1 Siyiex eue, Maix mawh Siyiex aux, aux tak sang yaog min bwan Maix, aux tak sang yaog yaw min ceu kaux Maix, kheu mawh Maix pa hoik yuh ceu pa daox am, krax keud krax sawn Maix tom yam jah dix ang tieh loh tix, mawh pa kaux sijax heue. 2 Maix hoik kieh veng mawh pum tiex tug, kieh veng pa kaux cong mawh pa laux leeing, kieh nyiex simiang pui haktiex tang dah khankix ang lai pon ti deeh mawh veng khaix in, an tak ang lai mawh pa deeh cox ti sum heue. 3 Mawh kheu nan ceu pui pa koe riang rao khankix, tak yaog yaw ka Maix, veng dee ot ceu pui pa koe krax lhat khankix, tak koe krax lhat graung ka Maix heue. 4 Grawh grawng nawh, Maix hoik mawh dee een rhawm son pui pa hot pa shia mai dee een rhawm ka son pui pa cud cha yam koe krax khi glawh, mawh dee mox yam phlu bhaung ting lhiex ting mai mawh veei pa tieb tie yam hax koek, grawh grawng nawh, krax pa song rhawm pui pa koe krax lhat graung ka khankix, mawh pa awm phlu bhaung ting lhiex ting ka ding heue. 5 Maix tak kieh lox sinum pui tang ceu khankix yiien hu awm pa hax koek ka dah dee pa kroh, awm grai paiawm ka hax koek, lox lai rhax pui pa koe krax lhat graung ka khankix, tak mawh pa grai hu heue. 6 Ka piang gawng in, Siyiex cao kru naing raoma tak sang yuh pawie khan kheu pa ih, ceu pa nyawm pa tie son pui khawmuik mai krax khan kheu pawie rawm plix siiet ceu pa prim khaing ceu pa kluing pa bee khankix pa naog ka gua bee si-ang mai khaing rawm plix siiet pa ciied tix mhawm mhawm khaing rawm plix siiet pa prim khankix heue. 7 Ka piang gawng in Nawh Cao tak sang yuh laux leeing ka ceu pa kheem ka pakngai pui khankix mai man tieb pa hoik lhop tix ka piang ceu pui khankix heue. 8 Nawh Cao tak sang bleet ti ih krax yum leeing ju Ref 25:8 1Kaw 15:54; Jhi 7:17; 21:4.mai Siyiex tak awt ti tik rawm ngai khaing pakngai pui khankix heue. Nawh Cao tak teei lox salao pa koe ka ceu pui Nawh Cao khankix hu khaing piang haktiex khawmuik heue.Ref 25:8 Jhi 7:17; 21:4. Grawh grawng nawh, Siyiex hoik ah ti deuh yuh nin heue. 9 Ka daux singaix an, kix tak sang ah nin jhak heue, in mawh Siyiex ex, pa krox jun ex, Nawh Cao tak sang taoh ex heue. In mawh Siyiex, pa krox jun ex, ex tak sang koe krax gaux rhawm ka daux bwanson krax pa taoh Nawh Cao heue. 10 Grawh grawng nawh Siyiex tak sang deuh taix tix ka piang gawng in mai Nawh Cao tak sang dig meung Mawbax Ref 25:10-12 Isa 15:1-16:14; Ye 48:1-47; Yez 25:8-11; Amo 2:1-3; Ze 2:8-11.ka greem tix awm dig brex nghox ka daux dung phon heue. 11 Nawh Cao tak nyeu taix tix ka daux sigreung kix, awm pui pa loe rawm tix kaux mai Nawh Cao tak yeen tiem ka krax pa ting rhawm ca nyau kix mai krax pa vao jhawm pa yuh kix ka taix tix heue. 12 Nyiex tab dee lhaong pa tieb tie guh veng pex khankix, Nawh Cao tak yieh laux mai rau nawh lih mawh pa tiiem mai viex nawh hoek ka piang tiex mai rau ti tik ka daux phawng tiex heue.