10
1 Grawh grawng nawh kheu lox lai beenli koe pang peue ceu pa mhawm pa tak sang hoek khaix khankix mai ang lai koe riang pakpeung ceu an khankix tete, pa ca tan ceu pa tan cao giex kaing li kix tix num hoik tix num jheung jheung, ang lai chix kieh kix pa greed hoek dex khankix grum mhawm kah heue.
2 Phan chix kieh grum mhawm, tak hoik naox ka pa tan khankix ang mawh lie? Mawh kheu phan hoik kieh pui pa yuh kaing krub khankix singax kah tix bawg khaing, dee chix keud chix tawng kix ang tau lai baox mhong koe phimap heue.
3 Ka daux pa tan an khankix koe ceu pa doh keud ka phimap tix num hoik tix num heue.
4 Grawh grawng nawh nham mawie mai nham pex khankix pon ang doh chix teei ti tik phimap heue.
5 Mawh kheu nan yam hoek Cao Khrit ka piang haktiex Nawh Cao ah nin, “Maix ang lai simie ka ceu pa tan viang mawh nan Maix hoik cox khre tokaux ka son Aux tix mu heue.
6 Ka daux ceu pa gleeing ti tan khawm kaux mai ceu pa tan son phimap, Maix ang khaw rhawm kah heue.
7 Khaix an Aux tom ah nin, Jhak heue, Aux hoik hoek ti sang yuh alo Maix, Siyiex eue”Ref 10:5-7 Yaog 40:6-8.
8 Awm pa hoik ah phao ka nux, “Ka ceu pa tan ka ceu pa gleeing ti tan khawm kaux mai ceu pa tan son phimap, Maix ang lai simie mai ang khaw rhawm kah heue.” Ceu an khankix mawh pa tan awm pa khaw mai lox lai beenli.
9 Khaix an Nawh Cao hoik ah nin, “Jhak heue, Aux hoik hoek ti sang yuh alo Maix heue.” Nawh Cao teei ti tik ka ceu pa koe ka sivoe an, sonsang kieh kaux cong ka ra ceu tix ceu heue.
10 Ka daux alo pa yuh nan, hoik kieh ex singax kheu pa teei ti tan tokaux Yesux Khrit tix bawg khaing son ku jheung jheung heue.
11 Cao giex kaing li ku kaux cung ku singaix, tix ngaix hoik tix ngaix yuh kaing krub mai tan ka ceu pa tan pa awm paox tix law lawx, pa ang tau ti chix teei ti tik ka phimap tix bawg kawx heue.Ref 10:11 Lih 29:38.
12 Khaix hoik tan Nawh Cao ka pa tan tix mu khaing, son phimap ka son leeing ju, hoik ngawm ka plak taix khawn dawm Siyiex heue.
13 Ca krox jun tom sang kieh pui pa koeng ka Nawh, mawh ngot dee deuh caong Nawh heue.Ref 10:12-13 Yaog 110:1.
14 Grawh grawng nawh ka pa tan tix bawg khaing, Nawh Cao hoik kieh grum mhawm leeing ju ka kix, pa yuh ti kieh singax khankix heue.
15 Khawm Khuan Singax Singeh kawx kham mhai rug ka ex, kheu khaix hoik ah Nawh nin,
16 “In mawh sijax mukheu pa tak sang yuh Aux tau mai kix, khaix singaix an khankix, Simiang ah.Aux tak sang sau lox lai beenli cie Aux ka piang rhawm rhi kix mai Aux tak sang tiiem khankix khawm ka dee chix keud kix heue.”Ref 10:16 Ye 31:33.
17 Nawh baox ah nin, “ Aux tak ang baox lai doh keud ka phimap mai ka jhawm pa lud kix heue.”Ref 10:17 Ye 31:34.
18 Dee koe ceu pa luan khaing phimap khankix, ang lai baox tan ka son phimap heue.
Kieh Ex Greed Hoek Dex Siyiex
19 Mawh kheu nan, puxaik khankix eue, kheu koe ex rhawm kwa ti pon laig ka daux Dee Kied Singax, kheu nham Yesux,
20 Ka krax pa khraox pa im, pa hoik paoh Nawh ka son ex, phlat ka man kang, pa ah nan, sang ah ka tokaux Nawh,
21 kheu koe cao giex kaing li pa ting piang nyiex Siyiex,
22 Kieh ex viex rhawm pa mawh meh ka daux pa naog ka krax yum rhawm mai greed dex khaix hoik phruah rhawm rhi ex Ref 10:22 Krub 8:30; Yez 36:25. khaing dee chix tawng pa mhong koe pa caox caig mai khaix hoik sigrhah tokaux ex ka rawm pa singax heue.Ref 8:22 Krub 8:6.
23 Kieh ex giex tom cong ka krax keud pot jun pot pa hoik rieb ex ti teei, son ang lai yung yiang kah, grawh grawng nawh Kaw pa tawx lox sijax mukheu mawh pa kaux sijax heue.
24 Kieh ex keud grawng paox tix, tix kaux lai tix kaux, sonsang kieh koe krax moh mai krax twah klaung pa mhawm.
25 Paw vi yuh ti tik ka pa khrawm ex paox tix, awm koe been pui tix blah, gau ka paox tix mai nie lheu baox yuh nan yam yaox pex dex hoek singaix an heue.
26 Grawh grawng nawh khaix hoik grum tawng ex ka pa mawh meh, phan ex baox ca nieb lak yuh phimap, ang baox lai koe ceu pa tan son phimap,
27 tak koe pa keud pot ce pot ceu pa lhat graung, grawng pa sang pon krax prawng mai pa song rhawm ngu pa tak sang gleeing ka kix pa koeng pa tieb tie khankix heue. Ref 10:27 Isa 26:11.
28 Pui pa hoik nieb een ti ang koe cue ka lox lai beenli Mose, phan koe cao pa kham mhai rug ra loe kaux, ang lai koe krax caux rhawm mai teei yum kah heue.Ref 10:28 Pi 17:6; 19:15.
29 Kaw pa hoik dig ka Kawn Siyiex ka greem caong nawh mai hoik een nham sijax mukheu pa hoik kieh nawh singax singeh,Ref 10:29 Lih 24:8. mawh ceu pa ang singax mai hoik nieb yuh pa ang cee ang cak ka bwanson Khuan Cao, pex ce nawh mawh pa keung ti pon krax ciyang pa nie lheu lang teung nu miex ding?
30 Grawh grawng nawh ex tawng ka Kaw pa hoik ah nin, “Pa pawk bix mawh cie Aux heue, Aux tak sang deeh viied kah”Ref 10:30 Pi 32:35.
baox ah nin, “Simiang tak sang prawng sang ca ka pui cie Nawh heue.”Ref 10:30 Pi 32:35.
31 Pa rau tix laig ka daux tawm taix Siyiex pa im ju, mawh ceu pa kied lhat kied graung heue.
32 Doh keud ka singaix glang ka sivoe in khankix, khaix hoik pon pex pa riang, grawng pa hoik yaox pex ti kham ceu pa lah paox tix pa ting ka krax kham geu heue.
33 Bawg blah hoik mawh kheu pa yuh ti kieh pex mawh pa nieb jhak pui kah, kheu pa yuh ceu pa ang cee ang cak mai khawm pa tuktiak mai bawg blah kheu pa rom ti neuex mai kix pa yuh pui nan kah heue.
34 Grawh grawng nawh pex hoik caux rhawm ka kix pa hoik phyawk laung mai hoik gaux rhawm ti rieb ti teei ka ceu pa tud rhim ti teei kraung khrai pex, kheu hoik tawng pex grawng koe kraung ceu pa nie lheu mhawm son tokaux pex tix ceu pa tak kaux cong jheung jheung heue.
35 Mawh kheu nan paw tik ka ceu pa viex pex rhawm kwa, mawh ceu pa kieh pon bwanson pa ting heue.
36 Grawh grawng nawh pex lo ceu pa gun pa yeung, khaix hoik yuh alo Siyiex, pex tak sang pon awm lox sijax mukheu an heue.
37 “Grawh grawng nawh, khaix in deuk bawg yam ceeix ceeix ngie, Kaw pa sang hoek, tak hoek mai tak ang gla heue.
38 Kaw pa rahsee cie Aux tak sang im kheu krax yum rhawm, phan Nawh deeh yawn tix, ju Aux tak ang khaw rhawm ka daux Nawh heue.”Ref 10:37-38 Ha 2:3-4.
39 Ex ang neuex ka daux kix pa sang hoek ka krax laux leeing, viang mawh nan ex neuex tix ka daux kix pa koe krax yum rhawm tom pon ex ti hoek krax taoh ju heue.