13
Kaing Pa Khaw Caw Rhawm Siyiex
1 Kieh kawn ca koe krax pa moh rhawm ka puxaik khankix awx.
2 Paw piawm ti jhi krax moh ka pui pa ang pex meed pex tawng, grawh grawng nawh, ka daux pa yuh nan, tix blah hoik kia ngien ka kawncau Siyiex yam ang lai tawng heue.Ref 13:2 Jah 18:1-8; 19:1-3.
3 Doh keud ka kix pa hoik phyawk laung, awm mawh pex pa hoik rom ti phyawk tau mai kix mai doh keud ka kix pa tuktiak pui kah, mawh kheu pex kawx kawn ot ka daux tokaux heue.
4 Kieh pa teei mex teei moeng mawh pa koe min pakngai ka daux pui khawmuik mai kieh dee it mawh pa ang seeing brai heue. Grawh grawng nawh pui pa phit vao mai pa phit vao mai mex mai moeng pui, Siyiex tak prawng tak ciyang kah heue.
5 Kieh pex luan khaing ceu pa moh ka mau mai fah rhawm ka ceu pa hoik koe pex awx. Grawh grawng nawh tokaux Nawh Cao hoik ah nin, “Aux tak ang doh tik ka maix mai Aux tak ang doh grham ka maix heue.”Ref 13:5 Pi 31:6, 8; Yaw 1:5.
6 Mawh kheu nan ex tom chix viex rhawm kwa ti ah nin, “Simiang mawh cao pa teem aux, aux tak ang lhat graung heue.
Pui Tak Chix Yuh Patix Ka Aux?”
7 Doh keud doh sawn ka kix pa hoik giex kaing ka piang pex, pa mawh pui pa hoik krai gumlox Siyiex ka pex awx. Keud ka grawh grawng krax twah klaung kix mai yam sidah ju kix mai hawt jawh ka krax yum rhawm kix awx.
8 Yesux Khrit ca awm paox tix, kawx kawx mai singaix mai son leeing ju heue.
9 Paw vi kieh been ceu pa gau tom nie ceu, pa tang siyox pa ang pex tawng khankix, vie pex hu awx. Grawh grawng nawh mhawm ti kieh koe rhawm pa kaux cong kheu bwanson mai pa ang mawh pa kaux cong kheu pa ih, pa mawh ceu pa hawt hu kix ti yuh nan khankix ang lai pon bwanson kah heue.
10 Ex koe khu dee tan tix mu, kix pa yuh kaing krub ka nyiex gox bwan man, ang lai koe akhwang ti ih ka khaing an heue.
11 Grawh grawng nawh tokaux totiag khankix, cao giex kaing li pa ting hoik teei ti viex nham kix laig ka Dee Kied Singax, ti sang tan son phimap, teei ti gleeing plak praix dee bang heue.Ref 13:11 Krub 16:27.
12 Mawh kheu nan Yesux kawx, sonsang kieh pui khankix singax kheu nham tokaux tix, Nawh hoik kham geu ka plak praix siviex veng heue.
13 Mawh kheu nan kieh ex lih hu plak praix dee bang ka Nawh mai rom ti kham ka ceu pa nieb map ka Nawh Cao heue.
14 Grawh grawng nawh ang ex lai koe veng pa kaux cong tin, viang mawh nan ex sawg son veng pa tak sang hoek ti mawh khaix heue.
15 Mawh kheu nan kieh ex ca tan ceu pa tan pa yaogyaw ka Siyiex jheung jheung, ka daux Nawh Cao, pa mawh plix siyieb jheeh khankix pa yaog yaw ceu kaux Nawh heue.
16 Paw piawm ti yuh ceu pa mhawm mai pa vieh rhawm sibieh ti teem pui, grawh grawng nawh ceu pa tan pa yuh nan, mawh pa khaw caw ka rhawm Siyiex heue.
17 Nghiet ka kix pa giex kaing ka piang pex mai cu nghiet ka kix, grawh grawng nawh kix mawh pa pau ka son ju pex, awm kix pa tak sang kham ceu pa chawk ka grawh grawng pex. Kheu son pa yuh kix nan tak mawh ka krax gaux rhawm mai tak ang mawh ka krax pa khi rhawm, mawh kheu phan mawh ka krax khi rhawm tak ang koe bwanson son pex heue.
18 Rawg bwan son ex awx. Grawh grawng nawh ex yum rhawm grawng dee chix keud ex, ang lai koe dee deuh phimap kah mai ex simie ti yuh pa mhawm ka daux ku ceu khawmuik heue.
19 Aux nie lheu khyox khaw ka pex sonsang rawg bwan yuh nin, sonsang deeh hoek aux ka pex laung laung heue.
Lox Nawb Bwan Mai Lox Tawm
20 Yam in kieh Siyiex cao pa nhim, pa hoik deeh viex Simiang ex Yesux lih khaing krax yum, pa mawh cao liang Yung pa ting, pa liang yung khankix, ka daux nham sijax mukheu leeing ju,
21 Kieh pex grum mhawm ka pa hawt yuh alo Nawh Cao ka daux ceu pa mhawm ku ceu mai yuh ceu pa khaw caw plak sivoe Nawh Cao, ka daux pex, kheu Yesux Khrit. Kieh Nawh koe min pakngai ku ju leeing ju liak.Ref 9:21 Krub 8:15. Amen.
22 Puxaik khankix eue, aux khyox khaw sonsang yeung pex ka lox pa sidiex gau in, mawh kheu hoik tiiem aux lox ka pex ceeix ceeix khaing.Ref 9:22 Krub 17:11.
23 Kieh pex tawng grawng pa hoik pluat ploi ka puxaik ex Timose. Phan nawh khran hoek, yiex tak yaox pex tau heue.
24 Nawb ka kix, can pa giex kaing ka piang pex mai ka pui pa singax khankix khawmuik awx. Puxaik meung Itali khankix nawb ka pex heue.
25 Kieh bwanson ot tau mai pex khawmuik liak. Amen.