1 Ka pui an kix pa ang sax mhaing ka Aux, yam inkix hoik chawk ka Aux heue. Pui an kix pa ang sax sawg ka Aux,Ref 65:1 Ro 10:20. tak kieh kix yaox ka Aux heue. Ka pui an kix pa ang sax kok tix ka greem ceu kaux Aux mai Aux ah nin ka kix, “Aux ot tin, Aux ot tin heue. 2 Aux hoik nyeu taix tix lih leeing singaix mai kok ka ceu pui pa tieh feen khankix,Ref 65:2 Ro 10:21. pa lailing ti hu ka daux krax pa ang mhawm awm rhawm keud cao kix heue. 3 Ceu pui inkix so kaoh krax pa song rhawm Aux sijheeng ka see plakngai Aux, ka pa appong krax tan tix ka daux sipeem khankix mai pa gleeing nyawng bhawng khu dee tan lon tiex sin. 4 Pa ngawm ka daux sinax simeeig mai pa it ka daux tiag simeeig mai pa ih nex lig mai pa koe rawm rheep ceu pa seeing brai khankix ka daux aw tawng kix, 5 pa ah nin cung tix ot dee ot maix, paw hoek dex Aux, mawh kheu aux nie lheu singax khaing maix heue. Pui inkix mawh taox ngu pa kaoh khaing ka daux gawng meeh aux, mawh ngu pa cap leeing ngaix heue. 6 “Jhak heue, an mawh pa hoik tiem tix ka plak sivoe Aux, Aux tak ang lai ot yiien yawg Aux tak deeh viied mai deeh viied tom hoek ka piang naok kix, 7 teei krax pa lud yuh maix khankix mai krax pa lud yuh keeing maix khawmuik tau khawm pui pa hoik gleeing nyawng bhawng ka piang gawng khankix, Siyiex ah nan heue. Mawh kheu nan, Aux tak tiag kaing pa yuh kix glang ka an ka piang naok kix heue. 8 Siyiex ah nin, “Awm hoik yaox rawm plix siiet pa khraox ka daux sigleem plix siiet khankix mai pui tix kaux ah nin, ‘Paw yuh an laux! mawh kheu bwanson koe ka daux an heue.’ Mawh kheu nan, Aux tak sang yuh tix tawx an son ceu kaux siliex Aux, son ang Aux pon yuh kix laux leeing khawmuik heue. 9 Aux tak viex doeh ru khankix lih khaing ceu pui Yakop mai khaing ceu pui Yudax, pa mawh cub pa pon sinngao grawng Aux khankix heue. Kix pui pa hoik laug Aux tak sang pon tix cie sinngao an mai siliex Aux tak yaox ti ot tan heue. 10 Baoh haktiex Sharon tak sang mawh kawg cub phung yung mai daux lung AkhawRef 65:10 Yaw 7:24-26. tak mawh dee it mawie mai son pui Aux khankix pa hoik sawg ti yaox Aux heue. 11 Viang mawh nan, pex mawh pui an kix pa tik pa vud ka Siyiex, pa piawm ka gawng pa singax singeh Aux mai pa khan kheu ka siyiex Gadax mai cox khre krax tan pa nyaux son siyiex Menix heue. 12 Mawh kheu nan Aux tak simin ti ap pex ka lawm vaig mai pex khawmuik tak gum kaing tix kham krax pa pah heue. Grawh grawng nawh, yam hoik kok Aux, pex hoik ang tie pawk heue. Yam sikah Aux pex ang tie nghiet. Pex hoik yuh ceu pa caox ka plak sivoe ngai Aux mai hoik laug ti teei ka pa ang Aux khaw rhawm ka heue.” 13 Mawh kheu nan, Siyiex pa mawh Siyiex ah nin, jhak heue, siliex Aux khankix tak yaox ti ih, viang mawh nan, pex tak mawh pa cai rhawm heue. Jhak heue, siliex Aux khankix tak yaox ti nyaux rawm, viang mawh nan, pex tak mawh pa simie ti nyaux rawm heue. Jhak heue, siliex Aux khankix tak koe krax gaux rhawm viang mawh nan, pui tak mawh pa kaig tua heue. 14 Jhak heue, siliex Aux khankix tak ah lai rhax, kheu koe krax gaux rhawm ka daux rhawm kix viang mawh nan, pex tak yiiem kheu koe krax laux rhawm ka daux rhawm pex, ngia kheu koe krax pa laux rhawm daux khwan ju tix heue. 15 Pex tak prah ceu kaux pex, awm pa jhax lawg ka pui pa hoik laug Aux. Grawh grawng nawh, Siyiex, pa mawh Siyiex tak sang pah pex yum mai kok siliex Nawh khankix ka ceu kaux tang ceu heue. 16 Nawh pa rawg bwan sonsang pon cao tix bwanson ka piang haktiex, tak rawg bwan ka Siyiex pa mawh meh mai nawh pa koe krax tiextu ka piang haktiex, tak mawh pa tiextu tix ka Siyiex pa mawh meh heue. Grawh grawng nawh, krax kha rhawm glang ka an khankix, mawh pa hoik piawm tix mai an kix hoik mox khaing plakngai Aux heue.

17 Jhak heue, Aux phan raoma pa khraoxRef 65:17 Isa 66:22; 2Pe 3:13; Jhi 21:1. mai haktiex pa khraox, pa koe glang ka an, tak ang lai deeh doh keud ka mai daux rhawm tak ang lai keud ce kah heue. 18 Koe krax nyawm rhawm mai krax gaux rhawm leeing ju ka daux pa phan pa deuh Aux, jhak heue, Aux phan veng Yerusaliem mawh son krax pa gaux rhawm mai son pui pa ot daux nawh khankix heue. 19 Aux tak gaux rhawm ka veng Yerusaliem mai gaux rhawm ka pui Aux khankix heue. Lox yiiem tak ang lai mhong tix khaix in ka daux veng mai khawm lox pa riag yo heue.Ref 65:19 Jhi 21:4. 20 Kawn ngie peuex pa ang naog singaix tix, tak ang lai koe tan, pui kuad pa ang naog ju kawx tak ang lai koe heue. Grawh grawng nawh, pa yum yam koe ju tix tix yieh num, kawn sawn mawh kawn nyawm, pui phimap pa yum yam koe ju tix tix yieh num kawx, tak sawn mawh pa hoik kham krax pa jhax lawg tix heue. 21 Kix tak sum nyiex mai ot ka daux. Kix tak sum sipeem plix siiet khankix mai yaox ti ih plix heue. 22 Kix tak sum nyiex mai pui tang kaux tak ang yaox ti ot ka daux. Kix tak sum sipeem plix siiet mai pui tang kaux tak ang yaox ti ih, mawh kheu ju pui Aux khankix tak awm ju khraox mai pui laug Aux tak rheung koe krax pa nyawm rhawm ka kaing yuh taix tix khankix heue. 23 Kix tak ang yaox ti yuh kaing ka daux krax pa giex going mai tak ang yaox ti keh kawn nyawm ka daux krax pa kha rhawm heue. Grawh grawng nawh, kix tak mawh doeh ru pa hoik nawb Siyiex bwanson ka piang mai doeh kawn praix kix pa ot tau mai kix heue. 24 Ka sivoe sang kok kix, Aux hoik pawk lox kix mai yam tak sikah kix, Aux hoik nghiet kah heue. 25 Sox la mai kawn yung tak sawm tau, sivai sangsi tak ih rib awm mawie, phawng tiex tak mawh pa ih siuing heue. Kix tak ang koe krax mat yuh paox tix mai ang koe krax laux leeing ka piang gawng pa singax singeh Aux khawmuik,Ref 65:25 Isa 11:6-9. Siyiex ah nin heue.