1 Balax grhup goh, Nebaw buk pot. Rieng krub kix hoik tang ka totiag mai mawie hoik tang piang totiag kieh mawh beeh cien ka piang totiag. 2 Hoik grhup goh mai buk pot tau, ang chix taoh ka beeh cien tix, tokaux nawh lih mawh pui pa giex laung. 3 Nyiex ma pui Yakop eue, can pui pa deuk khaing pui Isarelax, “Nghiet ka Aux, Aux hoik dawg klien pex tom yam jah pex ti keh mai hoik teem pex khaing daux vaig, 4 tom sidah yam kuad pex Aux mawh kaw an, Aux tak teem pex, tom paing hauk kaing pex, Aux mawh cao pa phan mai cao pa joh jhan, Aux tak teem mai kieh pex pon krax taoh.” 5 “Pex sang tiag Aux sidu mai pui mawx mai tiag Aux awm pui mawx mai tiag Aux ah awm paox tix.” 6 Kix teei khri khaing daux hau mau mai ciang mau ka jiang, kix vai cao chix yuh kaing mau khri mai yuh riang grang siyiex mai krub ka an. 7 Kix klawm an ka piang klip tix mai viex an deuh tix dah mai an cung tan ang chix gah khaing dee ot, pui mawx kok nawh kawx, an ang chix pawk mai ang chix taoh nawh khaing pa kha rhawm. 8 “Doh keud ka in, kieh pex tawng mawh cao tix simex mhaing, pex pa lud eue, keud ti yaox ka daux rhawm tix. 9 Doh keud ka pa hoik luan, pa hoik lih mawh tom yam jah dix, mawh kheu Aux mawh Siyiex mai ang lai koe tang kaux, Aux mawh Siyiex mai ang lai koe pui awm Aux. 10 Aux hoik jhi tom jah tom sidah mai hoik jhi can pa lih ti mawh tom didix mai ah nin krax keud Aux tak kaux cong mai Aux tak kieh kuceu grum naog awm alo tix. 11 Kok ka sim klang khaing plak lih singaix, ka pui pa sang cau Aux khaing haktiex dee singai, Aux hoik krai mai Aux tak yuh awm pa krai tix. Aux hoik but rhawm tix mai yuh an. 12 “Pex pa kiien rhawm pa singai khaing krax taoh eue, “Nghiet ka lox Aux. 13 Aux viex krax taoh hoek phao, ang lai singai, krax taoh Aux ang lai rheung lai koi, Aux tak deuh krax taoh ka piang Zion, son pui Isarelax, pa mawh min pakngai Aux heue.”