1 Siyiex ah nin ka pui groi Nawh Cao rawm bee ka piang, pa mawh simiang Kurux, pui pa giex Aux ka taix khawn dawm nawh, sonsang kieh simiang ku meung tiem sivoe ngai Nawh mai kieh maox rawd nyoi Simiang khankix bhaw mai kieh siviex khawm ra plak bhang sivoe ngai nawh mai ang nyeep siviex veng. 2 “Aux tak sang hu sivoe maix mai kieh gawng sidawm, aux tak kieh siviex tawng laux mai tat gawng rhiem dud baux mawx baux an. 3 Aux tak tawx sinngao pa faik ka maix mai kraung dee glip sonsang tawng ka Aux, Siyiex, Siyiex pui Isarelax pa kok maix ka daux ceu kaux Aux.” 4 Kheu yaox plakngai siliex Aux Yakop mai pui Isarelax pa hoik laug Aux, Aux hoik kok maix ka ceu kaux maix, Aux hoik sum ceu kaux maix, khawm ang maix tawng ka Aux. 5 Aux mawh Siyiex, lheu khaing Aux ang lai koe Siyiex tang kaux tang hak, Aux rawd nyoi maix, viang maix ang tawng ka Aux kawx. 6 Sonsang tawng pui jah khaing plak lih singaix tom hoek plak klip singaix, lheu khaing Aux ang lai koe Siyiex tang kaux tang hak, Aux mawh Siyiex maix ang lai koe tang kaux. 7 Aux phan pa riang mai yuh pa faik, Aux yuh ka pa nhim mai phan pa kha rhawm, Aux mawh Siyiex Cao pa phan ceu in khankix. 8 “Raoma khaing dee lhaong eue, kieh lhiex lih khaing dee long mai kieh piang raoma ploi pa rahsee lih, kieh haktiex baoh sonsang lih krax taoh, tau awm lih pa rahsee, Aux mawh Siyiex phan ka an. 9 Kieh krax kha rhawm koe ka pa lah cha ka cao pa phan nawh, nawh mawh ngie bliah aw tiex tix bliah khaing, khex chix ah glaox nin ka cao pa yuh tix, mawh kawn yuh maix patix lie?Ref 45:9 Ro 9:20. Phan ang mawh nan, khex chix ah ceu pa yuh maix nin, maix ang koe taix lie? 10 Kieh krax kha rhawm koe ka pui ah nin ka keeing tix, mawh kieh maix ceu patix lih lie? Phan ang mawh nan, pa ah nin ka miex tix, mawh keh maix ceu patix lie?” 11 Siyiex pa singax singeh pui Isarelax, cao pa phan ka Isarelax ah nin, “Maix chawk Aux ka ceu pa sang lih ti mawh, son grawng pa dex dawd mai kawn praix Aux mai tawm lox ka Aux grawng pa dex dawd ka kaing mai khaix taix Aux. 12 Aux hoik yuh haktiex mai hoik phan kawn pui pa ot ka piang an, plawng taix Aux hoik nih raoma mai Aux tawm lox ka can pa koe daux raoma. 13 Aux kieh nawh lih koe ka daux krax pa rahsee mai Aux tak kieh krax hu nawh see, nawh tak sang sum ka veng Aux mai kieh pui Aux pa giex laung lawd luan, pa ang lai teei ka ngawh jum mai ka totaix, Siyiex cao kru naing raoma ah nin. 14 Ref 45:14 1Kaw 14:25Siyiex ah nin sinngao khaing meung Ejiptux mai kraung lai geu meung Kushax mai lai geu pui Sebax pa ting lhaong kaux, tak hoek ka pex mai an tak mawh cie pex, kix tak hawt khaix pex, kix tak hoek ka daux pa phyaok tix ka maox ceng mai krub ka maix, kix tak khyox khaw tix ka maix ah nin Siyiex ot mai maix tete, lheu khaing Siyiex in, Siyiex tang kaux ang lai koe” 15 Siyiex pui Isarelax, pa mawh cao taoh eue, Maix mawh Siyiex tete, pa mox tokaux tix. 16 Can pa yuh riang grang khankix, kix tak pon krax kaig mai kix tak laux min pakngai tau. 17 Ref 45:17 Heb 5:9Pui Isarelax hoik lawd luan tau mai krax taoh Siyiex, leeing ju, pex tak ang lai kaig mai ang lai laux min pakngai, leeing ju. 18 Siyiex, pa phan raoma, Nawh Cao mawh Siyiex cao pa phan haktiex yuh ka an, Nawh Cao phan ka ceu an, Nawh Cao ang lai phan mawh pa giex going, Nawh Cao phan an kieh kawn pui ot ka ah nin, “Aux mawh Siyiex mai ang lai koe pui tang kaux.” 19 Aux ang tie mox tix sikah ka daux pa glip, ka tix dah dah ka piang haktiex pa faik, Aux ang tie ah nin ka doeh ru Yakop, sawg Aux ka daux pa giex going, Aux mawh Siyiex pa sikah pa rahsee, Aux krai pao kieh tawng ka pa mawh pa meh. 20 “Khrawm paox pex mai hoek, pa mawh pex pa hoik glawd khaing krax yum khaing pui tang ceu, pui pa teei ti viex riang rao khaox pa hoik saik kix, kix ang koe krax tawng yung mai rawg bwan ka siyiex pa ang tie chix taoh ka kix.” 21 Ref 45:21 Cau 15:18Krai mai viex grawng see maix hoek, kieh kix ra lai teei krax keud ka paox tix, mawh pui mawx pa hoik krai grawng in khaing tom yam jah, Ang hoik mawh Aux pa mawh Siyiex lie? Lheu khaing Aux ang lai koe siyiex tang kaux tang hak, Siyiex pa rahsee mai cao taoh, lheu khaing Aux ang lai koe pui tang kaux tang hak. 22 “Pex pa ot ku sidah haktiex eue, deeh hoek ka Aux pex tak pon krax taoh, mawh kheu Aux mawh Siyiex mai ang lai koe siyiex tang kaux. 23 Aux hoik tiextu ka cao tix, gumlox pa lih khaing jheeh Aux mawh pa rahsee mai ang lai deeh hoek, ngawng ku ngawng tak grux tix ka Aux, dak ku dak tak tiextu tix ka Aux.”Ref 45:23 Ro 14:11; Phip 2:10-11. 24 Pui ku kaux tak ah nin ka grawng Aux, mawh ngie pa rahsee mai riang rao pa koe ka daux Siyiex khaing, pui pa boh rhawm ka Nawh Cao hoek ka Nawh Cao mai tak hoek krax kaig tua. 25 Doeh ru pui Isarelax, tak hoek daux pa rahsee mai pa yaw rangdi ka daux Siyiex heue.