62
1 Son veng Zion, Aux tak ang lai ot yawg tix mai son veng Yerusaliem, Aux tak ang lai laux lee tix, tom sidah lih krax pa rahsee nawh awm krax pa jhan riang mai krax taoh Nawh tak mawh pa awm kawk ngu pa tok ti riang heue.
2 Ref 62:2 Jhi 2:17Ceu pui tang meung khankix tak yaox krax pa rahsee maix, mai simiang khawmuik tak yaox ka min pakngai maix heue. Maix tak pon kok ka ceu kaux pa khraox, pa sum Siyiex ka jheeh tix heue.
3 Maix tak baox mawh mhok khri, ka daux taix Siyiex mai mawh ciiem mhok khri pa mhawm grang ka daux tawm taix Siyiex maix heue.
4 Tak ang lai kok maix mawh pui pa tik vud tix khaix in mai haktiex pa riem maix tak ang lai mawh pa kok mawh dee riem khaix in. Viang mawh nan, tak kok maix mawh pui pa khaw rhawm Aux mai haktiex maix tak kok mawh haktiex bun pa koe mex. Grawh grawng nawh, Siyiex hoik khaw rhawm ka maix, haktiex maix tak mawh pa hoik koe mex heue.
5 Grawh grawng nawh, awm teei pui awn ju ti cie bunkrih, awm an kawn simex maix tak sang teei ti cie maix heue. awm koe krax gaux rhawm simex pa sang yuh ka paox ka bun pa sang yuh ka paox, awm an Siyiex maix tak koe krax gaux rhawm ka maix heue.
6 Veng Yerusaliem eue, Aux hoik deuh pui pau veng ka piang guh veng maix pa tak ang lai yiien yawg ti ku singaix. Can pui pa kok ka Siyiex, paw laux lee tix.
7 Paw kieh nawh laux lee tix tom hoek yam yuh Nawh Cao ti deuh ka veng Zion mai tom hoek yam kieh Nawh Cao veng Yerusaliem mawh pa yaog yaw ka piang haktiex heue.
8 Siyiex hoik tiextu ka taix khawn dawm tix mai ka plawng taix pa ting siawp Nawh Cao ah nin, “Aux tak ang lai tawx simie nghox khaix in sonsang mawh pa ih pui pa koeng maix, kawn simex pui tang ceu ang lai yaox ti nyaux ka rawm plix siiet pa khraox maix, ka pa hoik sau maix riang rao ti yuh heue.
9 Mawh ngie pui an kix pa hoik vawg ti deuh tak yaox ti ih mai yaog yaw ka Siyiex heue. Pui an kix pa hoik khrawm ti viex hoek tak yaox ti nyaux ka daux lawg plak daux dee singax singeh nyiex Aux heue.
10 Lih hu heue, lih hu khaing daux siviex, khre daux krax hu son pui khankix heue. Kheem ti sau tiex heue. Kheem tix sau tiex ka daux krax ting. Sut ti tik lon simaox yaog ti pak chix son pui khawmuik heue.
11 Jhak heue, Siyiex hoik krai pao tom hoek ka dee sidah sidu haktiex mai ah nin ka kawn bun veng Zion, cao taoh maix hoik hoek, jhak heue, totaix koe tau mai Nawh Cao mai krax pa deeh viex ti tawx koe ka plak sivoe Nawh Cao heue.Ref 62:11 Isa 40:10; Jhi 22:12.
12 Pui tak kok kix mawh pui pa singax singeh, pa hoik taoh Siyiex ti teei mai maix tak kok ti mawh veng pa hoik pon sawg pui mai veng pa ang tik vud tix heue.