50
1 Khaix an Yosiep gup ngai tix piang ngai keeing nawh, yiiem mai ngheet ka nawh heue.
2 Yosiep tawx lox ka kawncau tix khankix, pa mawh cao chix sidah mai kieh kix khre keeing nawh ka sidah bhawng heue. Mawh kheu nan cao chix sidah khankix, cox khre Isarelax ka sidah bhawng heue.
3 Kix sau sidah bhawng ka nawh mai deuh lawng nawh tixpon singaix awm hoik koe been pa deuh kix pui yum, khaix hoik luan tixpon singaix pui Ejiptux khankix yiiem doe son Yakop atixgliah singaix heue.
4 Khaix hoik luan singaix yiiem doe kix, Yosiep kok pui yuh kaing nyiex haw Pharaw ah nin, “Phan aux khaw ti pon bwanson sivoe ngai pex, hu krai ka Pharaw ah nin,
5 Keeing aux hoik kieh aux tiextu ah nin, Aux hoik dex sang yum, pex hu sipaung auxRef 50:5 Jah 47:29-31 ka daux simeeig pa hoik kaong aux son tix, daux haktiex Khanan heue. Mawh kheu nan, yam in, kieh aux hu yuh mai sipaung ka keeing tix mai aux tak deeh hoek heue.”
6 Pharaw ah nin, “Hu, mai sipaung ka keeing maix awm hoik kieh nawh maix tiextu ka ti heue.”
7 Mawh kheu nan Yosiep lih hu sonsang sipaung nawh keeing tix, kawncau Pharaw mai khawm cao kaing daux nyiex haw mai cao kaing ka daux haktiex Ejiptux khankix hu tau mai Yosiep heue.
8 Pui nyiex ma Yosiep, pui nyiex puxke nawh mai pui nyiex nawh keeing nawh khankix lih hu tan, mawh ngie kawn nyawm iak cub yung mai pex mai tobrie khankix, pa prah kix daux haktiex Goshen heue.
9 Cub ling lawx mai cub lien brung pa kied haoh hun lih hu tau mai nawh heue.
10 Khaix an kix hoek ka glah pah nghox Atat, pa koe toi rawm klawng Yawdan, kix khrup rhawm sigrien sigre mai yiiem, Kix khi rhawm yiiem doe son keeing tix tan aliah singaix heue.
11 Yam yaox can pui pa ot daux haktiex Khanan khankix, ka krax pa yiiem doe kix ka daux glah pah nghox Atat, kix ah nin, “In mawh krax pa kied yiiem doe ceu pui Ejiptux, ” dee an, kix kok mawh Abelax Mizaren, pa koe toi rawm klawng Yawdan heue.
12 Kawn simex nawh khankix yuh awm pa hoik tawm nawh ka kix heue.
13 Kawn simex nawh khankix viex nawh hu ka haktiex Khanan mai sipaung nawh daux rang pa koe daux kaung Makhapelax, plak lih singaix veng Mamre, pa hoik liag Abraham ka Epharon, ceu pui Hittix, son gwang simeeig tix heue.Ref 50:13 Cau 7:16
14 Khaix hoik sipaung nawh keeing tix, Yosiep deeh ing ka meung Ejiptux tau mai puxke nawh khawm pui pa hu sipaung keeing nawh khankix heue.
Lox Krai Yosiep
15 Yam yaox puxke Yosiep khankix ka hoik yum keeing tix, kix ah nin, “Ex lhat Yosiep koeng ka ex mai deeh pawk bix ka ex, son kaing pa caox caig, pa yuh ex ka nawh heue.”
16 Kix ploi pui cau hu ka Yosiep ah nin, “Sivoe sang yum keeing ex, nawh hoik tawm lox ka yix,
17 hu krai ka Yosiep ah nin, aux rawg maix pluat ploi ka krax lud pa yuh puxke maix khankix mai phimap kix, mawh kheu hoik yuh kix pa caox caig ka maix heue. Yam in rawg maix pluat ploi pa lud kawncau maix khankix, ka daux min plakngai Siyiex keeing maix heue.” Yam mhong Yosiep ka lox krai kix nawh yiiem ka heue.
18 Puxke nawh khankix, hoek gup ti ka sivoe nawh ah nin, “Jhak heue, yix mawh kawncau maix heue.”
19 Yosiep deeh ah nin ka kix, “Paw khi rhawm ka, khex keud pex aux mawh Siyiex lie?
20 Viang pex keud mawh yuh ti pa caox ka aux kawx, viang mawh nan, Siyiex hoik kieh mawh ceu pa mhawm, sonsang taoh ju pui tom nie awm pa hoik yaox pex daux in singaix heue.
21 Mawh kheu nan paw koe krax khi rhawm, aux tak eei liang pex mai kawn praix pex ku kaux heue.” Nawh krai lox nyawm rhawm ka kix mai lox pa caux rhawm ka kix heue.
Grawng Yum Yosiep
22 Yosiep mai pui nyiex ma keeing nawh khankix, ot daux Ejiptux mai Yosiep im ju tom hoek tix yieh kao num heue.
23 Yosiep hoik yaox ka kawn sex nawh khankix, pa mawh kawn saux Epharem, kawn praix Makhirax pa mawh kawn simex Manashe kawx mawh pa keh piang ngawng Yosiep heue.
24 Yosiep ah nin ka pux aik nawh khankix, “Aux dex sang yum, viang mawh nan, Siyiex tak hoek ti kia ngien ka pex mai deeh viex pex lih khaing haktiex in mai tawx pex hu ka haktiex pa hoik tiextu Nawh Cao ka Abraham, Icak mai Yakop heue.”
25 Khaix an Yosiep kieh kawn praix Isarelax khankix, tiextu ti ah nin, “Siyiex tak hoek ti kia ngien ka pex mai pex tak viex si-ang aux hu khaing tin heue.”Ref 50:25 Lih 13:19; Yaws 24:32; He 11:22
26 Yosiep yum yam hoek ju nawh tix yieh kao num mai kix khre sau sidah bhawng ka nawh mai sau ka daux lawng meung Ejiptux heue.