1 Jhak heue, Siyiex yuh haktiex mawh pa yi mai yuh an mawh dee pa riem mai pluk pliak ti tik pakpeung nawh mai prung prang pui pa ot ka daux nawh khankix heue. 2 Yam an pui khankix koe yuh ka mawx cao giex kaing li kawx koe yuh nan, mai siliex koe yuh ka mawx cao simiang kawx koe yuh nan, mai cao siliex bun koe yuh ka mawx miex cao nyiex kawx koe yuh nan, mai cao pa liag koe yuh ka mawx cao coh kawx koe yuh nan, mai cao pa tawx ceuk koe yuh ka mawx cao pa koe ceuk kawx koe yuh nan, mai cao pa tawx koe yuh ka mawx cao pa ih rao mau kawx koe yuh nan heue. 3 Haktiex tak mawh pa yi khawmuik mai pa hoik riem pak lawg, mawh kheu Siyiex hoik ah ti deuh gumlox in heue. 4 Meung haktiex koe krax khi rhawm mai grai hu heue. Haktiex koe krax iak riang mai grai hu heue. Ceu pui pa ting min pakngai ka piang haktiex khankix koe krax iak riang heue. 5 Meung haktiex hoik seeing brai greem pui pa ot ka piang nawh khankix heue. Mawh kheu hoik lheu kix ka gumlox beenli mai hoik tieh kix ka lox tat jhawm prawng mai hoik yieh ti tik gumlox sijax mukheu leeing ju heue. 6 Mawh kheu nan krax pa jhax lawg hoik bleet ti ih ka meung haktiex mai can pui an kix pa ot ka daux an hoik lih ti koe phimap mai ngu hoik gleeing pa ot ka piang haktiex mai pui pa kawn deuk an kix tak koe ceeix ngie heue. 7 Rawm plix siiet pa khraox koe krax khi rhawm, nhu plix siiet koe krax iak riang, can pui pa koe krax gaux rhawm khankix sang koe krax ngia ngheeik heue. 8 Lox ting plah khaox pa nyawm ti nghiet mai lox kraung kawx hoik yiien, lox sinum pui pa gaux rhawm kawx hoik sidah, lox gaux rhawm ting vawk kawx hoik yiien heue. 9 Kix tak ang lai yaox ti nyaux rawm plix siiet tau mai ah tix lai rhax, pui pa nyaux plai khiien khankix tak mawh pa song ka kix heue. 10 Veng pa hoik yi hoik riem mawh pa hoik yieh laux, nyiex ku nyiex mawh pa hoik nyeep tix, son ang pui tix kaux kawx lai pon ti laig ka daux heue. 11 Lox riag hawt krax kheu ang rawm plix siiet lai koe, krax gaux rhawm khankix khawmuik mawh pa hoik grai daux pa faik, lox nyawm rhawm meung haktiex mawh pa hoik yiien hu heue. 12 Ka daux veng hoik mawh pa yiien pa riem mai siviex veng mawh pa hoik tawk tix laux leeing heue. 13 Yam tak sang koe krax pa awm an ka daux sigreung haktiex daux sinax pui khankix, tak mawh awm pa vung viang ka khaox Sanlon mai awm plix siiet pa kawn deuk khaix pieh heue. 14 Kix yaog lox tix mai kix ah lai rhax, son min sibrawm krax kwang Siyiex, kix tak yo lox tix ting khaing plak rawm sigrit sigra heue. 15 Mawh kheu nan, yaog yaw min Siyiex ka plak lih singaix mai ka min ceu kaux Siyiex ceu pui Isarelax khankix ka hawt baoh praok haktiex rawm sigrit sigra khankix heue. 16 Kieh min pakngai koe ka cao pa rahsee, ex hoik mhong lox lai rhax khaing dee sidah haktiex ah nin, viang mawh nan, aux ah nin ka heue. Aux mawh pa hoik laux leeing mai hoik laux hoik leeing heue. Aux koe krax kha rhawm heue, pui pie lhien khankix yuh krax pie lhien mai pui pie lhien khankix yuh krax pa kied pie lhen heue. 17 Pui pa ot ka piang haktiex eue, krax lhat graung, prai pa taong daux tiex mai kie pa taong khankix, hoek ka maix heue. 18 Ka pui pa to khaing lox sinum krax pa lhat graung, tak rau ka daux tiex, mai pui pa deeh lih khaing daux tiex tak mawh pa krix ka daux kie heue. Mawh kheu daux siviex iak khankix khaing ka piang raoma hoik baoh mai num riah haktiex khankix hoik yung yiang heue. 19 Meung haktiex hoik bih hoik grhup, meung haktiex hoik bhieh hoik laux mai meung haktiex hoik yung yiang tix sigren sigre heue. 20 Haktiex tak sang goh jee goh blaong, awm pui pa yoek ka plai mai tak sang vuh vied jee blaong tix awm bang eue, krax pa lud nawh mawh pa cien ka piang nawh mai tak sang goh mai ang lai pon deeh kaoh heue. 21 Ka daux singaix an, Siyiex pa ot ka dee pa lhaong, tak ciyang ka pui pa ot dee lhaong, pa mawh pui pa ting lhaong khankix mai khawm ka simiang haktiex pa koe ka piang haktiex heue. 22 Kix tak sang mawh pa khrawm tix tau, awm hoik kraix khrawm pui pa laig daux thawng khankix ti ot ka daux tiex mai tak sang mawh pa laung tix ka daux thawng heue. Khaix hoik luan singaix an kix tom nie, kix tak sang mawh pa yaox tix chawk cheng heue. 23 Khaix an khix tak mawh pa laux pakngai mai singaix tak mawh pa koe krax kaig tua, mawh kheu Siyiex cao kru naing raoma tak kwang ka piang gawng Zion mai Nawh Cao tak koe min pakngai ka plak sivoe kuad song khankix ka daux veng Yerusaliem heue.