12
Siyiex Mawh Keeing Ex
1 Mawh kheu yaox ex grawng koe cub pui ex pa kham mhai rug nie ding nie dod pa rob ka ex, kieh ex tik ka kraung pa cien ku ceu khawmuik mai ka phimap pa yie vung vhien kah mai kieh viex rhawm gun yeung mai to, ka ceu pa lah paox tix to pa hoik deuh ka sivoe ex,
2 jhak ka Yesux pa mawh cao pa yuh mai cao pa kieh krax yum rhawm ex grum kah, pa een ceu pa kaig pa tua mawh pa ang koe cee mai hoik kham geu ka khaox lhak, kheu krax gaux rhawm pa hoik deuh sivoe Nawh mai hoik ngawm ka plak taix khawn dawm dang ngeung Siyiex heue.
3 Mawh kheu nan son ang pex sang laux sang khrup rhawm, keud ka grawh grawng Kaw pa hoik kham geu ceu pa kieh pa raw khaing daux tawm taix pui phimap ka tokaux Nawh awx.
Krax Sidiex Keeing
4 Pa lah pex paox tix ka phimap, pex ang nyang bax cheu ti yuh tom sidah lih nham,
5 pex hoik piawm ka lox sidiex lox gau pa hoik jeeh nyaw ka pex, awm ka kawn simex, “Kawn simex Aux eue, paw nieb een ti ang koe cee ka ceu pa sivied ti gau Simiang ka ex. Yam ah yam ne Nawh Cao ka maix paw vi laux rhawm kah
6 Grawh grawng nawh kaw pa moh Simiang kah, Nawh sivied ti gau mai puat ka kawn pa rieb Nawh ti teei ku kaux heue.”Ref 12:5-6 Job 5:17; Kab 3:11-12.
7 Ceu pa yaox pex ti kham geu khankix mawh sonsang sivied ti gau ka pex. Siyiex yuh ka pex awm yuh ka kawn tix heue. Grawh grawng nawh, koe kawn kaux pui mawx, pa ang keeing nawh sivied ti gau kah?
8 Phan pex ang yaox ti kham ceu pa sivied ti gau, pa hoik rom ti kham khawmuik kah, pex mawh kawn cang mai ang mawh kawn tete heue.
9 Lheu khaing an ex hoik koe keeing pa dex mai nex nham ex, sonsang sivied ti gau ka ex mai ex hoik yung yi ka kix heue. Ex tak ang nie lheu cu nghiet ka Keeing khuan khankix mai im lie?
10 Grawh grawng nawh kix hoik sivied ti gau ka ex glang been singaix ceeix ceeix awm pa ce kix mhawm heue. Nawh Cao sivied ti gau ka ex sonsang koe bwanson sonsang mawh ex pa neuex ti pon ka ceu pa singax Nawh Cao heue.
11 Can ceu pa sivied ti gau khawmuik, yam in, ang lai ce mawh pa gaux rhawm, ce mawh pa tug pa kha heue. Bawg khaix ceu pa sivied ti gau chix kieh kix pa yaox ti kham kah, pon plix pa nhim, pa mawh plix pa rahsee heue.
Lox Tawm Mai Lox Tawx Rien Rhawm
12 Mawh kheu nan yaog ka taix pa hoik tak teue mai ka ngawng pa hoik groik,Ref 12:12 Isa 35:3.
13 mai yuh krax pa see son caong pex,Ref 12:13 Kab 4:26.son pa chawh tak ang baox kluik jhong kah, viang mawh nan sonsang moi kah heue.
14 Nied ti coca sonsang koe krax nhim tau mai pui khawmuik mai ceu pa singax phan pui ang koe, tak ang pon ti yaox ka Simiang tix kaux kawx heue.
15 Jhak mhawm mhawm, phan ang mawh nan, ha pui tix kaux kaux kox tak ang pon ang hoek ka bwanson Siyiex heue.Ref 12:15 Pi 29:18. Phan ang mawh nan ha riah pa song tix ceu ceu kox lih kuwah ti lak lheut pex mai pui tom nie seeing brai kheu heue.
16 Son tak ang koe pui phit pui vao tix kaux kaux, phan ang mawh nan pui pa ang chix nab chix yam ka Siyiex, awm Esaw, pa hoik coh ara kawn Ai, ka son pa ih tix tix brie heue.Ref 12:16 Jah 25:29-34.
17 Grawh grawng nawh pex hoik tawng grawng yam simie nawh ti pon cie sin ngao son khaix, nawh yaox ti kham ceu pa tik pa vud mai ang yaox dee sang pon ti doh keud ka ceu pa hoik lud nawh, viang nawh lih rawm ngai mai nied ti sawg kawx heue.Ref 12:17 Jah 27:30-40.
18 Grawh grawng nawh ang pex lai hoek ka gawng pa pon ti teeh ka mai pa gleeing ka ngu mai pa lung mai pa faik mai pa bhaung,
19 mai ka lox luah teet tawng mai ka lox gum lox khankix. Kix pa mhong lox an khyox khaw son ang lai baox sikah ka kix, Ref 12:18-19 Lih 19:16-22; 20:18-21; Pi 4:11-12; 5:22-27.
20 Mawh kheu ang kix pon ti kham lox pa tawm an, “Pie phan totiag teeh ka gawng an, tak lai dheem nawh yum ka simaox heue.”Ref 12:20 Lih 19:12-13.
21 kheu ceu pa yaox an mawh pa koe dee lhat sigrien sigre, Mose tom ah nin, “Aux kied lhat mai siyaung kah heue.”Ref 12:21 Pi 9:19.
22 Pex hoik hoek ka gawng Zion mai ka veng Siyiex pa im ju, pa mawh veng Yerusaliem raoma mai ka cub kawncau Siyiex pa ang doh uik chix simin kah,
23 mai ka cub pa raug rum grum phroik khawmuik mai ka ceu cao kawn pa liang ti keh, pa hoik tiiem daux lai carang ka daux meung raoma mai ka Siyiex pa mawh Cao prawng ca ka khawmuik mai ka khuan pui pa rahsee khankix, pa hoik yuh ti kieh grum mhawm,
24 ka Yesux pa mawh pui sinax ka sijax mukheu pa khraox mai ka nham pa phruah, pa nie blon mhawm sikah khaing pa sikah nham AbelaxRef 12:24 Jah 4:10. heue.
25 Rien rhawm tix son ang pex lai mawh pa ang cu ti nghiet ka Kaw pa sikah heue. Grawh grawng nawh phan kix pa ang cu ti nghiet ka lox kaw pa tawx lox ne ka kix ka piang haktiex,Ref 12:25 Lih 20:19. ang pon ti luan kah, ex tak nie lheu ang pon ti luan phan ex veeh tix ang nghiet ka Kaw pa tawx lox ne khaing meung raoma,
26 Kaw pa hoik kieh haktiex yung yiang ka lox Nawh yam an, yam in Nawh tawx lox sijax mukheu ah nin, “Aux tak ang joeng kieh haktiex baox deeh yung yiang kah khaing, viang ka khawm raoma kawx tak sang baox deeh kieh yung yiang tix bawg heue.”Ref 12:26 Gie 2:6.
27 lox pa ah, “Baox deeh kieh tix bawg,” dee bleeh sang ah ka pa sang teei ti tik ka ceu pa hoik yung yiang khankix, awm ceu pa hoik yuh khankix, ceu pa ang lai yung yiang ka khankix, tak kawn ca ot ca koe heue.
28 Mawh kheu hoik pon ex meung pa ang chix kieh yung yiang kah, kieh ex koe bwanson, sonsang chix ex ti yuh kaing krub pa khaw caw ka rhawm Siyiex, ka krax pa chix yung yi heue.
29 Grawh grawng nawh Siyiex ex mawh ngu pa gleeing heue.Ref 12:29 Pi 4:24.