1 Yam an cao jhai HagieRef 5:1 Gie 1:1. mai ZakharixRef 5:1 Zak 1:1. kawn simex Ido mai cao jhai khankix krai lox jhai tawx riang rao ka pui Yudax, pa ot daux haktiex Yudax mai veng Yerusaliem, ka daux min ceu kaux Siyiex ceu pui Isarelax heue. 2 Mawh kheu nan ZerubabelaxRef 5:2 Gie 1:12; Zak 4:6-9. kawn simex Shalatilax mai Yawsux kawn simex Yozadak kaoh mai jah tix sum nyiex bwan Siyiex pa koe ka daux veng Yerusaliem, mai cao jhai Siyiex khankix, hoik ot tau mai kix mai teem ka kix heue. 3 Ka daux bawg yam an Tatenie pa mawh cao pa kwang hawt baoh haktiex toi rawm klawng Upharetix plak klip singaix mai Shetabozanie mai paox pie kiex khankix, hoek mai chawk ka kix ah nin, “Mawh pui mawx pa tawx lox ka pex, sonsang sum nyiex bwan in mai sonsang yuh ka guh veng in lie?” 4 Khaix an yix hoik krai kix mhong ceu kaux pui an khankix pa pang tix sum nyiex bwan in heue. 5 Viang mawh nan ngai Siyiex kix kia ngiien piang kuad song pui Yudax khankix, son ang kix kaog tom hoek bawg yam deeh hoek lai grawng an khaing simiang Darix heue. Khaix an kix deeh pawk lai tix pheen ka grawng pa dex dawd mai in heue. 6 Lai in tix pheen mawh lai tiiem Tatenie cao kwang baoh haktiex plak toi rawm klawng plak klip singaix mai Shetabozanie khawm paox pie kix khankix mai pui Pasha khankix pa ot ka baoh haktiex plak toi rawm klawng plak klip singaix ka son simiang Darix. 7 Kix hoik tawx lai in hu ka nawh tix pheen ka daux pa tiiem ah nin, “Kieh pa nhim koe piang simiang Darix heue. 8 Kieh simiang tawng ka hu yix laig daux haktiex Yudax mai hoek ka nyiex bwan Siyiex pa ting lhaong, pa hoik sum ka lon simaox pa kied ting khankix mai khaox khankix hoik sau tix ka ding nyiex mai kaing hoik phai ka daux pa sau kix riang rao tix mai tak sang pon tix hoik ka daux tawm taix kix heue. 9 Khaix an yix chawk ka kuad song khankix, mai ah nin ka kix, “Mawh pui mawx pa tawx lox kieh pex sum nyiex bwan in mai yuh ka guh veng inkix lie?” 10 Yix baox deeh chawk ceu kaux kix sonsang deeh krai yix ka maix mai sonsang pon tiem yix tix tawx ceu kaux pui khankix pa mawh cao kaing ting ka daux sinax kix heue. 11 Kix hoik deeh pawk ka yix ah nin, “Yix mawh cub kawncau mau soi Siyiex raoma mai haktiex mai yix deeh sum nyiex bwan pa hoik dawg sum tix tom num pa hoit kied rheeng dix, pa hoik grum naog sum simiang pa ting lhaong ceu pui Isarelax tix kaux heue. 12 Mawh kheu jao hoik so keeing yix khankix pa song rhawm Siyiex meung raoma, Nawh Cao tom ap kix ka daux taix Nebukhaneza simiang haktiex Babulon mai ceu pui Khakladie khankix, pa hoik yuh nyiex in laux leeing mai rhim pui khankix hu ka veng Babulon.Ref 5:12 2Sim 25:8-12; 2Been 36:17-20; Ye 52:12-15. heue. 13 Viang yuh nan kawx, ka daux num jah Kurux simiang Babulon tix kwang ka haktiex, simiang Kurux hoik tawx lox hoek sonsang deeh sum ka nyiex bwan Siyiex in heue.Ref 5:13 Eza 1:2-11. 14 “Kraung khri kraung mau nyiex bwan Siyiex pa hoik rhim Nebukhaneza khaing daux nyiex bwan ka daux veng Yerusaliem mai can pa viex nawh laig ka daux nyiex bwan veng Babulon, simiang Kurux hoik deeh teei kraung khrai an khankix lih khaing daux nyiex bwan Babulon mai nawh ap tix tawx ankix ka cao kaing ting pa kaux Sheshaboza heue. 15 simiang ah nin ka nawh, “Teei kraung shiao inkix lih hu ka daux nyiex bwan pa koe ka daux veng Yerusaliem mai deeh sum nyiex bwan Siyiex ka gwang prim heue.” 16 Mawh kheu nan Sheshaboza hoek tix sum jaong num nyiex bwan Siyiex, pa koe ka daux veng Yerusaliem; mai jah khaing daux bawg yam an tom hoek ka daux bawg yam ca kawn yuh tix mai ang nyang chix hoik heue. 17 Yam in phan ceu ankix mawh ceu pa mhawm ka son simiang, kieh ciied ti yaox pa koe ka daux krao sinngao nyiex haw simiang Kurux sonsang deeh sum kix nyiex bwan Siyiex in, ka daux veng Yerusaliem mai kieh simiang deeh krai yix mhong ka khaw rhawm ang khaw rhawm ka grawh grawng in heue.