11
Nyiex Lhaong Babelax
1 Yam an kawn pui haktiex khawmuik, mawh pui tix ceu mai lox sikah tix ceu khaing heue.
2 Kix kaoh khaing plak lih singaix mai kix yaox ka haktiex dee lung Shinar mai kix ot tan heue.
3 Kix ah nin ka paox tix, “Hoek heue, ex yuh lon tiex mai gleeing tom kaux, kix yuh lon tiex sin mawh tang simaox mai kix shao graix tang tiex pawng pit heue.”
4 Kix ah nin, “Hoek heue, ex sum veng ting tix mu mai nyiex lhaong son cao ex, tom cux raoma, sonsang ang ex lai prung prang ka haktiex tang dah mai sonsang ao min ceu kaux ex piang haktiex in heue.”
5 Siyiex lih jhak ka veng mai nyiex lhaong pa sum kawn pui heue.
6 Simiang Siyiex ah nin, “Kawn pui khankix hoik mawh pui tix ceu mai lox sikah kix kawx hoik mawh tix ceu khaing, yam in can pa yuh kix mai can pa keud kix phan ang lai koe ceu tieb ka, kix tak ca yuh awm an heue.
7 Hoek heue, kieh Ex lih hu mai tiebtie kix mai kieh lox sikah kix tang khaing paox tix heue.”
8 Mawh kheu nan, Simiang Siyiex kieh kix prung prang piang haktiex kudah dee mai ang lai kieh kix sum veng ting heue.
9 Mawh kheu hoik kieh Simiang Siyiex lox sikah kix tang khaing paox tix mai kieh kix prung prang piang haktiex kudah dee, kix tom kok veng an mawh Babelax heue.
Doeh Ru Shemax
(1Been 1:24-27)
10 In mawh doeh ru Shemax khaix hoik kheem rawm haktiex ra num, Shemax koe ju tix yieh num mai nawh pon kawn simex tix Aphazat heue.
11 Khaix hoik pon nawh Aphazat, Shemax im ju phwan yieh num mai baox pon kawn simex kawn bun khankix heue.
12 Yam koe ju Aphazat tixngoe phwan num nawh pon kawn simex tix Shalax heue.
13 Khaix hoik pon nawh Shalax, Aphazat im ju pon yieh loe num mai baox pon kawn simex kawn bun khankix heue.
14 Shalax koe ju tixngoe num mai pon kawn tix Ebax heue.
15 Khaix hoik pon nawh Ebax, Shalax im ju pon yieh loe num mai baox pon kawn simex kawn bun khankix heue.
16 Ebax koe ju tixngoe pon num mai nawh pon kawn tix Phalek heue.
17 Khaix hoik pon nawh Phalek, Ebax im ju pon yieh tixngoe num mai nawh baox pon kawn simex kawn bun khankix heue.
18 Phalek koe ju tixngoe num mai nawh pon kawn tix Ragaw heue.
19 Khaix hoik pon nawh Ragaw, Phalek im ju ra yieh dim num mai nawh baox pon kawn simex kawn bun khankix heue.
20 Yam koe ju Ragaw tixngoe ra num mai nawh pon kawn tix Seraok heue.
21 Khaix hoik pon nawh Seraok, Ragaw im ju tom hoek ra yieh aliah num mai nawh deeh baox pon kawn simex kawn bun khankix heue.
22 Seraok koe tixngoe num mai nawh pon kawn tix Nakhaw heue.
23 Khaix hoik pon nawh Nakhaw, Seraok im ju ra yieh num mai nawh baox pon kawn simex kawn bun khankix heue.
24 Nakhaw ot tixnga dim num mai nawh pon kawn tix Terax heue.
25 Khaix hoik pon nawh Terax, Nakhaw im ju tom hoek tix yieh kao dim num mai nawh baox deeh pon kawn simex kawn bun khankix heue.
26 Terax ot atixgliah num mai nawh pon kawn tix pa mawh Abram, Nakhaw mai Haran khankix heue.
Doeh Ru Terax
27 In mawh doeh ru Terax, Terax pon kawn tix pa mawh Abram, Nakhaw mai Haran, Haran deeh pon kawn tix Lotax heue.
28 Haran yum sivoe keeing tix Terax daux haktiex ceu pui Kaladie veng Urax heue.
29 Khaix an Abram mai Nakhaw teei ti koe moeng, ceu kaux moeng Abram mawh Sarai mai ceu kaux moeng Nakhaw mawh Milakha kawn bun Haran, pa mawh keeing ka Milakha mai Isakah heue.
30 Viang mawh nan, Sarai mawh bun pa neh, pa ang chix koe kawn heue.
31 Terax viex kawn simex tix Abram mai kawn saux nawh Lotax, pa mawh kawn Haran mai mun nawh Sarai, pa mawh moeng kawn simex nawh Abram khankix mai kix lih hu khaing haktiex ceu pui Kaladie veng Urax, sonsang hu ka meung Khanan mai kix hoek ka Haran mai ot tan heue.
32 Terax im ju tom hoek ra yieh phwan num mai Terax yum ka daux veng Haran heue.