1 Gumlox pa plak jhi grawng meung EjiptuxRef 19:1-25 Ye 46:2-26; Yez 29:1-32:32., pa ah nin, jhak heue, Siyiex brug paiawm pa kied phai mai hoek ka daux meung Ejiptux heue. riang grang meung Ejiptux khankix tak lhat siyaung ka plak sivoe Nawh Cao mai rhawm rhi pui meung Ejiptux tak teh ka daux rhawm rhi kix heue. 2 Aux tak sang kieh pui Ejiptux deeh tieh feen ka paox pui Ejiptux khankix, puxaik deeh tieh feen ka puxaik mai pui ku kaux tak deeh tieh feen ka paox plawg tix, tix veng mai tix veng tix meung mai tix meung tak sang puing paox tix heue. 3 Rhawm rhi pui meung Ejiptux tak khrup ka daux nawh heue. Aux tak yuh krax keud krax sawn kix laux leeing mai kix tak chawk ka riang grang ankix mai cao pa sipawk khankix, cao pa laig phi mai ka pui koe phi pheux khankix heue. 4 Aux tak sang ap pui Ejiptux khankix ka daux tawm taix Simiang pa kied ting lang teung vao tix kaux mai simiang pa kied kin jhawm tix kaux tak kwang ka piang kix, Siyiex, pa mawh Siyiex cao kru naing raoma ah nin heue. 5 Rawm klawng Nilax tak hit uik mai rawm klawng khankix tak kroh hu heue. 6 Rawm klawng khankix tak tieh ti mawh pa cux sioe mai kawn kak rawm klawng Nilax daux Ejiptux khankix tak mawh pa ang lai koe tid tix mai pa hoik kroh hu, pang nhu oi mai pang priem tak fit kroh hu heue. 7 Rib riem pa kwah hawt rawm klawng Nilax mai pa kwah hawt dee sidah rawm klawng Nilax khankix mai can ceu pa hoik sum ti hawt klawng Nilax tak fit mai tak mawh pa phlu ti luan mai an tak ang lai koe pie tix bawg kawx heue. 8 Pui pa sawg kax kawx tak koe krax laux rhawm, pui pa miiet kax ka daux rawm klawng Nilax, tak koe krax ngia mai kix pa ploi rub ka piang rawm khankix, tak khrup rhawm heue. 9 Can pui pa yuh kaing shiah maox gan mai pui taing man mhawm tak mawh pa kaig tua, 10 num riah nawh khankix tak mawh pa hoik yieh ti laux, pui yuh kaing pa koe ngawh koe jum khankix, kix tak laux rhawm heue. 11 Simiang Zawna mawh pui pa yhot tete, pui koe pingnya cao tawx krax keud ka Pharaw mawh pa tawx krax keud pa vao heue, aux mawh pa koe pingnya, aux dawg mawh doeh simiang tom didix, kix chix ah nan ka Pharaw yuh ka mawx lie? 12 Mawh koe kix dee mawx lie? Pui pa koe pingnya maix khankix koe dee mawx lie? Kieh kix krai ka maix daux yam in mai kieh kix tawng ka ceu pa hoik keud Siyiex cao kru naing raoma ti tieh feen ka piang meung Ejiptux heue. 13 Siyiex Zawna hoik lih ti mawh pui pa yhot, simiang Nawpha kawx mawh pa hoik yaog ti kham pie lhien, kix hoik lud ka doeh ru pui Ejiptux khankix pa mawh cao pa kwang ka piang doeh kix heue. 14 Siyiex hoik saux rhawm pa sivix sivuan pa lud ka daux sigreung nawh mai kix hoik yuh meung Ejiptux koe krax lud loe ka daux kaing jhaw yuh nawh khawmuik, awm goh pui pa yoek ka plai ka piang hao tix heue. 15 Kaing mai sidax ang ah, pa mawh kak khaox jhie yaong ang ah mai pang priem ang ah, tak ang pon ti lih mawh tid tix son Ejiptux heue. 16 Ka daux singaix an, pui Ejiptux khankix tak mawh pa awm bun mai tak koe krax lhat graung kheu jao chuh khawn taix Siyiex cao kru naing raoma ka piang kix heue. 17 Haktiex Yudax mawh krax pa lhat meung Ejiptux kah heue. Pui ku kaux pa krai grawng an kix tak koe krax lhat graung ka daux tokaux cao nawh kheu jao krax pa keud pa sawn Siyiex cao kru naing raoma, ka pa hoik tat Nawh Cao ti deuh ka piang an heue.

18 Ka daux singaix an, veng pa koe ka daux meung Ejiptux phwan veng, tak sikah lox ceu pui Khanan mai koe krax pa tiextu ka Siyiex cao kru naing raoma, veng an tix veng tak kok mawh veng Singaix heue. 19 Ka daux singaix an ka daux sigreung meung Ejiptux, tak koe khu dee tan pa hoik yuh son Siyiex tix mu mai hawt mee haktiex nawh tak koe rong simaox lhak pa hoik sum son Siyiex tix mu heue. 20 An tak mawh mhai rug ka son Siyiex cao kru naing raoma ka daux meung Ejiptux heue. Grawh grawng nawh, kix tak kok ka Siyiex kheu jao kham kix krax pa tuktiak pui tix mai Nawh Cao tak ploi cao taoh hoek ka kix tix kaux mai cao pa kied ting riang ting rao mai Nawh Cao tak deeh taoh ka kix heue. 21 Khaix an pui meung Ejiptux tak mawh pa tawng ka Siyiex mai pui Ejiptux khankix kheu tawng ka Siyiex daux singaix an kix tak yuh krax tan pa appong mai krax pa krub heue. Kix tak yuh sijax mukheu ka Siyiex mai hawt ti yuh an heue. 22 Siyiex tak ciyang ka meung Ejiptux, Nawh Cao ciyang mai deeh pai moi heue. Kix tak deeh tieh ti hoek ka Siyiex mai Nawh Cao tak nghiet ka lox pa rawg kix bwan mai pai kix moi heue. 23 Ka daux singaix an, krax ting tak koe tix nyaing, jah khaing meung Ejiptux tom hoek ka meung Asurix mai pui Asurix khankix tak hoek ka daux meung Ejiptux mai pui Ejiptux khankix tak hoek ka daux meung Asurix mai pui Ejiptux khankix tak yuh kaing krub tau mai pui Asurix khankix heue. 24 Ka daux singaix an, ceu pui Isarelax nabat loe meung tix meung rom tix mai pui Ejiptux mai pui Asurix khankix, kix loe meung tak mawh pa rom ti pon bwanson ka piang haktiex heue. 25 Mawh pui pa sang nawb Siyiex cao kru naing raoma bwanson ka daux pa ah nin; “Ceu pui Aux Ejiptux mai ceu pui Asurix pa hoik cox khre Aux mai ceu pui Isarelax khankix pa mawh sinngao Aux kieh koe bwanson heue.