1 Pui tix kaux khaing nyiex ma Lewix, teei ti moeng ka kawn bun Lewix. 2 Bun an koe kaux mai keh kawn simex tix kaux, yam yaox nawh mhawm grang kawn simex an, nawh mox ka nawh loe khix.Ref 2:2 Cau 7:20; He 11:23. 3 Yam yaox nawh ang ti lai pon mox nawh teei kreeb pa taing ka priem son nawh mai kraix graix mai peeh khaox Ashaphat ka mai sau kawn nyawm daux an, hu deuh sinax pang priem pa koe praok rawm klawng. 4 Puxke bun nawh pau ti jhak dee singai, sonsang tawng pa sang lih mawh ka kawn nyawm an, 5 Kawn bun Pharaw lih hoek ti heem rawm daux rawm klawng, kawncau bun nawh khankix, lailing hawt praok klawng, mai yaox ka kreeb tix mu sinax pang priem. ploi kawncau bun tix hu teei mai kieh viex hoek ka ti. 6 Yam paoh nawh ka kreeb an, nawh yaox ka kawn nyawm iak, mai kawn nyawm iak an yiiem. Mawh kheu nan, nawh caux rhawm ka kawn nyawm an ah nin, “In mawh kawn pui Hebrie tix kaux kaux.” 7 Khaix an puxke bun nawh ah nin ka kawn bun Pharaw, “Sang kieh maix aux hu kok ka bun Hebrie tix kaux kaux sonsang tawx kawn nyawm in peuex son maix lie?” 8 Kawn bun Pharaw ah nin ka nawh, “Hu heue.” Mawh kheu nan, bun an hu mai kok ka miex kawn nyawm. 9 Kawn bun Pharaw ah nin ka nawh, “Teei kawn nyawm in hu mai priex son aux, aux tak tawx riang priex maix ka.” Mawh kheu nan bun an teei kawn nyawm mai priex ka nawh. 10 Kawn nyawm haok hwan mai viex nawh hoek ka kawn bun Pharaw mai nawh lih mawh kawn simexRef 2:10 Cau 7:21. kawn bun Pharaw, nawh kok ceu kaux nawh mawh Mose, nawh ah nin, “Mawh kheu teei aux nawh khaing daux rawm heue.”

11 Yam hoik ting Mose, Ref 2:11 He 11:24.nawh hu ka puxaik tix mai jhak ka kaing cien pa yuh kix, mai nawh yaox pui Ejiptux tawk ka pui Hebrie tix kaux, pa mawh puxaik nawh. 12 Nawh jhak plak in plak an, yam ang nawh yaox pui tix kaux kawx, nawh pah pui Ejiptux mai sipaung nawh daux maik. 13 Yam deeh hu nawh khaix an tix ngaix, jhak heue, pui Hebrie ra kaux simah mai tawk paox tix, nawh ah nin ka pui pa phit an, “Yuh ka mawh maix lai tawk ka paox puxaik tix lie?” 14 Nawh pawk ah nin, “Mawx pa kieh maix yuh cao kaing mai prawng see ka piang yix? mawh keud maix ti sang pah aux awm hoik pah ti ka pui Ejiptux lie?”Ref 2:11-14 Cau 7:23-28. Mawh kheu nan, Mose hoik lhat mai keud, “Kix hoik tawng ceu inkix tete.” 15 Yam mhong Pharaw ka grawng in, nawh sawg ti pah Mose, mawh kheu nan, Mose to khaing Pharaw mai hu ot ka daux haktiex Midian, Ref 2:15 Cau 7:29; He 11:27. mai ngawm dex rawm daux. 16 Yam an kawn bun cao giex kaing li Midian aliax kaux, kix hoek ti kin rawm mai sau rawm naog daux dawng sonsang tawx yung mai pex keeing kix nyaux rawm. 17 Cao liang yung hoek mai grheu kix hu dee singai, viang mawh nan, Mose kaoh cung mai teem ka kix mai tawx yung mai pex khankix nyaux rawm. 18 Yam deeh kix ka keeing tix Roelax, nawh ah nin, “Kheu pex lai cao hoek in singaix.” 19 Kix pawk ah nin, “Pui Ejiptux tix kaux, hoik taoh yix khaing daux taix cao liang yung khankix mai kin rawm son yix mai tawx yung mai pex nyaux rawm.” 20 Nawh ah nin ka kawn bun tix, “Ot nawh dee mawx? Kheu pex lai prah nawh? Kok nawh hoek sawm.” 21 Mose kied nyawm rhawm ka ot tix mai Roelax, mai nawh tawx Mose moeng kawn bun tix Zipawrax. 22 Nawh keh kawn simex tix kaux mai kix kok ceu kaux nawh mawh Geshom, mawh kheu ah nawh nin, “Aux hoik mawh nyo sinie, daux haktiex pui tang praix.” 23 Yam hoik rheung bawg yam, simiang meung Ejiptux yum.” Ceu pui Isarelax khankix ngia mai riag yo kheu yuh siliex, lox riag yox kix hoik hoek ka sivoe Siyiex. 24 Siyiex mhong ka lox ngia kix mai Siyiex deeh doh keud ka gumlox sijax mukheuRef 2:24 Jah 15:13-14. pa yuh Nawh Cao tau mai Abraham mai Icak mai Yakop. 25 Siyiex jhak ka piang kawn praix Isarelax khankix mai tawng ka grawng kaing pa yaox kix ti yuh heue.