon min pakngai pa blon nie nawh mai koe krax gaux rhawm mai biiet tix rawm teeih pa kied haoh hun heue. 12 Siyiex ah nin, “Jhak heue, Aux tak greed lang krax pa nhim rhawm ka nawh, awm rawm klawng mai kieh plakngai pui tang meung naog kreh nawh awm rawm klawng pa lih hu heue. Pex tak yaox ti peuex, pex tak mawh pa klien tix ka paw nyoi nawh mai mawh pa glaw tix ka piang ngawng nawh heue. 13 Awm glaw miex ka kawn tix koe krax nyawm rhawm, awm an Aux tak kieh pex koe krax pa nyawm rhawm mai pa tak sang koe krax pa nyawm rhawm nyawm rhi ka daux veng Yerusaliem heue.

14 Yam yaox pex ka in, rhawm pex tak koe krax gaux rhawm mai si ang pex tak hwan awm rib pa klai, taix Siyiex tak mawh pa sidawng tawng tix ka siliex Nawh mai khawm krax pa song rhawm Nawh ka pui koeng nawh khankix heue. 15 Jhak heue, Siyiex tak hoek awm ngu mai ling lawx naing bhaung Nawh, awm bhaung keu kang lux, sonsang jhi krax pa song rhawm Nawh awm taox ngu mai krax pa sivied gau Nawh awm rao ngu heue. 16 Mawh kheu Siyiex tak ciyang ka can pa koe nex nham khankix khawmuik ka ngu mai ka vaig lawm, mai krax pa pah Siyiex pui yum tak mawh pa koe tom nie heue. 17 “Pui an kix pa yuh tix singax mai pa yuh tokaux cao kix singax khankix, sonsang hu laig tix ka daux sipeem, hawt khaix pui tix kaux pa koe daux sigreung an mai ih nex lig mai pa ih nex kiang priex pa seeing brai an khankix, tak mawh pa koe krax laux leeing tau heue. 18 Aux tawng ka kaing yuh kix mai khawm ka krax keud kix. Aux sang hoek mai tak sang khrawm ceu pui khawmuik mai khawm pa tang lox sikah khankix mai kix tak hoek mai yaox ka min pakngai Aux heue.” 19 “Aux tak sang deuh mhai rug ka daux sinax kix mai pui an kix pa pon ti glawd ka daux sinax kix, Aux tak ploi kix hu ka haktiex tang meung, ka veng Tasux, meung Pulax mai haktiex Luta mai ka haktiex Tupalax mai meung Ya-wan mai khawm klawn tiex rawm sigrit sigra pa koe dee singai khankix pa ang sax mhong ka grawng krax pa ao min Aux mai pa ang sax yaox ka min pakngai Aux mai kix tak pao ti krai min pakngai Aux ka daux sinax pui tang meung khankix heue.” 20 Kix tak sang viex puxaik pex khankix hoek khaing daux haktiex tang meung khawmuik, ka piang brung mai ka daux ling lawx brung mai ka daux khreng klawm khankix mai ka piang la mai ka piang kala uk khankix, bleeh ka gawng pa singax Aux, veng Yerusaliem son krax pa tan ka Siyiex awm viex kawn praix ceu pui Isarelax khankix krax tan hoek ka daux tawg klong pa singax mai laig ka daux nyiex bwan Siyiex. Siyiex ah nin, 21 “Ka daux kix tiblah Aux tak sang teei pui khankix son cao giex kaing li mai pui Lewix khankix heue.” Siyiex ah nin, 22 “Awm hoik yuh Aux ti deuh raoma pa khraoxRef 66:22 Isa 65:17; 2Pe 3:13; Jhi 21:1. mai haktiex pa khraox koe ka plak sivoe ngai Aux, awm an doeh ru pex khankix mai ceu kaux pex tak mawh pa kawn deuk.” Siyiex ah nin, 23 “Ngaix haok khix khraox ku ngaix mai ngaix twah ku twah, can pui khawmuik tak hoek ti krub ka sivoe ngai Aux.” Siyiex ah nin heue. 24 Kix tak sang lih hu ti jhak ka tokaux pui pa hoik lud ka Aux. Mawh kheu viag pa koe daux kix ang chix yumRef 66:24 Mak 9:48. mai ngu kix, mawh pa ang lai chix yeet. Kix tak mawh ceu pa seeing brai ka son pui khawmuik heue.”