1 Bun pa neh eue, ah lai rhax heue maix pa ang nyang sax keh kawn mai maix pa ang nyang sax yaox ti kham krax saux mai keh kawn eue, yo ti ah lai rhax mai kok yo lox tix lhaong heue. Grawh grawng nawh, bun pa ang koe mex nie lheu koe kawn praix khaing bun pa hoik koe mex.Ref 54:1 Ka 4:27. Siyiex ah nin heue. 2 Yuh dee ot nyiex gox maix vieh va mai nih man tie dee ot dee koe maix lih heue. Paw koe krax lhawk ka liak! Kieh maox maix baox lang mai kieh khaox maix kaux cong heue. 3 Grawh grawng nawh, maix tak nie baox yieh veng plak khawn dawm mai plak khawn gwiex mai doeh ru maix khankix, tak pon ti cie sinngao haktiex pui tang ceu khankix mai yuh veng pa hoik yiien an kix mawh dee ot pui heue. 4 “Paw koe krax khi rhawm heue. Mawh kheu maix tak ang hoek krax kaig tua mai ang pon ti mawh pa laux pakngai, mawh kheu maix tak ang lai mawh pa kham krax salao heue. Grawh grawng nawh maix tak piawm krax kaig tua yam awn ju maix mai tak ang lai koe krax keud ka lox salao yam mawh maix miexmai, khaix in pie tix bawg kawx heue. 5 Grawh grawng nawh, cao pa phan pa deuh maix mawh mex maix heue. Ceu kaux Nawh mawh Siyiex cao kru naing raoma mai cao pa taoh maix mawh Siyiex pa singax singeh ceu pui Isarelax heue. Nawh tak kok tix mawh Siyiex piang haktiex khawmuik khawm leeing heue. 6 Grawh grawng nawh, Siyiex hoik kok ka maix, awm bun hoik tik hoik vud mai pa hoik koe krax laux rhawm, awm moeng pa teei yam awn ju maix pa hoik tik tix. Siyiex maix ah nin heue.” 7 “Aux tik vud maix tivud ticu khaing, viang mawh nan, ka daux krax pa caux rhawm pa kied ting Aux tak sang khrawm maix hoek heue.” 8 Ka daux krax pa kied song rhawm song rhi, Aux mox plakngai khaing maix tivud ticu, viang mawh nan, ka daux krax moh krax rhawm leeing ju, Aux tak koe krax caux rhawm ka piang maix heue.” Siyiex, cao pa taoh maix ah nin heue. 9 “In mawh pa awm krax kheem rawm ju Noax ka Aux heue. Awm krax pa hoik tiextu Aux, krax kheem rawm ju Noax tak ang lai baox kheem ka piang haktiex khaix in heue. Ref 54:9 Jah 9:8-17. Awm hoik tiextu Aux, tak ang lai koe krax song rhawm ka maix mai ang lai ah ka maix heue. 10 Grawh grawng nawh gawng ting khankix tak gah tix mai gawng iak tak mawh pa yung yiang mai gah tix heue.” Viang mawh nan, krax moh krax rhawm Aux tak ang lai gah khaing maix mai gumlox sijax mukheu pa nhim Aux tak ang lai yung yiang mai gah tix. “Siyiex pa caux rhawm ka maix ah nin heue. 11 Maix pa mawh pa hoik kha rhawm tix mai pa hoik phlu bhaung ting mai pa ang nyang koe krax pa nyawm rhawm eue, jhak heue, Aux tak sang yuh ti deuh jaong simaox maix ka siang simaox pa toh riang mai yuh ti deuh num riah maix khankix ka siang simaox pa klai heue. 12 Aux tak yuh ka piang guh veng maix khankix ka siang simaox pa raoh mai siviex maix ka siang simaox yi mai guh veng maix khawmuik ka siang simaox pa laoh lie heue.Ref 54:11-12 Jhi 21:18-21. 13 Kawn praix maix tak mawh pa hoik gau Siyiex Ref 54:13 Yo 6:45.mai kawn praix maix tak pon krax nhim pa kied ting lhaong heue. 14 Maix tak mawh pa kaux cong ka daux krax pa rahsee maix tak mawh pa singai khaing krax pa yeen ya, grawh grawng nawh maix tak ang lai koe krax lhat graung mai singai khaing krax pa glhat, grawh grawng nawh, krax pa glhat tak ang lai hoek dex maix heue. 15 Kix tak sang deeh kraix khrawm tix, viang mawh nan, ang tie mawh kheu grawng Aux heue. Can pui pa kraix khrawm ti tieh feen ka maix tak deeh hoek tu tix ka Maix heue. 16 Jhak heue, Aux hoik phan ti deuh cao pa yuh kraung naing cao chix kaing rhiiem pa phlu suah ka daux ngu mai pa viex kraung shiao tix hoek son kaing yuh nawh heue. Aux hoik phan ti deuh cao pa yuh krax laux leeing son pa laux leeing heue. 17 Can kraung naing pa hoik yuh tix puing ka maix, tak ang lai koe krax pa chix shiao mai can dak pa hoik yaog ti tieh feen ka maix, ka daux yam pa prawng ca maix tak tat ti tawx krax ciyang ka an heue. In mawh sinngao pa pon siliex Siyiex mai krax pa rahsee kix mawh pa kaoh khaing Aux. Siyiex ah nin heue.