4
Cao Giex Kaing Li Pa Ting
1 Mawh kheu nan kieh ex lhat graung ka, viang hoik deuh lox mukheu grawng sang pon ti laig ka daux dee laux dee lee Nawh Cao kawx, ha pex tix kaux kaux kox ang pon hoek kah heue.
2 Grawh grawng nawh hoik sidiex lox bwan gaux rhawm ka ex tete, awm pa hoik sidiex ka khawm kix heue. Lox pa mhong an, ang lai koe bwanson ka kix, mawh kheu ang krax yum rhawm kix lai kleuk ka kix pa nghiet khankix heue.
3 Grawh grawng nawh ex pa hoik yum rhawm khankix pon ti laig ka daux dee laux dee lee an,Ref 4:3 Yaog 95:11. awm hoik ah Nawh Cao nin, “Aux song rhawm mai tiextu ti ah nin, Kix tak ang pon laig ka daux dee laux lee Aux heue.”
Viang hoik yuh kaing Nawh Cao khankix tom hoik, tom yam jah ti kaw haktiex dix heue.
4 Grawh grawng nawh Nawh Cao hoik ah nin ti dah grawh grawng singaix aliah, “ Siyiex hoik laux lee ka daux singaix aliah, khaing kaing pa yuh tix khawmuik heue.”Ref 4:4 Jah 2:2.
5 Hoik baox deeh ah nin, “Kix tak ang pon ti laig ka daux dee laux dee lee Aux heue.”Ref 4:5 Yaog 95:11.
6 Mawh kheu nan, kheu hoik yaox grawng tix blah tak sang pon ti laig ka daux dee laux dee lee an mai kheu kix pa hoik mhong pa sidiex lox bwan gaux rhawm ka kix glang ka sivoe in ang lai pon ti laig kah, kheu pa lieh lox mai pa ang cu nghiet,
7 Nawh Cao hoik ciak ti deuh tix ngaix ah nin, “Singaix” ka jheeh Davit khaix jih jang glang gleeing, “Phan pex mhong lox Nawh Cao singaix, paw kieh rhawm rhi pex kiien kah,”Ref 4:7 Yaog 95:7-8.
8 grawh grawng nawh phan Yawsux hoik tawx pa laux lee ka kix,Ref 4:8 Pi 31:7; Yaw 22:4. nawh ang tau ti krai grawh grawng tang singaix phao khaix heue.
9 Mawh kheu nan kawn koe pa laux lee singaix twah son pui Siyiex khankix heue.”
10 Grawh grawng nawh Kaw pa hoik laig ka daux pa laux pa lee tix, tokaux Nawh kawx hoik laux lee khaing kaing pa yuh tix, awm Siyiex kawx hoik laux lee khaing kaing pa yuh Nawh heue.Ref 4:10 Jah 2:2.
11 Mawh kheu nan kieh ex nied ti coca son sang pon ti laig ka dee laux lee an, son ang pui tix kaux kawx sang hawt hu ka pa awm riang lox tiag pa lieh lox pa ang cu nghiet an heue.
12 Grawh grawng nawh gumlox Siyiex mawh pa im mai pa ca yuh mai nie lheu lawm khaing vaid pa lawm khawm ra plak, kre pa yuh ka mawx ang ah mai suat laig tom kieh ju mai khuan gwieh paox tix mai laig khawm ka sinax jhong mai daux gua mai tawng ka pa bak keud daux rhawm rhi heue.
13 Ceu pa hoik phan hoik deuh ang koe tix ceu kawx pa ang sidawng ka Nawh Cao, ku ceu khawmuik mawh pa kakaong mai pa hoik paoh ka sivoe ngai Nawh Cao, pa mawh Cao pa sang prawng ca ka ex heue.
14 Kheu ex koe cao giex kaing li pa ting pa hoik laig ka daux meung raoma, pa mawh Yesux kawn Siyiex, kieh ex giex tom kaux ka ceu pa hoik rieb ex ti teei heue.
15 Grawh grawng nawh ex ang koe cao giex kaing li pa ting pa ang chix caux rhawm ka ceu pa iak riang ex khankix, ex koe Kaw pa hoik sax yaox ti kham krax nyaw glaw ka can ku ceu ku blawng khawmuik, Nawh ang yuh phimap heue.
16 Mawh kheu nan kieh ex viex rhawm kwa tix greed hoek ka dang ngeung bwanson, sonsang pon ex krax caux rhawm mai pon ti yaox bwanson pa teem, ka daux bawg yam pa lo ex khankix heue.