1 Khaix an cao kaing tawx kawk nyaux simiang mai cao kaing tawx priex ih simiang, lud ka simiang tix meung Ejiptux heue. 2 Pharaw song rhawm ka cao kaing ra kaux, pa mawh cao kaing tawx kawk nyaux mai cao kaing tawx priex ih nawh, 3 mai nawh sau kiex daux thawng, ka daux nyiex cao kaing pa pau thawng an tau mai dee laung kix Yosiep tan heue. 4 Cao giex kaing lien pa pau simiang, ap kiex ka Yosiep mai kieh priex kiex mai kiex yaox ti ot tan tom kub rheung heue. 5 Khaix an cao kaing tawx kawk nyaux mai cao kaing tawx priex ih simiang meung Ejiptux, pa hoik laung kix daux thawng khawm ra kiex, kiex tang camaox pa koe dee bleeh son kaux mawx kaux an daux tix sawm tau heue. 6 Yosiep hoek ka kix plak ponngawb mai jhak ka kix mai yaox voi rhawm kiex khawm ra heue. 7 Mawh kheu nan, nawh chawk cao kaing an kiex, pa ot greem Pharaw pa hoik laung kix tau mai nawh daux nyiex cao simiang kix ah nin, “In ngaix pax lai laux rhawm jao patix?” 8 Kiex ah nin ka nawh, “Yiex camaox tix kaux tix ceu mai pui pa sang krai yiex mhong dee bleeh ang koe tix kaux kawx” Yosiep ah nin ka kiex, “Grawng pa krai dee bleeh camaox mawh pa dex mai Siyiex ang mawh lie? pax krai aux mhong, ” 9 khaix an cao kaing tawx kawk nyaux, krai camaox ti ka Yosiep ah nin ka nawh, “Ka daux camaox aux koe nhu plix siiet tix nhu sivoe aux, 10 nhu plix siiet an, koe kak loe kak, piang kak an, koe kho pa sang dex pruh ka mai lih pruh, kak plix nawh hoik si gleem plix mai jiet mhawm teem heue. 11 Kawk nyaux Pharaw koe daux taix aux mai aux teei plix siiet an, biiet daux kawk nyaux Pharaw mai ap kawk an daux taix Pharaw heue.” 12 Yosiep ah nin ka nawh, “Dee bleeh kak loe kak an mawh loe singaix, 13 khaix in loe singaix, Pharaw deeh yaog kaing maix mai deeh tawx dee ot maix, maix tak deeh yaox ti tawx kawk nyaux Pharaw ka daux taix nawh, awm pa hoik yaox maix ti yuh glang ka in, yam mawh maix cao tawx kawk nyaux nawh heue. 14 “Doh keud ka aux, yam yaox maix krax gaux rhawm mai jhi krax caux rhawm maix ka aux, krai grawng aux ka Pharaw, sonsang yaox aux ti lih khaing nyiex thawng in heue. 15 “Aux mawh pui pa briex kix khaing ceu pui Hebrie tete, aux ang tie koe dee lud daux haktiex in mai kix sau aux daux thawng heue.” 16 Yam yaox cao kaing tawx priex ih simiang, mhawm lox dee bleeh camaox an nawh ah nin ka Yosiep, “Aux kawx camaox ti cah khrawng blah loe mu piang kaing ti, 17 Ka daux khrawng pa koe piang paox tix, koe priex ih kuceu son Pharaw, sim khankix hoek mai tut tix ih, pa koe daux khrawng cah aux piang kaing tix heue.” 18 Yosiep ah nin, “Dee bleeh camaox in mawh nin, khrawng loe mu mawh loe singaix, 19 “Khaix in loe singaix, Pharaw tak tat kaing maix mai takteue maix piang khaox, sim khankix tak tut tix ih nex maix khaing maix heue.” 20 Khaix luan daux loe singaix, mawh singaix keh Pharaw, nawh yuh pawie singaix keh ti mai kok kawncau tix ku kaux mai nawh deeh teei cao kaing tawx kawk nyaux mai cao kaing tawx priex ih lih khaing daux thawng heue. 21 Nawh deeh taoh ju cao kaing tawx kawk nyaux nawh mai deeh kieh nawh yuh cao kaing tawx kawk nyaux, nawh deeh yaox ti mawh cao tawx kawk nyaux daux taix Pharaw, 22 mai nawh takteue cao kaing tawx priex ih, awm pa khaw mai lox krai Yosiep ka kiex heue. 23 Viang mawh nan, cao kaing tawx kawk nyaux ang lai doh keud ka Yosiep mai hoik piawm ka nawh heue.