1 Yam liang Mose yung mai pex paox nawh Yesaraw, pa mawh cao giex kaing li Midian, nawh viex yung mai pex khankix hu plak khaix daux tiag mai hoek ka baoh Hawrap pa mawh gawng Siyiex. 2 Kawncau Siyiex lih bleeh ka nawh ka daux rao ngu sigreung yeem khaox, mai nawh jhak ka an, jhak heue, yeem khaox an hoik gleeing ka ngu, viang mawh nan, yeem khaox an ang proe. 3 Mose ah nin, “Aux sang hu jhak ka riang susai pa daox am in, yeem an ang chix proe jao patix lie?” 4 Yam yaox Siyiex ka veeh nawh ti hu jhak, Siyiex kok ka nawh khaing daux sigreung yeem ah nin, “Mose! Mose!” mai nawh deeh pawk ah nin, “Aux koe tin.” 5 Khaix an Nawh Cao ah nin, “Paw hoek dex, Peeik kiep khaing caong maix, mawh kheu dee cung maix mawh tiex dee pa singax.” 6 Nawh Cao baox ah nin, “Aux mawh Siyiex keeing maix, Abraham, Icak mai Yakop. “Mose mox pakngai ti, kheu lhat graung nawh mai ang pon jhak ka Siyiex. 7 Siyiex ah nin, “Aux hoik yaox ka yeen ya kix ceu pui Aux, pa ot daux meung Ejiptux, Aux mhong lox riag yo kix ka cau cao kaing ka kix, mawh kheu Aux hoik tawng krax kha rhawm kix, 8 Aux hoek sonsang taoh kix khaing daux tawm taix pui Ejiptux mai sonsang deeh teei Aux kix lih khaing daux haktiex an mai tawx kix hu ka haktiex pa mhawm pa vieh, dee lih rawm teeih mai rawm hia, dee ot ceu pui Khananix, ceu pui Hitix, ceu pui Amawrix, ceu pui Pharazix, ceu pui Hiwix mai ceu pui Yebusix khankix. 9 “Yam in, jhak heue, krax yiiem kawn praix Isarelax khankix hoik hoek ka Aux mai Aux hoik yaox ka pa yeen ya ceu pui Ejiptux ka kix. 10 “Mawh kheu nan, hu yam in, Aux sang ploi maix hu ka simiang Pharaw mai kieh maix teei pui Aux, kawn praix Isarelax lih khaing Ejiptux.”Ref 3:2-10 Cau 7:30-34. 11 Viang mawh nan, Mose deeh ah nin ka Siyiex, “Mawh aux pui yuh ka mawx, lai sang pon hu ka Pharaw mai teei kawn praix Isarelax khankix lih khaing meung Ejiptux.” 12 Nawh Cao ah nin, “Aux tak ot tau mai maix, mai in tak mawh sakse son maix, kheu Aux ploi maix hu Yam hoik viex maix ceu pui lih khaing meung Ejiptux maix tak krub ka Siyiex ka piang gawng in.” 13 Mose ah nin ka Siyiex, “Yam hoek aux ka kawn praix Isarelax khankix, aux sang ah nin ka kix, Siyiex keeing pexRef 3:13 Lih 6:2-3. hoik ploi aux hoek ka pex, phan kix deeh chawk aux, mawh kaux nawh patix? aux sang krai yuh ka mawx ka kix?” 14 Siyiex ah nin ka Mose, “AUX MAWH AWM PA MAWH AUX.”Ref 3:14 Jhi 1:4-8. Nawh ah nin, krai yuh nin ka ceu pui Isarelax, KAW PA MAWH AUX, hoik ploi aux hoek ka pex” 15 Siyiex deeh ah nin ka Mose, “Ah yuh nin ka pui Isarelax, Siyiex keeing pex, Siyiex Abraham, Icak mai Yakop, hoik ploi aux hoek ka pex. In mawh ceu kaux aux leeing ju, in mawh ceu kaux pa caw doeh ru pex tix doh keud ka ti ju hoik tix ju. 16 Hu mai kraix khrawm cub kuad song pui Isarelax khankix, “Siyiex keeing pex, Siyiex Abraham, Icak mai Yakop hoik bleeh ka aux, ah nin, “Aux hoik yaox can ceu pa yuh pui meung Ejiptux khankix ka pex, 17 Aux hoik yuh sijax mukheu sonsang teei pex lih khaing krax pa kha rhawm khaing Ejiptux mai kieh pex hu ka haktiex ceu pui Khananix, ceu pui Hitix, ceu pui Amawrix, ceu pui Pharazix, ceu pui Hiwix mai ceu pui Yebusix, dee lih rawm teeih mai rawm hia.” 18 Kix tak nghiet lox maix, maix mai kuad song Isarelax tak hu ka simiang Ejiptux ah nin ka nawh, Siyiex ceu pui Hebrie, hoik sipub ka yix mai yam in yuh bwanson, kieh yix hu krax daux tiag loe singaix krax, sonsang rawg yix bwan mai krub ka Siyiex. 19 Aux tawng ka ang simiang Ejiptux ploi maix lih hu yieyie, phan nawh ang yaox taix pa ting sibrawm Aux. 20 “Aux tak nyeu tiex tix mai ciyang ka pui Ejiptux tau mai pa daox am pa yuh Aux, khaix an nawh tak ploi maix lih hu, 21 Aux tak kieh pui in koe min pakngai sivoe ceu pui Ejiptux, yam lih hu pex, pex tak ang yaox ti lih hu mai taix yi tix, 22 bun ku kaux tak deeh mhaing kraung mau, kraung khri mai kraung ceep khaing paox plawg ka bun pa ot ka nyiex nawh khankix mai tak ceep kraung khrai an khankix ka kawn simex kawn bun tix mai tak rhim hu khaing pui Ejiptux heue.Ref 3:21-22 Lih 12:35-36.