1 Kieh pa kha rhawm koe ka veng Arelax pa mawh veng Yerusaliem mai ka veng Arelax pa mawh veng ot simiang Davit, kieh num hoik tix num gawp paox tix mai kieh pawie lai loh ti koe sijheeng. 2 Aux tak kieh veng Arelax khi rhawm, laux rhawm mai ngia ngheeik mai veng an tak awm veng Arelax sivoe ngai Aux. 3 Aux tak deuh tab hawt vung viang maix mai lai lawm maix ka guh tab. 4 Maix tak krai lox khaing dee raux haktiex mai lox ah maix tak lih khaing dee tiiem daux phawng tiex, lox maix tak lih khaing tiex, awm lox phi mai lox pa sup siep maix tak lih khaing daux phawng tiex. 5 Pui koeng Pa haoh hun maix, tak awm phawng tiex, pui pa lhat graung maix, tak awm kam pa tah hu sidah. an tak lih mawh dom mawx dom an. 6 Siyiex cao kru naing raoma, tak hoek fi ka maix khaing, sinum praix, khaing tuk kla reem, khaing bhaung ting lhiex ting mai bhaung keu kang lux mai khaing rao ngu pa koe krax laux leeing. 7 Pui hun meung haktiex tak puing ka veng Arelax, pui khawmuik pa puing ka nawh mai ka nyiex tap nawh, kieh nawh laux rhawm, an tak awm ca maox ka daux riang susai ponsawm; 8 Tak awm pui cai rhawm pa ca maox tix sawm, yam siduad, nawh kawn cai rhawm ang nyang sak, phan ang mawh nan awm pui sang nyaux rawm pa camaox ti nyaux rawm, yam siduad nawh kawn awn riang mai ghok nawh kawn kroh, pui hun piang haktiex pa puing ka gawng Zion tak awm an heue.

9 Kieh ot yawg mai kieh koe krax pa daox am, kieh tokaux tix dug mai lih mawh pui dug. Kix hoik yoek, viang mawh nan, ang mawh ka rawm plix siiet, kix hu tu tiex, viang mawh nan, ang mawh ka plai khien. 10 Mawh kheu Siyiex hoik sau khwan pa kied lhiak it ka pex mai hoik thox ngai pex pa mawh cao jhai khankix Ref 29:10 Ro 11:8.mai hoik tawb kaing pex pa mawh cao pa grux yaox. 11 Riieng susai pa yaox pex, awm gumlox pa hoik tawk cum ka mai tawx ka pui pa chix phat lai ah nin “Phat yaox ka lai in, “nawh ah nin, “Aux ang chix phat, mawh kheu koe cum ka. 12 Kix tawx phuk lai an ka pui ang chix phat ah nin, “Phat yaox ka lai in, “Nawh ah nin, aux ang chix lai.” 13 Siyiex ah nin, “Pui ceu in yungyi Aux ka siyieb jheeh tix, viang mawh nan, rhawm rhi kix singai khaing Aux Ref 29:13 Mat 15:8,9; Mak 7:6,7. mai kix krub ka Aux giex going, kheu nghiet kix lox been pa yuh kawn pui. 14 Mawh kheu nan, jhak heue, Aux tak baox yuh ceu pa kied daox kied am, ka sinax ceu pui in, pa mawh kaing pa kied ting lhaong mai pa daox am; pingnya pa koe pui pa koe pingnya tak grai tak grup mai krax pa tawng pa yung pa koe krax pa tawng pa yung pui tak tawb tak mox tix.”Ref 29:14 1Kaw 1:19. 15 Kieh krax kha rhawm koe ka pui pa keud pa raux pa mox mai pa keud ti yuh kaing dee glip khaing Siyiex mai kix ah nin, “Mawh pui mawx pa yaox ka ex mai mawh pui mawx pa tawng ka ex lie?” 16 Ref 29:16 Is 45.9; Ro 9:20Pex hoik deeh pluk pliak ti yuh kaing gah, khex keud pex cao yuh aw mawh tiex glaox lie? Kraung shiao pa hoik yuh tix khex chix deeh ah nin ka cao pa yuh nawh ang bax yuh ka aw, phan ang mawh nan, khex chix ah kraung pa hoik yuh ka cao pa yuh tix, nawh ang koe krax tawng lie?

17 Mawh ngie tivud khaing Lebanon tak tieh ti mawh tong kaung plix khaox mai tong kaung plix khaox deeh mawh tiag nong ang mawh lie? 18 Ref 29:18-19 Mt 11:5Singaix an, pui lheet tak mhong gumlox pa koe daux phuk lai in mai pui dug ngai tak chix yaox khaing pa pupi daux pa vhaik. 19 Pui pa awn rhawm tak koe krax gaux rhawm daux Siyiex mai pui hot tak gaux rhawm ka daux pa singax singeh Siyiex ceu pui Isarelax. 20 Mawh kheu pui pa lhat graung pui ka tak grai grup, pui pa jhax lawg hoik laux leeing mai pui pa jawm ti yuh pa caox tak tat ti tik kah. 21 Pui pa kieh see koe ka pui tang kaux kheu lox tix mai hoik taong ti deuh kie ka daux diang siviex, ka pui pa ang koe dee lud mai yuh pa ang mawh ka pui rahsee. 22 Mawh kheu nan, Siyiex pa hoik taoh Abraham ah nin ka grawng pa dex dawd mai nyiex ma Yakop “Yakop tak ang lai baox kaig tua mai ang lai baox laux pakngai. 23 Mawh kheu yam yaox nawh ka kawn praix tix, pa mawh kaing yuh Aux ka taix tix, ka sinax nawh, kix tak yungyi ka ceu kaux Aux mai nab yam ka pa singax singeh Siyiex pui Yakop mai lhat graung ka Siyiex pui Isarelax. 24 Pui pa lud daux khwan rhawm tak deeh doh, mai rhawm pui pa ngau tak rieb ka lox sidiex lox gau heue.