63
1 Mawh in pui mawx pa kaoh khaing meung EdomRef 63:1-6 Isa 34:5-17; Ye 49:7-22; Yez 25:12-14; 35:1-15; Amo 1:11-12; Aw 1-14; Ma 1:2-5 mai pa hoek khaing veng Bawzarax pa ceep kraung pa mhawm grang pa hoik siang tix raoh pa ting sibrawm mai pa yaog diang dig tix ting lhaong, mawh pui mawx lie? “Mawh Aux, pa sikah ka daux krax pa rahsee mai pa koe sibrawm pa ting lhaong ti taoh heue.”
2 Mawh kheu patix maix lai ceep kraung pa raoh mai kraung ceep maix lai awm kraung ceep pui pa biiet ka rawm plix siiet, yuh ka mawh lie?
3 Aux hoik biiet rawm plix siiet nong nongRef 63:3 Jhi 14:20; 19:15. mai pui tix kaux kawx ang lai ot tau mai aux, khaing daux pui khankix heue. Grawh grawng nawh, Aux hoik biiet an kix ka daux krax pa song rhawm Aux, hoik dig an kix ka daux pa kied song rhawm Aux heue. Nham kix hoik phrit ti lih ka piang kraung ceep Aux mai hoik kawm yuh kraung ceep Aux khawm jung heue.Ref 63:3 Jhi 19:15
4 Mawh kheu singaix pa pawk bix koe ka daux rhawm Aux mai num pa deeh taoh Aux hoik hoek heue.
5 Aux hoik jhak ti yaox mai ang koe pui pa teem ka Aux mai Aux hoik daox deng ka ang koe pui pa joh jhan heue. Mawh kheu nan, plawng taix cao Aux hoik viex krax taoh hoek ka son aux mai krax pa song rhawm Aux hoik mawh pa joh jhan ka aux heue.Ref 63:5 Isa 59:16
6 Aux hoik dig pui ka daux krax pa song rhawm Aux mai hoik kieh kix yoek ka daux krax pa kied song rhawm Aux mai hoik klup nham kix ka piang tiex heue.
7 Aux tak sang krai grawng krax moh pa caux rhawm Siyiex mai khawm krax pa yaogyaw Siyiex, awm ceu pa hoik tawx Siyiex ka piang khawmuik mai bwanson pa ting lhaong pa tawx ka nyiex ma ceu pui Isarelax, ka pa hoik yaog Nawh Cao tix tawx ka piang kix awm koe krax caux rhawm Nawh Cao, awm pa kied ting koe krax moh pa caux rhawm Nawh Cao heue.
8 Nawh Cao ah nin, “Kix mawh pui Aux tete mai mawh kawn praix, pa ang pie lhen. Mawh kheu nan, Nawh Cao hoik mawh cao taoh kix heue.
9 Ka daux krax pa kha rhawm kix khawmuik, Nawh Cao hoik kha rhawm tix mai kawncau Siyiex pa ot plak sivoe Nawh, hoik taoh ka kix, ka daux krax moh Nawh Cao mai ka daux krax pa caux rhawm Nawh Cao, hoik deeh taoh kix mai Nawh Cao hoik kliien kix mai teei kix hu awm baux singaix pa prim khankix heue.
10 Viang mawh nan, kix hoik tieh feen mai hoik yuh krax pa laux rhawm khwan singax Nawh Cao, mawh kheu nan, Nawh Cao deeh tieh ti mawh pui koeng kix mai tokaux Nawh Cao puing ka kix heue.
11 Yam an nawh deeh doh keud baux singaix pa prim, ka ah Mose mai pui nawh khankix nin, “Nawh Cao pa hoik viex kix lih khaing rawm sigrit sigra, tau mai cao liang yung Nawh Cao, koe dee mawx lie? Nawh Cao pa sau ti deuh khwan singax Nawh, ka daux kix koe dee mawx lie?
12 Pa kieh min pakngai plawng taix Nawh Cao koe ka taix khawn dawm Mose, pa gwieh rawm ka plak sivoe ngai kix,Ref 63:12 Lih 14:21. sonsang yuh ceu kaux Cao Nawh koe leeing ju,
13 pa thung kix tiang ka dee raux, awm hu bhaung ka daux tiag, son ang kix sideeing koe dee mawx lie?
14 Awm tobrie pa lih hu ka daux ngawd daux lung mai khwan Siyiex kieh kix laux lee tix heue. Mawh kheu nan, Maix thung pui maix hu, sonsang yuh ceu kaux Cao Maix koe min pakngai heue.
15 Jhak ti yaox khaing daux raoma mai kok puan khaing dee pa singax singeh mai dee koe min pakngai Maix heue. Krax pa kied koe rhawm Maix mai krax pa ting sibrawm Maix, koe dee mawx lie? Krax pa kied moh Maix mai krax pa caux rhawm Maix ka aux koe dee mawx lie?
16 Viang Abraham ang koe krax pa tawng ka ex mai ceu pui Isarelax ang lai deuh ti tawng ka ex kawx, Siyiex eue, Maix mawh keeing ex heue. Cao pa taoh ti teei ex tom ju dix mawh ceu kaux Maix heue.
17 Siyiex eue, Maix hoik kieh ex via khaing daux krax Maix, hoik kiien yuh rhawm rhi ex khaing krax lhat graung ka Maix kheu jao grawng pa yuh ka mawx lie? Deeh ing son siliex Maix mai ka son ru pui pa pon sinngao Maix khankix heue.
18 Pui pa singax singeh Maix khankix hoik pon ti cie an kix tivud ticu khaing heue. Pui koeng ex hoik dig ka dee pa singax singeh Maix heue.
19 Ex hoik lih ti mawh pa awm pui an kix, pa ang Maix sax kwang mai ka pui an kix, pa ang sax kok ka ceu kaux Maix heue.