1 Siyiex ah nin, “Priex rien ka krax pa khaw caw mai yuh ceu pa rahsee heue. Grawh grawng nawh, bwanson krax taoh Aux hoik dex hoek mai krax pa rahsee Aux tak sang mawh pa jhi tix heue. 2 Bwanson koe ka pui yuh nin, ka kawn pui pa priex rien khaing krax pa koe lox salao ka singaix twah mai pa chix priex rien taix khaing krax yuh ceu pa caox khankix heue. 3 Paw kieh pui tang ceu, pa hoik rom tix mai Siyiex ah nin, “Siyiex hoik gwieh ti deuh aux, khaing pui Nawh khankix, paw kieh pui sieh ah nin, aux mawh khaox kroh tix gawng heue.” 4 Grawh grawng nawh, Siyiex ah nin, “Pui sieh pa priex rien ka singaix twah Aux khankix mai pa laug ti teei ceu pa kha rhawm Aux mai pa jhawp ti priex gumlox sijax mukheu Aux kaux cong, 5 Aux tak kieh kix ot daux nyiex Aux mai ka daux lawg Aux, koe krax pa doh keud mai ceu kaux pa nie lheu mhawm khaing pa koe kawn simex kawn bun khankix, Aux tak tawx ceu kaux leeing ju ka kix pa ang lai mawh pa tat ti tik heue. 6 Pui tang ceu pa hoik rom tix tau mai Siyiex sonsang yuh kaing jhaw Nawh mai sonsang moh ka ceu kaux pa priex rien khaing krax pa koe lox salao ka singaix twah mai pa jhawp ti priex gumlox sijax mukheu Aux kaux cong, 7 Aux tak viex kix hoek ka gawng pa singax Aux mai kieh kix koe krax gaux rhawm ka pa rawg bwan ka daux nyiex Aux. Krax tan pa gleeing kix mai krax tan pa appong kix khankix, tak mawh pa pon krax rieb ti teei ka piang khu dee tan Aux heue. Grawh grawng nawh, nyiex Aux tak kok mawh, nyiex dee rawg bwan son ceu pui khawmuik heue.Ref 56:7 Mat 21:13; Mak 11:17; Luk 19:46. 8 Siyiex pa mawh Siyiex, pa deeh kraix khrawm ceu pui Isarelax khankix pa hoik prung prang ti hu kudauh kudee, ah nin, “Aux tak baox khrawm ka pui tang ceu khankix, lheu khaing pui an kix pa hoik kraix khrawm ti hoek ka nawh heue.”

9 Pa mawh totiag daux tong kaung khankix eue mai pa mawh totiag khaing ka daux nong tiag khaox khawmuik eue, hoek sonsang kieh ti ih heue. 10 Pui pau ka nawh khankix mawh pa dug ngai, kix mawh pa ang koe krax tawng yung khawmuik, kix mawh sox pa aw khawmuik, pa ang pon raoh mai tawng ngie it tix mai noi tix mai krax gaing ngie heue. 11 Kix mawh sox khankix pa kied ghoeng ngie ka pa ih mai pa ang chix sak heue. Kix mawh cao liang yung khankix, pa ang pon ti koe krax tawng yung, kix khawmuik tang hu ngie ka daux krax hu cao tix, pui ku kaux tang sawg ngie krax pa sang pon tix bwanson tokaux cao tix heue. 12 Kix tix kaux ah nin, “Hoek heue, Aux tak sang viex rawm plix siiet hoek mai ex tak nyaux tom sak rawm plix pa khiien heue. Pasax tak awm daux in singaix mai tak nie lheu mawh pa kied gaux silao heue.”