1 Kieh krax kha rhawm koe ka pui ceep mhok khri pa ting rhawm ca nyhau, pui Epharem pa pleeng tom yoek ka plai mai ka min pakngai mhawm grang pa fit awm pruh tai, pa ot ka choek gawng daux lung pa mawh pui pa chax nie luan yoek ka rawm plix siiet. 2 Jhak heue, Siyiex koe pui tix kaux pa ting riang mai pa ting siawp, awm bhaung ting lih pre, pa mawh bhaung ting pa yuh krax laux leeing, awm kheem rawm ting mai pa tak sang viex rau ka piang tiex ka plawng taix tix. 3 Pui ceep mhok khri pa ting rhawm ca nyhau pui Epharem pa pleeng tom yoek ka plai tak dig kix ka greem caong, 4 min pakngai mhawm grang pa fit awm pruh tai, pa ot choek gawng daux lung, awm plix ruh liang ti plix sivoe rung praix, yam yaox pui ka mai teei ti ih yam hoek ka daux taix nawh. 5 Ka daux singaix an Siyiex Cao kru naing raoma tak mawh mhok khri min pakngai mai mhok khri pa mhawm grang ka pui pa kawn deuk ka pui Nawh Cao, 6 Mawh khwan pa rahsee ka nawh cao ngawm ti prawng ca mai mawh riang rao ka pui pa pheet tix puing pui koeng tom hoek ka diang siviex. 7 Kix hoik lud kheu rawm plix siiet mai lud krax kheu plai khien, cao giex kaing li mai cao jhai khankix hoik pleeng tix ka rawm plix siiet mai hoik lud kheu plai khien mai hoik lud loe ka gumlox pa plak jhi kieh yaox mai kix sideeing ti goh ka krax prawng ca. 8 Peen sawm khankix hoik naog ka hao mai hoik seeing ku sidah. 9 Nawh tak gau ti tawx pingnya ka pui mawx, nawh tak sigrhah pui mawx tawng ka grawh grawng, mawh gau ka pui prah teeih mai ka pui pa teei khaing naok miex nawh lie? 10 Gumlox pingnyap baox ka piang gumlox pingnyap mai gumlox pingnyap ka piang gumlox pingnyap, tix grawng rhoi baox ka piang tix grawng rhoi mai grawng rhoi ka piang grawng rhoi tin ceeix mai tan ceeix. 11 Ref 28:11-12 1Kaw 14:21.Nawh Cao tak teei jheeh pui kle, dak pui pheem mai sidiex ka pui in khankix, 12 Ref 28:12 Mt 11:29.Nawh Cao ah nin ka kix, in mawh ceu pa laux lee tix, pa sang kieh pui pa taug pa mao laux lee tix mai in mawh pa nyawm rhawm, viang mawh nan kix ang lai nghiet kah.Ref 28:11-12 1Kaw 14:21. 13 Mawh kheu nan gumlox Siyiex hoik koe ka piang kix awm in, gumlox pingnyap baox ka piang gumlox pingnyap mai gumlox pingnyap ka piang gumlox pingnyap, grawng rhoi baox ka piang grawng rhoi mai grawng rhoi ka piang grawng rhoi, tin ceeix mai tan ceeix, yam hu kix goh dang riex, hoik pot, hoik krix daux kie mai pon giex kah. 14 Mawh kheu nan pex pa mawh pui ot ka veng Yerusaliem pa chix naknon ang koe ceu eue, nghiet ka gumlox Siyiex. 15 Mawh kheu pex hoik ah nin, yix hoik yuh sijax mukheu tau mai krax yum mai yuh paox pie tau mai meung yum, yam hoek kheem pa kha rhawm tak ang hoek ka yix, yix hoik een rhawm ka pie lhien mai hoik mox tix ka ceu pa giex going. 16 Mawh kheu nan Siyiex ah nin, “Jhak heue, Aux hoik deuh lon simaox ka piang gawng Zion son riah jaong num, pa mawh lon simaox pa hoik cheuk cheu ti yaox mai pa mawh riah jaong num ka daog pa kaux cong, simaox pa koe ngawh jum mai pa mawh kaing ka daog, can pui pa een rhawm ka lon simaox an tak ang lai nied ti ki.Ref 28:16 Ro 9:33; 10:11; 1Pe 2:6. 17 Aux tak yuh pa rahsee kieh mawh maox pa tiag mai yuh pa mawh meh kieh mawh kla maox pa tiag. Mu pre tak kieh pa caox caig laux leeing mai rawm tak kheem ka dee mox kix tix. 18 Sijax mukheu yuh pex tau mai krax yum, tak laux leeing mai pa khaw rhawm maix ti yuh paox pie tau mai meung yum, tak ang kaux cong, yam hoik luan krax kha rhawm an mai an tak dig ka pex. 19 Yam hoek an ku bawg, an tak teei pex hu, mawh kheu an tak hoek ku ngawb, ku singaix jheung jheung, yam hoik tawng ka an tak lih mawh ceu pa yaoh pa lhat. 20 Mawh kheu ngaing ku it, ang lai kub nyat tix kah, mai prux lhop kawx mawh pa sikhawp ang lai kub lhop tokaux tix kah. 21 Mawh kheu Siyiex tak yaog ti kaoh awm pa hoik lih mawh ka piang gawng Perazem,Ref 28:21 2Sa 5:20; 1Been 14:11. Nawh Cao tak song rhawm, awm pa hoik lih mawh ka daux lung Gibaong, Ref 28:21 Yaw 10:10-12.sonsang pon yuh Nawh Cao kaing jhaw tix, kaing jhaw Nawh Cao mawh pa daox am, sonsang pon yuh ka kaing jhaw Nawh Cao mawh pa daox deng ka. 22 Yam in paw yuh ti mawh pui pa ang koe cee koe cak, phan yuh nan, lhat krax mat krax lheut lang teung kin ka pex. Mawh kheu aux hoik mhong khaing Siyiex, pa mawh Siyiex cao kru naing raoma, tak yuh haktiex laux leeing khawmuik. 23 Daong yhaok tix mai nghiet ka lox aux, nghiet mai priex ka lox aux. 24 Pui thai kaung thai leeing singaix sonsang sum tix simie lie? Mawh toi nawh lon tiex ku jheeng lie? 25 Khaix hoik khre yuh nawh kaung an mhawm mhawm, mawh ang nawh rhuat simie taux ki mai simie taux kila mai sum simie nghox ca tia mawx tia an mai sum nghox ca lang sidax ka dee hoik cox khre tix mai sum sivawng ka hawt praok kaung ang mawh lie? 26 Mawh kheu hoik tawx Siyiex krax chix keud ka nawh mai Siyiex gau ka nawh. 27 Simie taux ki an ang lai dig tix ka phia mai simie taux kila ang lai kling tix ka ling lawx, mawh kheu nan, simie taux ki pah tix ka khaox puat mai simie taux kila pah ka gawng saux. 28 Nghox ca pa sang yuh blah, tak krid nawh phawng, viang mawh nan, ang lo ti dig sijheeng, viang krid an ka ling lawx brung tix kawx ang lai chix kie yuh nghox. 29 In kawx mawh pa kaoh khaing Siyiex cao kru naing raoma, pa daox am kah mai pingnya Nawh Cao ting lhaong heue.