9
Pa Dex Haktiex Mai Raoma
1 Phan mawh sijax mukheu ka sivoe an tix mu, hoik koe been grawng pa krub mai hoik koe dee singax nawh pa dex mai haktiex in heue.
2 Grawh grawng nawh hoik cox yuh nyiex gox bwan man tix lhang, Ref 9:2 Lih 26:1-30. pa koe nyiex plak praix tix nyiex, pa kok mawh “Dee Singax,” dee koe jawk ten,Ref 8:2 Lih 25:31-40.pheen maiRef 8:2 Lih 25:23-30. blah pa tan heue.
3 Plak daux man kang ra mu tix mu, koe nyiex gox man pa kok mawh, “Dee Kied Singax Khaing Paox tix.”Ref 9:3 Lih 26:31-33.
4 Pa koe khu khri dee tok nyawng bhawng mai khui sijax mukheu pa hoik om ka khri khawmuik heue.Ref 9:4 Lih 30:1-6. Ka daux khui an koe aw khri tix mu,Ref 8:4 Lih 25:10-16. pa koe Mannax ka dauxRef 8:4 Lih 16:33., khaox gix Arun pa hoik tux tai Ref 8:4 Si 17:8-10., khlawp simaox sijax mukheu,Ref 8:4 Lih 25:16; Pi 10:3-5.
5 ka piang khui an koe Cherubim, pa dex mai min plakngai, pa tawb veei ka dang ngeung pa caux rhawm heue. Ref 9:5 Lih 25:18-22.Phan mawh grawh grawng ceu in khankix, ang ex pon ti krai tom grum tom sidah yam in heue.
6 Khaix hoik cox ceu in khankix yuh nin, cao giex kaing li khankix, ca laig ka daux nyiex gox plak praix tix nyiex ku jheung jheung ti yuh kaing krub heue.Ref 9:6 Si 18:2-6.
7 Phan mawh ka daux nyiex gox man ra nyiex tix nyiex, cao giex kaing li pa ting tix kaux khaing nong nong, laig ngie tix num tix bawg mai ang sax laig phan ang viex nham, pa tan nawh son tokaux tix mai son ceu pa lud pui tang kaux khankix heue.Ref 9:7 Krub 16:2-34.
8 Khuan Singax Singeh tom teei grawng an jhi kieh sidawng, grawng krax pa laig ka daux Dee Kied Singax ang nyang bax paoh yam kawn kaux kawn koe nyiex gox man plak praix heue.
9 In mawh riang lox tiag ka son bawg yam in awm pa khaw mai totaix mai ceu pa tan pa teei ti tan khankix, viang ceu an khankix ang chix kieh dee chix keud tawng pui pa krub Siyiex grum mhawm kah,
10 kheu khankix mawh ngie ka pa ih mai pa nyaux mai pa khoek pa heem tom nie ceu, pa mawh been nex nham pa hoik deuh tom sang hoek bawg yam yam sang cox yuh pa khraox khaing heue.
11 Cao Khrit hoik hoek ti mawh Cao Giex Kaing Li Pa Ting pa dex mai ceu pa mhawm pa tak sang hoek ti mawh khaix, ka daux nyiex gox bwan man pa nie lheu ting lheu grum mhawm, pa ang lai yuh ka taix, pa ah nan sang ah, pa ang dex mai ceu pa phan pa yuh ka haktiex in,
12 ang Nawh lai teei nham pex mai nham kawn mawie khankix, teei ka nham tokaux tix mai laig ka daux Dee Kied Singax, tix bawg khaing son ku jheung jheung, khaix hoik pon krax taoh leeing ju ka son ex heue.
13 Grawh grawng nawh phan nham pex mai nham mawie mhaing khankix Ref 9:13 Krub 16:15-16.mai nyaox mawie shiang, Ref 8:13 Si 19:9, 17-19.pa phruah ka kix pa hoik seeing brai, dee chix kieh nex nham kix singax kah,
14 nham Cao Khrit tokaux Nawh pa loig pa ang koe dee ne hoik tan ka Siyiex kheu Khuan Singax Singeh leeing ju, tak sang nie lheu kieh dee chix keud chix tawng pex singax khaing krax twah klaung pa dex mai krax yum, ti sang yuh kaing krub ka Siyiex pa im ju miex ding?
15 Mawh kheu jao in Nawh Cao tom mawh pui sinax ka sijax mukheu pa khraox, kheu hoik yum sonsang taoh ka ceu pa lud pa hoik ot ka greem sijax mukheu pa yuh ka sivoe an tix mu, son kix pa hoik kok ka khankix tak sang pon sin leeing ju, awm lox sijax mukheu heue.
16 Grawh grawng nawh dee koe lai alo grawng pa gwieh sin, tak sang koe mhai rug grawng pa hoik yum cao pa yuh lai an heue.
17 Grawh grawng nawh lai alo grawng pa gwieh sin, koe cue ngie khaix hoik yum cao pa yuh lai an khaing mai yam kawn klawd nawh ang sax koe bwanson heue.
18 Mawh kheu nan pie sijax mukheu pa hoik yuh ka sivoe an kawx, ang lai jah ti deuh ti kieh mawh ka pa ang lih nham heue.
19 Grawh grawng nawh khaix hoik krai Mose lox tawm ku gum ka pui khawmuik awm pa khaw mai lox lai beenli, nawh teei nham kawn mawie mai nham pex khankix, tau mai rawm mai hauk yung pa raoh mai khaox Hesop mai phruah ka phuk lai an mai ka khawm pui khawmuik,
20 Ah nin, “In mawh nham sijax mukheu pa hoik tawm Siyiex ti yuh tau mai pex heue.”Ref 9:19-20 Lih 24:6-8.
21 Lheu khaing an ka nyiex gox bwan man mai ka khawm kraung can pa shiao yam yuh kaing krub kawx, nawh teei nham mai phruah sau kah awm an heue.Ref 9:21 Krub 8:15.
22 Phan awm pa khaw mai lox lai beenli, dex kieh ku ceu khawmuik singax ka nham, phan ang mawh ka pa lih nham ang koe krax luan khaing phimap heue.Ref 9:22 Krub 17:11.
Khrit Viex Phimap Pui Hu
23 Mawh kheu nan ceu pa mawh pa hoik hawt jawh ti yuh ka ceu pa koe ka daux meung raoma khankix, tak lai kieh singax ka ceu inkix heue. Viang mawh nan ceu pa mawh pa koe ka daux meung raoma tete, tak lai kieh singax ka pa tan pa nie lheu mhawm khaing inkix heue.
24 Grawh grawng nawh Cao Khrit ang lai laig ka daux Dee Kied Singax Singeh, pa yuh ka taix, pa mawh riang grang Dee Kied Singax pa mawh meh an, viang mawh nan pon hoik laig ka daux raoma tete, sonsang plak jhi tokaux Nawh ka sivoe pakngai Siyiex ka son ex yam in heue.
25 Nawh Cao ang lai tan ka tokaux tix lawlawx, awm pa laig cao giex kaing li pa ting ka daux Dee Kied Singax tix num hoik tix num, ka pa viex nham pa ang mawh cie tokaux tix,
26 Phan raux mawh nan, jah ka yam kaw haktiex, tom sidah yam in, Nawh Cao tak hoik yaox ti kham geu lawlawx, yam in, yam mawh bawg yam sidah baux ju khankix, Nawh Cao hoik lih bleeh sonsang teei ti tik ka phimap, ka daux pa tan ka tokaux Nawh tix bawg khaing heue.
27 Awm pa hoik ciak ti kieh pui yum tix bawg mai khaix hoik yum tak sang yaox pa prawng pa ciyang,
28 Awm an Cao Khrit kawx hoik tan ka tokaux tix, tix bawg khaing, sonsang vieh phimap pui tom nie hu mai Nawh tak sang lih bleeh ra bawg tix bawg, ka pa tang tiah pa ang dex mai phimap, ka kix pa krox son Nawh Cao, sonsang taoh ka kix heue.