36
(2Sim 18:13-37; 2Been 32:1-19)
1 Ka daux num kwang simiang Hezakix ka haktiex kao pon num, Shenakherip simiang haktiex Asurix hoek puing ka veng pa kaux cong ka daux haktiex Yudax mai rhim ka an khankix.
2 Simiang Asurix ploi Rabasakha hu tau mai kru naing pa ting riang khaing veng Lakhisha ka simiang Hezakix pa ot ka Yerusaliem mai nawh cung hawt taoh rawm rawng khaing rawm dung plak laong, ka piang krax ting hu ka kaung pui pa sidaux kraung.
3 Eliyakim kawn simex Hilaki, cao kwang nyiex haw, khawm Shebanax, cao tiiem lai mai Yaw A, kawn simex Asapha cao tiiem lox bang kum hoek ka nawh.
4 Rabashaka ah nin ka kix, yam in pex hu ah nin ka Hezakix, simiang ting pa mawh simiang Asurix, mawh een maix rhawm tix ka patix?
5 Maix keud ti koe riang rao sonsang puing naing, viang mawh nan, an kix mawh lox pa giex going. Yam in maix een rhawm tix ka pui mawx, sonsang tieh feen ka aux lie?
6 Jhak heue, maix ca kawn een rhawm tix ka gawng priem pa hoik pot in, pa mawh meung Ejiptux, phan pui deuh rhawm tix ka nawh, an tak suat ti phlat ka taix nawh, awm an Pharaw simiang Ejiptux tak yuh pui an kix pa een rhawm tix ka nawh.
7 Phan maix ah nin ka aux, “Yix een rhawm tix ka daux Siyiex, pa mawh Siyiex yix, “Ang an mawh dee lhaong mai khu dee tan cie Siyiex an pa hoik yieh Hezakix kah mai ah nin ka pui Yudax mai ka pui Yerusaliem, pex tak krub sivoe khu dee tan in ang mawh lie?
8 Hoek heue, yuh mhai rug ka cao simiang aux, simiang Asurix mai aux tak tawx brung ra rheng mu ka maix, sonsang kub brung shiao maix.
9 Phan ang mawh nan maix khex dak sang pon yuh cao kaing naing pa kied iak, an tix kaux khaing ka daux cub kawncau cao simiang aux khankix mai pa een rhawm tix ka pui meung Ejiptux, ka ling lawx naing brung mai pui naing brung an khankix yuh ka mawx lie?
10 Mawh hoek aux ka daux ang tix pon akhwang pa tawx Siyiex ka haktiex in, sonsang yuh laux leeing yam in lie? Siyiex hoik ah nin ka aux, haok yuh haktiex an laux leeing.
11 Khaix an Eliyakim, Shebanax mai Yaw A ah nin ka Rabasakha, “Yuh bwanson sikah lox Aramix ka yix, kheu tawng yix lox an, sonsang mhong pui ot piang guh veng kah, paw krai lox Hebrie ka yix.
12 Rabasakha deeh ah nin, “Mawh hoik ploi cao simiang aux, ka aux, sonsang hoek tix ka cao simiang maix mai sonsang sikah tix lox an kix ka maix mai ang tie mawh ka pui pa ngawm ka piang guh veng, pa tak sang ih aing mai tak sang nyaux rawm neem cao kix tau mai maix lie?”
13 Khaix an Rabasakha yaog ti cung mai yo lox ting plak lox Hebrie ah nin, “Nghiet ka lox simiang ting, simiang Asurix.
14 Simiang ah nin, paw kieh Hezakix pie lhen ka pex. Mawh kheu nawh tak ang pon deeh taoh ka pex,
15 mai paw kieh Hezakix yuh pex een rhawm tix ka daux Siyiex awm pa ah nawh yuh nin, Siyiex tak sang deeh taoh ti teei ex tete, veng in tak ang doh tawx tix ka taix simiang Asurix.
16 Paw nghiet ka lox Hezakix mawh kheu simiang Asurix ah nin, yuh paox pie pa khaw caw tau mai aux mai hoek tu ka aux mai pex tak yaox ti ih khaing nhu plix siiet cao tix mai yaox ti ih khaing plix ruh cao tix mai yaox ti nyaux rawm khaing rawm dung cao tix.
17 Tom hoek bawg yam teei aux pex hu ka haktiex pa awm haktiex cao pex mai haktiex haoh nghox koi mai rawm plix siiet pa khraox mai haktiex haoh blah mai sipeem plix siiet khankix.
18 Rien rhawm tix lhat Hezakix nyaw glaw ah nin, “Siyiex tak deeh taoh ti teei ex. “Mawh sax taoh Siyiex ceu pui haktiex tang dah tix kaux kaux ka haktiex cao nawh, khaing daux tawm taix simiang Asurix lie?
19 Siyiex haktiex Hamat mai siyiex haktiex Arapat khankix koe dee mawx lie? Siyiex haktiex Sepharaviem koe dee mawx lie? Mawh hoik pon taoh kix ti teei veng Samarix khaing daux tawm taix aux lie?
20 Siyiex meung inkix mawh siyiex kaux mawx pa pon deeh taoh ti teei haktiex cao kix khaing daux tawm taix Aux, khex sang pon deeh taoh Siyiex veng Yerusaliem khaing daux tawm taix aux lie?”
21 Viang mawh nan, kix hoik yawg tix mai ang lai pawk lox nawh pie tix gum kawx, kheu jao hoik tawm simiang lox ka kix ah nin, paw pawk lox nawh.
22 Khaix an Eliyakim kawn simex Hilaki cao kwang ka nyiex haw mai Shebanax cao tiiem lai mai Yaw Ax kawn simex Asapha cao tiiem lox bang kum, riah kraung ceep tix mai hoek ka Hezakix mai krai nawh mhong lox pa hoik ah Rabasakha heue.