3
Yesux Ting Khaing Mose
1 Mawh kheu nan, puxaik pa singax, pa mawh pa rom ti pon ka pa kok pa dex mai raoma khankix eue, keud ti yaox ka grawh grawng Kawncau Pa Ting mai Cao Giex Kaing Li Pa Ting, pa hoik rieb ex ti teei pa mawh Yesux,
2 pa kaux sijax ka Kaw pa hoik ciak ti deuh Nawh, awm Mose kawx hoik kaux sijax ka nyiex Siyiex khawm nyiex heue.Ref 3:2 Si 12:7.
3 Grawh grawng nawh hoik een Nawh mawh pa keung ti nie lheu pon min pakngai khaing Mose, awm kaw pa sum nyiex nie lheu koe min pakngai khaing nyiex an heue.
4 Grawh grawng nawh nyiex ku nyiex mawh pa hoik sum pui tix kaux kaux, viang mawh nan Kaw pa hoik sum yuh ku ceu khawmuik mawh Siyiex heue.
5 Mose hoik kaux sijax ka nyiex Siyiex khawm nyiex, awm kawncau, son sang mawh mhai rug ka grawng ceu pa tak sang krai khaix khankix heue.
6 Cao Khrit kia ka piang nyiex Siyiex, awm kawn simex, phan ex ca giex tom kaux ka pa kwa ex mai ka ceu pa yaw rangdi ex pa dex mai krax keud pot jun pot ex, tom sidah, ex tom mawh nyiex Nawh heue.
Grawng Pa Laux Son Pui Siyiex
7 Mawh kheu nan awm pa hoik ah Khuan Singax yuh nin, “Phan pex mhong lox Nawh Cao singaix,
8 paw kieh rhawm rhi pex kiien kah, awm ka daux bawg yam pa cheeik ti kieh chu rhawm an, ka daux singaix pa nyaw glaw ka daux tiag,
9 Ka dee hoik nyaw glaw tax du pex ti cheuk yaox Aux mai hoik yaox kaing pa yuh Aux khankix been tixpon num heue.
10 Mawh kheu nan Aux tom ang caw rhawm ka pui ju in ah nin, “Kix lud ka daux rhawm rhi kix ku jheung jheung mai ang kix tawng ka krax Aux khankix heue.
11 Mawh kheu nan Aux song rhawm songrhi mai tiextu ti ah nin, Kix tak ang pon laig ka daux dee laux dee lee Aux heue.” Ref 3:7-11 Yaog 95:7-11.
12 Puxaik khankix eue, rien rhawm tix, phan ang mawh nan ha pex tix kaux kaux kox koe rhawm pa caox pa ang yum rhawm, pa gwieh hu khaing Siyiex pa im ju heue.
13 Tix kaux lai tix kaux gau ka paox tix, tix ngaix hoik tix ngaix, glang yam kawn kok mawh singaix in, ha pex tix kaux kaux kox kiien rhawm rhi kheu pa chix pie lhen phimap heue.
14 Grawh grawng nawh ex hoik rom ti lih mawh paox pie ka Cao Khrit, phan ex giex tom kaux tom sidah, ka pa hoik yum rhawm ti deuh rhawm ex yam jah heue.
15 Kheu ca kawn ah nin, “Phan pex mhong lox Nawh Cao singaix, paw kieh rhawm rhi pex kiien kah, awm ka daux bawg yam pa cheeik ti kieh chu rhawm an. ”Ref 3:15 Yaog 95:7-8.
16 Grawh grawng nawh kix pa hoik mhong mai kawn baox cheeik ti kieh rhawm Nawh chu mawh mawx? Can kix pa hoik lih hoek khaing meung Ejiptux kheu pa thong Mose hoik yuh nan ang mawh lie?
17 Kix pa ang Nawh caw rhawm ka been tixpon num mawh mawx? Mawh ka kix pa hoik yuh phimap mai pa tokaux kix hoik goh ti yum ka daux tiagtu ang mawh lie?
18 Nawh Cao hoik tiextu grawh grawng kix tak ang pon ti laig ka daux dee laux dee lee tix, ka pui mawx, phan ang mawh ka kix pa lieh lox pa ang cu nghiet khankix?Ref 3:16-18 Si 14:1-35.
19 Ex yaox grawng ang kix pon ti laig kah, kheu ang lai yum rhawm heue.