1 Yum pui pa rahsee ang lai koe pui pa teei laig daux rhawm tix heue. Teei pui pa koe krax nab yam khankix tix luan, ang lai koe pui pa doh keud ka tix kaux kawx, teei pui pa rahsee tix luan, mawh sonsang luan khaing pa caox heue. 2 Kix tak sang yaox ti laig ka daux krax pa nhim ka daux krax pa rahsee hu cao kix heue. Kix tak tang laux lee tix ka dah dee it pui mawx pui an heue. 3 Viang mawh nan, pex pa mawh kawn simex kawn bun pa koe phi khankix, pex pa mawh kawn praix bun pa phit vao mai bun coh kaux tix khankix eue, “Hoek tin heue.” 4 Mawh nyiah pex ka pui mawx lie? Pex ang jheeh tix mai blex dak tix lih ka pui mawx lie? Ang pex mawh kawn pa lud, doeh kawn praix pie lhen lie? 5 Pex pa koe rhawm ka riang griang khankix pa koe greem khaox klai khankix, pa pah kawn nyawm ka daux ngawd daux lung mai ka greem daux doh rang khankix lie? 6 Pa koe daux lon somaox pa plang pa nyu daux ngawd khankix, mawh nyum ciex maix heue. Ceu an khankix mawh sinngao cie maix, ka piang an kix kawx maix hoik lhauk krax tan pa nyaux maix hoik tawx krax tan pa mawh krax tan phawng ngox ca im. Mawh tak sang pon gun pon yeung Aux ka kaing ceu inkix lie? 7 Ka piang gawng dee pa kied lhaong maix hoik deuh ku it tix ka, ka dee an maix hoik haok ti sang tan krax pa appong tix heue. 8 Ka plak khaix siviex mai ka rong khaox siviex mai hoik yuh ti deuh krax pa doh keud maix ka heue. Grawh grawng nawh maix hoik tieh khaing Aux mai hoik peeik kraung ceep maix ka pui tang kaux mai hoik haok yuh ka piang ku it maix va mai hoik yuh sijax mukheu tau mai kix. Maix hoik moh ka ku it kix, ka dee hoik yaox maix kakaong kix heue. 9 Maix viex bee kraix hu ka simiang mai baox naok ceu pa bhawng tom nie maix hoik ploi cao cau tix khankix hu dee singai mai hoik yeen tokaux ti tiiem tom hoek daux meung yum heue. 10 Maix hoik taug mao kheu singai krax maix, viang mawh nan maix ang tie ah nin, “Krax keud pot jun pot ang lai koe heue. “Maix hoik yaox ka deeh koe riang rao plawng taix tix, mawh kheu nan maix ang lai koe krax pa laux rhawm ka heue. 11 Maix lhat graung ka pui mawx? Khi rhwm kheu jao pui nawh, pa hoik pie lhen maix khankix mai ang lai koe krax pa doh keud ka Aux mai ang tie teei an laig ka daux rhawm tix, ang Aux mawh pa ot yawg tix ang nye ang nyux sonsang ang maix koe krax lhat graung ka lie? 12 Aux tak pao tix krai pa rahsee maix mai kaing jhaw pa yuh maix khankix, viang mawh nan, kix tak ang lai tawx krax pa koe bwanson ka maix heue. 13 Yam riag yo maix lox tix, kieh riang griang krub ceu pa khrawm maix khankix deeh taoh ti teei maix heue. Viang mawh nan, bhaung tak tah kix hu dee singai khawmuik mai bhawm phlu kix luan tix dom neh khawmuik heue. Viang mawh nan, nawh pa een rhawm tix ka daux Aux, tak pon ti cie haktiex mai tak pon ti cie gawng pa singax singeh Aux mawh sinngao tix heue.

14 Siyiex ah nin, “Baox naok daux tiex. Baox naok daux tiex. Khre daux krax, teei ceu pa sang sideeing caong lih khaing daux krax hu pui Aux khankix heue.” 15 Grawh grawng nawh, cao dee lhaong mai cao pa kied lhaong, pa koe leeing ju, pa ceu kaux mawh pa singax singeh, ah nin, “Aux ot ka dah dee lhaong mai dee pa singax, ot tau mai pui pa koe krax pa kied laux rhawm mai pa koe rhawm awn rhawm tiiem, sonsang kieh khwan pa koe krax pa awn rhawm khankix deeh im ju mai sonsang kieh rhawm pui pa laux rhawm khankix deeh im ju heue. 16 Grawh grawng nawh, Aux ang koe krax pa simah simiang leeing ju mai Aux ang koe krax pa song rhawm sijheeng heue. Grawh grawng nawh, lhat ju tak koe krax som nai ka plak sivoe Aux mai khawm khwan khankix, pa hoik phan hoik deuh Aux heue. 17 Kheu jao phimap phighram pa ghoeng rhawm nawh, Aux hoik song rhawm mai hoik tawx krax geu ka nawh heue. Aux mox pakngai tix mai hoik koe krax pa song rhawm mai nawh deeh tieh ti hu ka krax deeh plak khaix tix ka daux krax koe rhawm nawh heue.” 18 Aux hoik yaox krax yuh nawh khankix mai tak sang pai krax saux nawh moi, Aux tak sang baox thong ka nawh mai deeh tawx krax pa nyawm rhawm ka nawh mai ka pui khu rhawm nawh khankix, 19 “Aux phan ti deuh siyieb jheeh khankix, kieh bwanson krax pa nhim koe ka pui pa ot dee singai mai ka pui pa ot dee dex heue.Ref 57:19 Efe 2:17. “Siyiex ah nin, “Aux tak pai krax saux nawh moi heue.” 20 Mawh ngie pui pa caox caig pa awm puk pak rawm sigrit sigra, ang pon ti koe krax yawg yiien mai awm pa hoik tik rawm glaox mai nyhee nyhawk luan heue. 21 Siyiex aux ah nin, “Krax pa nhim ang lai koe son pa caox caig heue.”Ref 57:21 Isa 48:22