1 Yam yaox pui Isarelax khankix ka rheung Mose ang lih khaing piang gawng, kix kraix khrawm paox tix hoek ka Arun ah nin, “Kaoh heue, Yuh riang siyiex ka son yix pa sang thong yix hu sivoe, mawh kheu viex Mose yix lih khaing haktiex Ejiptux, yix ang tawng ceu pa hoik lih ti mawh ka nawh.”Ref 32:1 Cau 7:40 2 Arun ah nin ka kix, “Peeik krim khri pa koe ka yhaok moeng pex, kawn simex kawn bun pex khankix mai viex hoek ka aux.” 3 Mawh kheu nan, pui khawmuik peeik krim khri pa koe ka yhaok tix mai viex hoek ka Arun. 4 Nawh rieb ti teei khri khaing daux taix kix mai nawh yuh grang pakpeung ka kraung taix tix mai raug ti tawx riang kawn mawie.Ref 32:4 Cau 7:41 Khaix an kix ah nin ceu pui Isarelax eue, in mawh siyiex pex pa viex pex lih khaing meung Ejiptux.” 5 Yam yaox Arun an, nawh sum khu dee tan ka sivoe kawn mawie an mai Arun pao lox ah nin, “Pasax mawh singaix pawie son Siyiex.” 6 Singaix pasax kix kaoh caocao mai yuh krax tan pa gleeing mai krax tan pa nhim, pui khankix ngawm ti ih mai nyaux, khaix an, kix deeh kaoh mai yuh krax klieh krax nyiah.Ref 32:6 1Kaw 10:7 7 Siyiex ah nin ka Mose, “Lih hu heue, grawh grawng nawh, pui maix pa hoik viex maix lih khaing haktiex Ejiptux khankix, hoik yuh krax pa laux leeing ka tokaux tix. 8 Kix hoik niied ti veeh hu khaing daux krax pa hoik tawm Aux ka kix. Kix hoik raug riang kawn mawie son tokaux kix mai krub kah mai appong krax tan tix ka an ah nin, pui Isarelax khankix eue, in mawh siyiex pa viex pex lih khaing meung Ejiptux” 9 Siyiex ah nin ka Mose, “Aux hoik yaox pui inkix mai kix mawh ceu pui pa kiien ngawg tete. 10 Mawh kheu nan maix grham Aux, sonsang lih krax song rhawm Aux ka piang kix, Aux sang yuh kix laux leeing. Aux tak kieh maix mawh ceu pui pa ting lhaong.” 11 Mose khyox khaw ka Siyiex ah nin, “Siyiex eue, Maix song rhawm ka piang pui Maix khankix yuh ka mawx? Pui inkix mawh pa hoik viex Maix lih khaing haktiex Ejiptux ka sibrawm pa ting lhaong Maix, khawm taix pa ting riang Maix. 12 Chix sang kieh pui Ejiptux pon ti krai ah nin yuh ka mawx? Nawh Cao hoik viex kix lih hu, sonsang yuh krax kha rhawm kix mai sonsang pah Nawh kix daux tiag mai sonsang yuh kix laux leeing ka piang haktiex deeh veeh krax song rhawm Maix Cao mai deeh tieh rhawm Maix ang tawx krax kha rhawm ka pui inkix, son ceu pui Maix khankix liak. 13 Doh keud ka Abraham, Icak mai Isarelax pa mawh kawncau Maix khankix, pa hoik tiextu Maix Cao ti ah nin, Aux tak kieh doeh ru pex haoh hun, awm simuing piang raomaRef 32:13 Jah 22:16-17 long mai haktiex inkix khawmuik, pa hoik ah Aux ti tawx ka doeh ru kix mai kix tak mawh pui pa pon sinngao ankix leeing ju”Ref 32:13 Jah 17:8 14 Mawh kheu nan, Siyiex deeh doh keud tieh loh rhawm tix mai ang lai tawx krax kha rhawm pa hoik ah Nawh Cao tix sang yuh ka ceu pui Nawh khankix. 15 Mose veeh ti lih hu khaing ka piang gawng tau mai khlawp simaox ra plah, pa hoik tiiem ka gumlox tawm pingnyap ka daux tawm taix nawh. Khlawp simaox an ra plah hoik tiiem tix khawm ra plah. 16 Khlawp simaox ra plah an, hoik mawh kaing pa yuh Siyiex mai khaix taix pa tiiem an, hoik mawh khaix taix pa hoik tiiem hoik pawd Siyiex ka piang khlawp simaox an. 17 Yam mhong Yawsux ka lox sinum riag yo pui khankix, nawh ah nin ka Mose, “Lox sinum naing koe daux nyiex bang.” 18 Mose deeh ah nin, “Lox ankix ang lai mawh lox riag yo kix grawng pex tix naing, ang lai mawh lox pa yiiem kix grawng som tix naing, awm pa mhong aux, lox ankix mawh lox rhax kix lai.” 19 Yam hoek nawh dex nyiex bang dom mawx dom an, nawh yaox ka riang kawn mawie mai krax graoh krax klieh kix mai Mose song rhawm mai taing ti tik khlawp simaox an pa koe daux taix nawh mai pah max ka greem caong gawng. 20 Khaix an nawh teei riang kawn mawie pa hoik yuh kix mai gleeing ka daux ngu, krid tom mien, mai rhuat ankix ka piang rawm mai kieh pui Isarelax khankix nyaux kah. 21 Mose ah nin ka Arun, “Pui inkix yuh patix ka maix kieh maix viex phimap pa ting hoek ka piang kix yuh ka mawx?” 22 Arun tom ah nin, “Paw nyang kieh krax song rhawm simiang aux lih ha liak. Maix hoik tawng koe krax pa caox ka daux rhawm rhi pui inkix. 23 Kix ah nin ka aux, yuh riang siyiex son yix, pa sang thong yix hu sivoe, mawh kheu Mose cao pa viex yix lih khaing haktiex Ejiptux an, yix ang lai tawng ceu pa hoik lih ti mawh ka nawh. 24 Aux ah nin ka kix, “Can pui pa koe krim khri kieh peeik lih, kix tom tawx khankix ka aux mai aux sau ka daux ngu mai lih ti mawh riang kawn mawie.” 25 Yam yaox Mose ka ang pui khankix ceep kraung, mawh Arun pa hoik grham kix sonsang kieh pui koeng ka sinax kix mai nyiah kix, 26 Mose cung diang siviex nyiex bang kix ah nin, “Pui mawx pa ot plak Siyiex, kieh nawh hoek ka aux” mai kawn simex Lewix khankix khrawm paox tix hoek ka nawh. 27 Nawh ah nin ka kix, “Siyiex pa mawh Siyiex ceu pui Isarelax ah nin, kieh pui ku kaux tang giieb vaig ka nyoi tix mai hu lailing ka daux nyiex bang, laig ka daux siviex nyiex in tom hoek ka siviex nyiex an mai kieh pui ku kaux pah ka puxaik tix, paox grawm tix mai paox plawg tix ku kaux.” 28 Kawn simex Lewix khankix yuh awm gumlox Mose mai pui khankix yum been loe rheng kaux ka daux singaix an. 29 Mose ah nin, “Tang yuh tokaux tix singax mai appong ka Siyiex daux singaix, sonsang tawx Nawh bwanson ka piang pex, mawh kheu hoik tieh feen pui ku kaux ka kawn simex tix mai puxaik tix.” 30 Singaix khaix, Mose ah nin ka pui khankix, “Pex hoik lud mai yuh phimap pa ting, mawh kheu nan, yam in aux sang deeh haok ka piang gawng dee ot Siyiex, sonsang deeh pon aux ti yuh krax pluat ploi son phimap pex.” 31 Mose deeh hoek ka Siyiex ah nin, “Pui inkix hoik lud mai yuh phimap pa ting mai hoik yuh riang siyiex khri son cao tix. 32 Phan Maix Cao koe rhawm ti pluat ploi ka phimap kix pluat ploi liak. Viang mawh nan, phan Maix Cao ang koe rhawm, aux rawg Maix preet ceu kaux aux khaing daux phuk laiRef 32:32 Jhi 3:5 pa hoik tiiem Maix Cao liak.” 33 Siyiex deeh ah nin ka Mose, “Pui mawx ang ah pa hoik lud ka Aux, Aux tak preet ceu kaux nawh khaing daux phuk lai Aux. 34 Yam in deeh hu mai thong pui in hu ka dee pa hoik tawm Aux ka maix, jhak heue, kawncau Aux tak hu ka plak sivoe maix, yuh ka mawx ang ah, ka daux singaix yam hoek Aux ti tawx krax ciyang, Aux tak hoek ti tawx krax ciyang ka piang kix, son phimap pa yuh kix.” 35 Siyiex tawx krax kha rhawm jhawm saux preng ka pui an khankix, kheu jao yuh kix riang kawn mawie tau mai Arun.