1 Yam mhong simiang Hezakix ka lox an, nawh riah ka kraung ceep tix mai lhop tokaux cao tix ka chee rhix mai hu laig ka daux nyiex bwan Siyiex. 2 Khaix an nawh ploi Eliyakim cao kwang ka nyiex haw mai Shebanax cao pa tiiem lai mai kuad song cub cao giex kaing li khankix pa lhop chee rhix hu ka cao jhai Isayax kawn simex Amok. 3 Kix ah nin ka nawh, “Hezakix ah nin in singaix mawh singaix pa kha rhawm pa kham krax pa sivied ti gau mai pa kham lox salao singaix pa awm hoek bawg yam sang keh kawn ngie, viang mawh nan, ang lai koe riang rao tix keh. 4 Kieh Siyiex pa mawh Siyiex maix mhong ka lox pa hoik krai Rabasakha, pui pa ploi cao simiang nawh, pa mawh simiang Asurix sonsang hoek ah lox salao ka Siyiex pa im ju pa mawh Siyiex maix mhong ka gumlox in mai tak sang deeh pawk tix ah ka, mawh kheu nan maix rawg bwan son pui pa kawn deuk khankix. 5 Yam hoek kawncau simiang Hezakix ka Isayax. 6 Isayax ah nin ka kix, “Ah nin ka cao simiang pex, Siyiex ah nin, paw lhat ka lox pa hoik mhong pex mai lox salao ah kawncau simiang Asurix ka Aux. 7 “Aux tak kieh rhawm tang ceu laig ka daux nawh mai nawh tak mhong lox satang mai deeh ing ka haktiex cao tix mai Aux tak kieh nawh yum ka vaig lawm ka daux haktiex cao nawh. 8 Rabasakha deeh ing mai yaox ka puing simiang Asurix veng Libana, kheu hoik mhong nawh lih simiang khaing veng Lakhisha. 9 Simiang mhong grawng krai pui Tiraka simiang Ietiopiya, “Sang hoek puing ka nawh. “Yam mhong nawh ka an mai ploi cao cau khankix hu ka Hezakix ah nin, 10 “Pex ah nin ka Hezakix simiang Yudax, ka pa ah nin, paw kieh Siyiex pa een pex rhawm tix pie lhen ka pex mai deeh ah nin, veng Yerusaliem tak ang ap tix ka daux taix simiang Asurix. 11 Jhak heue maix hoik mhong yuh simiang Asurix khankix haktiex an laux lak pak leeing, mawh pon taoh maix tokaux tix lie? 12 Mawh hoik taoh Siyiex pui haktiex an, ka pui an kix pa hoik yuh cub keeing aux nawh laux leeing, pa mawh pui Gawzan, pui Haran, pui Rezap mai pui Edim khankix pa koe ka veng Telasa lie? 13 Mawh koe simiang Hamat, simiang Apat, simiang Sepharaviem, khawm veng Hena, veng Iva khankix dee mawx lie?” 14 Hezakix pon lai khaing cao cau khankix mai phat ti yaox an mai Hezakix hu ka nyiex bwan Siyiex mai plak lai an plak sivoe Siyiex. 15 Hezakix rawg bwan ka Siyiex ah nin, 16 “Siyiex Cao kru naing raoma, Siyiex ceu pui Isarelax mai Siyiex pa ngawm ka piang riang Cherubin eue,Ref 37:16 Lih 25:22. Maix Cao mawh Siyiex ka piang meung haktiex inkix khawmuik tix kaux khaing, Maix Cao hoik phan raoma mai haktiex. 17 Siyiex eue, daong yhaok Maix Cao mai nghiet liak! Siyiex eue, blah ngai Maix Cao mai jhak liak mai nghiet lox Shenakherip pa ploi pui hoek ah lox salao ka Siyiex pa im ju. 18 Siyiex eue, simiang Asurix khankix hoik yuh ceu pui khankix mai haktiex kix laux leeing tete, 19 “hoik tik siyiex krub kix ka daux ngu, mawh kheu ang kix mawh siyiex mai mawh ngie kaing taix yuh pui ka khaox mai lon simaox, mawh kheu nan, kix tom yuh laux leeing. 20 “Mawh kheu nan, yam in Siyiex pa mawh Siyiex ex eue, taoh yix khaing tawm taix nawh liak, sonsang tawng meung haktiex ku meung ka mawh Maix Cao Siyiex, pa mawh Siyiex tix kaux khaing.” 21 Khaix an Isayax kawn simex Amok ploi pui hu ah nin ka Hezakix, “Siyiex pui Isarelax ah nin, mawh kheu hoik rawg maix bwan ka Aux, son grawng Shenakherip, simiang Asurix, 22 in mawh gumlox pa krai Siyiex grawng pa dex dawd nawh mai bunk rih Zion hoik nu nai ka maix, hoik nyiah sibriem ka maix. Kawn bun veng Yerusaliem hoik vud vied kaing tix ka plak khaix maix. 23 Mawh jhax lawg mai sibriem maix ka pui mawx lie? Mawh briah maix ka piang pui mawx mai blin maix ngai tix ka pui mawx? An kix maix hoik yuh ka Siyiex pa singax singeh pui Isarelax. 24 Maix hoik kieh kawncau tix, sibriem jhax lawg ka Siyiex ah nin, aux hoik viex ling lawx naing brung tix tom nie, haok ka gawng dee lhaong, tom hoek ka choek gawng Lebanon. Aux kid ti tik khaox Arit pa lhaong mai khaox gix pa kied mhawm nawh, Aux tak laig ka dah dee pa kied lhaong nawh mai ka daux nong pa kied haoh plix nawh. 25 Aux hoik kaong rawm daux mai nyaux rawm mai aux tak kieh tiag caong tix, kroh yuh rawm klawng Ejiptux khankix. 26 Ang maix sax mhong hoik khre aux ka ceu an tom didix, Aux hoik yuh ti deuh jah tom didix, tom hoek yam in ang mawh lie? Aux hoik kieh maix yieh veng pa kaux cong khankix laux leeing, lih mawh pum simaox pa laux leeing. 27 Pui veng an hoik iak riang, hoik kaig mai laux rhawm, kix hoik lih mawh awm khaox ka tong kaung mai awm rib klai awn kwah ka piang nyiex mai awm kawn nghox pa fit sivoe sang hwan. 28 Aux tawng ka dee ngawm maix mai dee lih hu mai dee laig maix mai pa song rhawm maix ka Aux. 29 Mawh kheu song rhawm maix ka Aux mai pa ting rhawm ca nyhau maix, hoik hoek ka daux yhaok Aux, mawh kheu nan Aux tak cieh meeh maix mai sau maox keu ka jheeh maix mai Aux deeh kieh maix ing ka krax hoek tix. 30 “In tak mawh mhai rug ka maix, daux num in pex tak ih khaing plix pa tang kwah mai daux num ra tak yaox ti ih awm an, daux num loe tak yaox tix rhuat simie mai vawg nghox mai yuh sipeem plix siiet mai ih ka plix an. 31 Pui Yudax pa glawd pa kawn deuk khankix tak kawn sau num riah tix tom plak greem mai plix ka plak piang, 32 pui pa kawn deuk tak lih khaing veng Yerusaliem mai pui pa glawd tak lih khaing gawng Zion, mawh kheu Siyiex cao kru naing raoma koe rhawm ti yuh in. 33 Mawh kheu nan, Siyiex ah nin ka grawng pa dex dawd mai simiang Asurix, nawh tak ang yaox ti laig ka daux veng in mai ang pon puing te tix taix kawx ka daux veng mai ang pon hoek sivoe veng an tau mai kraung pa tiebtie mai ang pon sang guh veng pa sang puing veng an. 34 Hoek nawh krax mawx nawh tak deeh ing krax an mai nawh tak ang pon laig ka daux veng Siyiex ah nin, 35 Aux tak tiebtie ka veng in kheu jhak Aux pakngai tix mai pakngai siliex Aux Davit. 36 Kawncau Siyiex lih hu mai pah pui pa ot ka daux tab pui Asurix tix sien daix mheen mai phwan rheng kaux mai yam yaog kix tix kaoh ponngawb caocao, jhak heue, kix yaox tokaux pui pa yum khankix. 37 Sanakherip simiang Asurix hoik lih hu mai ing ot ka veng Nineve. 38 Yam kawn rawg nawh bwan ka daux nyiex bwan Nisarot pa mawh siyiex nawh, kawn simex nawh Adrameliet mai Shareza mug nawh yum ka vaig mai kiex to ka haktiex Ararat. Kawn simex nawh, Esarahadon kwang haktiex tang nawh heue.