31
Sum Nyiex Gox Bwan Man
(Lih 35:30-36:1)
1 Siyiex ah nin ka Mose,
2 “Jhak heue, Aux tak kok ka ceu kaux mai laug Bezalelax, kawn simex Urix, pa mawh kawn simex Hurax ka daux doeh ru Yudax.
3 Aux hoik kieh khwan Siyiex naog ka daux nawh, tawx pingnya mai krax tawng mai krax keud mai son grawng pa nhim ka kaing khawmuik.
4 Sonsang min yuh nawh kaing jhaw khaox kraung pa mhawm, kraung khri, kraung mau, kraung tawng,
5 grawng kaing pa chix pat, chix klaing, chix kleuk siang simaox mai kaing pa chix saik khaox mai grawng kaing pa chix yuh nawh kuceu.
6 Aux hoik yaog Aholibax kawn simex Ahisamat, doeh ru Dan, yuh kaing tau mai nawh. Aux tak tawx pingnya ka pui pa koe pingnya daux rhawm khankix, sonsang pon yuh kix can ceu pa tawm Aux ka kix,
7 pa mawh nyiex gox bwan man bang kum pui hun mai khui pa kham sakse mai dang ngeung pa caux rhawm, pa koe ka piang an mai can kraung pa shiao kuceu daux nyiex gox bwan man,
8 pheen mai kraung pa shiao tau mai pheen, pang jawk ten khri pa singax mai kraung pa shiao tau mai an mai hu dee tan pa tok nyawng bhawng,
9 khu dee tan kix krax tan pa gleeing tau mai kraung pa shiao ka an, pan khoek mai caong pan khoek,
10 kraung ceep yam yuh kaing krup ka Siyiex, kraung ceep pa singax son cao giex kaing li pa mawh Arun mai kraung ceep kawn simex nawh khankix, sonsang yuh kix kaing jhaw cao giex kaing li son Siyiex.
11 Bee groi mai nyawng bhawng son dee singax, kix tak yuh ceu an awm gumlox pa tawm Aux ka maix heue.”
Grawng Been Singaix Twah
12 Siyiex ah nin ka Mose,
13 “Maix krai ka pui Isarelax khankix ah nin, pex tak priex ka singaix twah Aux, mawh kheu mawh mhai rug sinax Aux mai pex, leeing ju sonsang tawng pex mawh Aux Siyiex pex, pa kieh pex singax.
14 Mawh kheu nan, pex tak priex rien ka singaix twah mawh pa singax son pex. Can pui pa yieh singaix twah an, tak kieh nawh yum kah tete. Grawh grawng nawh pui pa yuh kaing ka daux singaix an, tak teei ti tik khaing sinax pui ceu nawh khankix.
15 Yuh kaing daux liah singaix, viang mawh nan, ka daux aliah singaix, mawh singaix twah klaung mai singaix laux tix mai mawh singaix pa singax son Siyiex. Pui pa yuh kaing ka daux singaix twah an, tak kieh nawh yum.Ref 31:15 Lih 20:8-11; 23:12; 34:21; 35:2; Krub 23:3; Pi 5:12-14
16 Mawh kheu nan, daux doeh ru ceu pui Isarelax khankix tak priex rien ka singaix twah mawh gumlox sijax mukheu leeing ju.
17 An mawh mhai rug sinax Aux mai ceu pui Isarelax khankix leeing ju. Grawh grawng nawh ka daux liah singaix, Siyiex hoik yuh raoma mai haktiex mai ka daux singaix aliah Nawh Cao ang lai yuh kaing mai laux lee tix heue.”
18 Yam hoik sikah Nawh Cao tau mai Mose ka piang gawng Sina, Nawh Cao tawx khlawp simaox ra khlawp ka Mose, pa mawh lox tawm pingnyap pa hoik tiiem Siyiex ka giien taix tix heue.