1 Yakop kok ka kawn simex tix khankix ah nin, “Khrawm paox tix tau, aux sang krai pex mhong pa sang lih hoek ti mawh piang pex sivoe ngai heue. 2 “Kawn praix Yakop khankix eue, khrawm paox tix mai nghiet ka lox keeing pex Isarelax heue.” 3 “Rubin eue, maix mawh kawn Ai aux mai mawh riang aux, plix liang aux ti pon yam ting riang tix mai mawh min plakngai pa lheu mhawm mai mawh sibrawm pa lheu mhawm, 4 awm rawm pa ang chix ot tix dah mai phrit tix lih maix tak ang yaox ti mawh pui pa kaux cong, mawh kheu haok maix ka dee it keeing tix maix hoik kieh ku it keeing tix seeing heue.” 5 Simeon mai Lewix kiex mawh puxaik, vaig lawm kix mawh kraung naing pa yuh pa caox caig heue. 6 “Ju aux eue, paw laig daux bang kum kix, khwan aux eue, paw yuh paox pie tau mai kix, jao song rhawm kix, kix hoik pah ka pui, kix hawt alo tokaux cao tix mai mug ka si nieag mawie ngha dud heue. 7 Kieh kiex pon krax jhax krax lawg kheu kin jhawm pa yuh tix mai krax song rhawm pa kied lang teung, aux tak gwieh kiex khaing pui Yakop mai kieh kiex prung prang khaing pui Isarelax heue. 8 Yudax eue, puxaik maix khankix tak yaogyaw maix, taix maix tak jhawp ka ngawg pui pa koeng ka maix khankix, puxaik maix khankix kawx, tak hoek ti krub ka maix heue.” 9 Yudax mawh kawn sivai sangsi mhaing, kawn simex aux eue maix kaoh khaing dee sawg ti ih kug mai gup tix awm sivai sangsi miex, mawh pui mawx pa sang pon hu so ka maix lie?Ref 49:9 Si 24:9 10 Pliah tak ang lai tang tiah khaing Yudax, khaox gix pa kwang ang gah ti khaing sinax caong nawh, tom sidah sang hoek Shilaw mai kawn pui khawmuik tak cu nghiet ka nawh heue. 11 Nawh phyawk la tix ka nhu plix siiet mai phyawk kawn la iak tix ka nhu plix siiet pa mhawm, nawh sidaux kraung tix ka rawm plix siiet, sidaux sibex tix ka rawm plix siiet pa raoh awm nham, 12 Ngai nawh hoik raoh kheu rawm plix siiet, mai rhang nawh hoik paing kheu rawm teeh heue. 13 Zebulun tak ot praok rawm sigrit sigra, mai mawh dee bang reu sangphaw khankix mai mee haktiex nawh hoek tom veng Sidom heue. 14 Issakha mawh pa ting riang awm la mai nawh it tum sinax kawg yung, 15 Nawh yaox dee laux lee pa mhawm, mai haktiex dee nyawm ti ot, nawh tak klawm beeh glawm kraung cien piang klip tix mai mawh siliex pa tawx gha heue. 16 Dan tak prawng ka ceu pui tix, awm doeh ru pui Isarelax tix ceu heue. 17 Dan tak mawh siuing pa koe jai pa ot piang krax, siuing pa ot hawt daux krax, sonsang tut ka loek caong brung brug pui, ti sang kieh cao brug rau plak khaix heue. 18 “Simiang Siyiex eue, aux hoik krox jun ka bwanson krax taoh Maix Cao heue. 19 Gat tak mawh pa hawt cub pui yuh naing puing ka nawh, nawh tak deeh pon hawt phoek loek caong kix heue.” 20 Asha, Haktiex nawh tak mawh pa haoh priex preem pa mhawm khaing, mawh pa kied nyawm tete mai nawh tak pon yuh priex ih simiang lih tom nie heue. 21 Napthalix, mawh cak miex pa blha ti pa ang koe dee tuh, pa keh kawn pa mhawm heue. 22 Yosiep mawh kak khaox pa nie plix, plix hawt rawm keut, mai kak khankix jao luan ka guh veng heue. 23 Pui naing ak, yuh krax kin mai hawt puing ka nawh, kix puing mai koeng ka nawh, 24 viang mawh nan ak nawh kawn koe riang mai plawng taix nawh cong sijung, riang rao tawm taix pa ting sibrawm Siyiex pa koe daux Yakop, pa mawh cao liang yung, rang ting ceu pui Isarelax heue.\v 25 Pa mawh Siyiex keeing maix, tak teem maix, Cao pa ting sibrawm tak nawb bwan ka maix tau mai bwanson pa kaoh khaing daux raoma long, bwanson pa raux mox pa koe plak greem, bwanson pa pon khaing teeh mai pa kaoh khaing daux vaig heue. 26 Bwanson pa nawb keeing maix khankix, nie lheu mhawm khaing bwanson pa kaoh khaing gawng leeing ju mai lheu mhawm khaing bwanson grum naog khaing ton leeing ju heue. Son inkix tak ot piang Yosiep mai piang mhok khri pa koe piang dong re nawh heue. Hoek piang puxaik pa tang gwieh hu khaing nawh heue. 27 Binyamin tak mawh sox praix, pa leue ti kiied totiag, nawh ih ka nex totiag pon ti ponngawb caocao mai deeh gwieh nex totiag pa pon sigrhang tix son ponbo heue. 28 In mawh doeh ru Isarelax kao ra ceu mai mawh gumlox sikah keeing kix, ka kix mai lox nawb bwan ka kix mai nawb bwan ka kix ku kaux, awm bwanson pa khaw kix ti pon heue.

29 Khaix an nawh tawm lox ka kix ah nin, “Aux sang deeh hu neuex tix tau mai ceu pui aux, sipaung aux tau mai keeing aux khankix ka daux rang pa koe daux kaung Epharon ceu pui Hittix, 30 daux rang pa koe daux kaung Makhapelax ka plak lih singaix haktiex Khanan, kaung an Abraham hoik liag ka Epharon ceu pui Hittix sonsang mawh haktiex simeeig cie nawh heue.”Ref 49:30 Jah 23:3-20 31 Kix hoik sipaung AbrahamRef 49:31 Jah 25:9-10 mai moeng nawh Sara tan mai kix baox sipaung IcakRef 49:31 Jah 35:29 mai moeng nawh Rakhelax tan mai Leax kawx aux hoik sipaung tan heue. 32 Kaung mai daux rang an, mawh pa hoik liag nawh khaing ceu pui Hittix heue.” 33 Khaix hoik tawm Yakop lox ka kawn simex tix khankix, nawh yaog caong ti deuh piang ku it tix, nawh dud rhawmRef 49:33 Cau 7:15 mai hu ka dee khrawm ru tix heue.