1 Jhak heue, simiang tix kaux tak kwang ka daux pa rahsee mai simiang greem nawh tak kwang mai krax rahsee, 2 tix kaux tak awm dee mox khaing bhaung mai dee tieb tix ka bhaung ting, awm rawm klawng ka dee kroh, awm veei rang ting ka haktiex pa taug pa mao. 3 Ngai pui pa yaox tak yaox sidawng mai yhaok pui pa nghiet tak mhong sidawng. 4 Rhawm pheem rhawm deux tak sidawng pingnya mai pui kle tak chix sikah sidawng. 5 Pui pheem tak ang lai kok mawh pui laoh lie mai pui siviien kawx tak ang lai kok mawh pui pa tawx pa taing. 6 Mawh kheu pui pheem tak sikah lox pheem mai rhawm nawh keud pa caox caig, sonsang yuh pa ang rahsee, sonsang ah lox pa lud ka Siyiex mai sonsang kieh pui cai rhawm nie lheu cai rhawm mai kieh pui pa sang nyaux nie rawm nie lheu sang nyaux rawm. 7 Kraung shiao pui pheem mawh pa caox, nawh keud ngie kaing pa caox, sonsang yuh pui hot laux leeing ka lox pie, viang lox sikah pui pa cud cha rahsee kawx. 8 Viang mawh nan, pui pa sibieh rhawm sawg ti yuh kaing sibieh rhawm mai cung sijung ka daux pa sibieh rhawm jheung jheung heue.

9 Bun pa ot vawd khankix eue, kaoh mai nghiet ka lox Aux, kawn bun pa ang tawng tix khi rhawm khankix eue, daong yhaok tix mai nghiet ka lox krai Aux. 10 Pex bun pa ang tawng tix khi rhawm khankix eue, khaix an tix num pex tak yaox krax khi rhawm. Mawh kheu sipeem plix siiet tak ang koe plix, bawg yam khrawm plix, plix tak ang lai hoek. 11 Bun pa ot vawd khankix eue, siduad kah heue. Pex pa ang tawng ti khi rhawm khankix eue, kieh khi rhawm heue, Peeik kraung tix mai ot ka kaong mai rawd nyoi tix ka man chee rhix. 12 Tub naok ti son ma kaung pa mhawm mai son nhu plix siiet pa hun plix. 13 Pang kat heeik mai pang kat lawm, tak lih koe ka haktiex pui Aux mai ka nyiex pa gaux rhawm mai ka veng pa hawt krax gaux rhawm. 14 Mawh kheu nyiex haw tak tik grham tix, veng pa khu pui kawx tak riem, grawng Awphelax mai nyiex tab lhaong, tak riem leeing ju mai mawh dee gaux rhawm la tiag mai mawh tiag rib ka son yung khankix. 15 Tom hoek bawg yam groi khwan singax khaing dee long ka piang ex mai daux tiag tu, dee lih mawh sipeem plix mai sipeem plix an, lih mawh nong khaox. 16 Khaix an pa rahsee tak koe ka daux tiagtu mai pa mawh meh ak koe ka sipeem plix khankix. 17 Bwanson pa mawh meh ak lih mawh pa nhim mai bwanson pa mawh meh ak mawh krax yiien yawg mai pa kaux cong leeing ju. 18 Pui Aux khankix tak yaox ti ot ka dah dee pa nhim mai ka dah dee lawd luan mai ka dee laux lee pa yiien yawg. 19 Lhiex pre lih yieh ka nong khaox mai yieh veng tau mai haktiex. 20 Kieh pui pa rhuat simie praok rawm mai pui ploi caong mawie caong la khankix lih hu koe bwanson heue.