1 Yam sikah Epharem pui khankix koe krax lhat graung kah, nawh hoik yaog tokaux tix ting lhaong ka daux ceu pui Isarelax, viang mawh nan, nawh hoik lud ka yuh kaing jhaw siyiex Balax mai nawh hoik yum heue. 2 Yam in kix baox lud tix bawg hoik tix bawg mai hoik raug ti yuh riang grang ka mau khankix ka son tokaux kix, awm koe krax pa min yuh kix kaing khankix, an khawmuik mawh kaing yuh cao pa yuh kaing taix khaing heue. Koe pui pa ah nin ka kix, “Kieh pui khankix pa appong ti tan ngheet ka riang grang kawn mawie iak an heue. 3 Mawh kheu nan, kix tak sang awm paiawm ka daux plak ponngawb mai awm rawm ciex pa grai ti hu cao cao, awm nghox pa hoik phlu ti luan khaing biang glah dee pah nghox mai awm taox ngu pa haok khaing daux dawh rong ngu heue. 4 Aux mawh Siyiex, pa mawh Siyiex maix, tom yam kawn ot pex ka daux meung Ejiptux mai maix tak ang koe krax tawng Siyiex tang kaux lheu khaing Aux heue. Cao taoh ang lai koe pie tix kaux kawx lheu khaing Aux heue. 5 Aux hoik dawg tawng maix ka daux tiagtu,Ref 13:5 Pi 8:12-16. ka daux haktiex pa kied kroh kroing khankix heue. 6 Yam hoik tawx Aux pa ih ka kix, kix hoik ih tom sak heue. Kix hoik sak mai rhawm kix hoik yaog ti ting lhaong, mawh kheu nan, kix hoik piawm ka Aux heue. 7 Mawh kheu nan, Aux tak sang awm sivai sangsi ka son kix mai awm sivai simuing pa jawm ti ot hawt krax, Aux tak sang jawm ti pau kix heue. 8 Aux tak sang sipub ti yaox kix, awm krih miex pa hoik tang tiah tix khaing kawn nawh khankix, Aux tak sang riah ti tik dieb rhawm kix doh mai Aux tak sang kiied ti ih kix tan, awm sivai sangsi miex heue. Totiag tak sang riah kix laux heue. 9 Isarelax eue, krax pa teem maix mawh pa kaoh khaing Aux, viang mawh nan maix mawh pa hoik tang yuh tix laux leeing heue. 10 Maix hoik sax rawg mhaing ka Aux ah nin, “Tawx simiang mai simiang ka aux, yam in simiang maix koe dee mawx lie? Cao prawng see maix khankix koe dee mawx lie? Kieh nawh hoek ti taoh maix ka daux veng dee ot maix heue. Ref 13:10 1Sa 8:5-6.? 11 Aux hoik tawx simiang ka daux krax pa song rhawm tixRef 13:11 1Sa 10:17-24. mai hoik teei ti tik nawh ka daux pa kied song rhawm tix heue.Ref 13:11 1Sa 15:26. 12 Krax lud pa yuh Epharem, mawh pa hoik pua ti deuh, phimap nawh mawh pa hoik priex ti deuh heue. 13 Krax kha rhawm bun ka daux bawg yam keh nawh kawn tak hoek piang nawh heue. Nawh mawh kawn simex pa ang koe pingnya cuyi heue. Nawh tak yaox ti ot tom rheung, ka daux dee keh tix heue. 14 Aux tak sang taoh titeei kix khaing daux sibrawm meung yum, Aux tak sang taoh titeei kix khaing krax pa yum heue. Krax pa yum eue, Aux tak sang mawh pa pex ka maix, meung yum eue, Aux tak sang mawh pa laux yuh maix heue.Ref 13:14 1Kaw 15:55. Krax caux rhawm ang koe sivoe ngai Aux heue. 15 Viang nawh mawh pa koe plix tom nie ka daux sinax puxaik nawh khankix kawx, bhaung plak lih singaix tak sang hoek ti phlu, pa mawh bhaung Siyiex pa kaoh khaing plak daux tiagtu heue. Rawm keut nawh tak lih ti mawh pa hoik kroh mai taoh dee lih rawm nawh, tak sang mawh pa hit, pui koeng tak sang tud rhim teei kraung sinngao can pa khrawm nawh ti deuh kuceu heue. 16 Veng Samarix mawh pa tang klawm phimap tokaux tix, kheu hoik tieh feen nawh ka Siyiex Cao nawh heue. Kix tak goh ti yum ka vaig, kawn ngie kix tak sang mawh pa kham krax blat ti yum mai bun pa koe kaux kix khankix tak kham pa pih ti doh daux vaig heue.”