1 Yam hoik mhong pui koeng ceu pui Yudax mai ceu pui Binyamin khankix ka sang sum doeh ru can pui pa giex laung tix khankix ka nyiex bwan Siyiex ceu pui Isarelax, 2 Kix hoik hoek ka Zerubabelax mai doeh cao kaing pui Isarelax khankix mai ah nin ka kix “Kieh yix sum nyiex bwan in tau mai pex liak, grawh grawng nawh yix sawg Siyiex pex awm sawg pex ka, mai yix hoik tan ka Nawh Cao, jah daux singaix thong Esarahadon simiang Asurix yix hoek tin heue.”Ref 4:2 2Sim 17:24-41. 3 Viang mawh nan Zerubabelax mai Yawsux mai doeh cao kaing daux nyiex ma ceu pui Isarelax khankix ah nin ka kix, “Pex ang pon yuh tix ceu kawx tau mai yix sonsang sum nyiex bwan Siyiex yix heue. Viang mawh nan yix sang tang sum ka son Siyiex ceu pui Isarelax nong nong, awm pa hoik tawm simiang Kurux pa mawh simiang Pasha ka yix heue.” 4 Khaix an pui haktiex khankix hoik kieh pui Yudax khankix awn riang rao mai tuktiak kix, 5 mai vai cao pa hawt grawng see khankix, yuh krax keud pa sawn kix laux leeing prung prang, jah singaix baux Kurux simiang haktiex Pasha tom hoek baux ju krax kwang Darix simiang haktiex Pasha heue.

6 Yam jah AhashoeruxRef 4:6 Is 1:1. tix kwang haktiex, kix hoik tiiem tix tawx lai pa tang phimap ka can pui pa ot ka daux haktiex Yudax mai veng Yerusaliem heue. 7 Ka daux singaix Atazerit kawx, Bishalam, Mitaretat, Tabelax mai paox pie kix pa kawn deuk, baox tiiem tix tang ka Atazerit simiang haktiex Pasha mai lai in mawh pa tiiem tix ka ngai lai Aremix mai deeh thut tix ka plak lox Aremix khankix heue. 8 Rehum pa mawh cao kaing ting Shimashie pa mawh cao tiiem lai, hoik tiiem lai tieh feen ka pui veng Yerusaliem mai tawx ka simiang Atazerit awm in heue. 9 Rehum pa mawh cao kaing ting pa kwang teug lai, Shimashie pa mawh cao pa tiiem lai khawm paox pie kiex, pui haktiex Dinie, pui haktiex Aphasatakhit khankix, pui haktiex Tapalax, pui haktiex Pasha khankix pui haktiex Eriet mai pui haktiex Babulon pui haktiex Shushan, pui haktiex Dehavi khankix mai pui haktiex Elam khankix, 10 mai can pui khankix, pa hoik gah simiang Osanapa pa mawh pui ting lhaong mai pa kied laoh lie, kieh ot daux nyiex veng yaong haktiex Samarix khankix mai can pui pa kawn deuk baoh haktiex ka plak toi rawm klawng Upharetix khankix ka plak klip singaix heue. 11 In mawh lai pa hoik sipaox kix ka nawh son simiang Atazerit mai khaing kawncau maix khankix pa ot baoh haktiex plak toi rawm Upharetix khankix heue. 12 Kieh simiang tawng ka pui Yudax pa hoik hoek khaing maix khankix, hoik bleeh ka daux veng Yerusaliem mai kix sum veng pa yie tieh feen pa caox caig an mai yuh guh veng an dex hoik mai deeh cox sum ka jaong num veng heue. 13 Kieh simiang tawng yam in, phan veng in hoik mawh pa sum guh veng tix kaux, kix tak ang lai tawx gha mai keen mai mau gawng mai krao mau cie simiang tak mawh pa nie iak hu sipie ka heue. 14 Yam in mawh kheu ih yix kih kied mau cai pa kaoh khaing daux nyiex simiang, yix ang rhawm yaox ka krax ceet min simiang; mawh kheu nan yix tom ploi pui hu krai grawng inkix ka simiang heue. 15 Sonsang sigaw maix ti yaox ka grawh grawng ceu an ka daux phuk lai keeing maix khankix heue. Maix tak yaox grawng an khankix ka daux phuk lai pa hoik tiiem tix khankix mai tawng ka veng in mawh pa yie tieh feen mai pa tawx krax pa tuktiak ka simiang khankix mai ka kien haktiex an tom dix, mawh kheu jao in tom kieh veng in laux leeing heue. 16 Ex gruh krai grawng in ka simiang phan veng in sum tix mai phan guh veng hoik sang tix khawmuik, khaix an maix tak ang yaox tix kwang ka baoh haktiex plak toi rawm klawng heue. 17 Khaix an simiang deeh tawx lox pawk tix son Rehum cao kaing ting mai son Shimashie cao tiiem lai mai ka son paox pie pa kawn deuk tau mai kix khawmuik, pa ot daux haktiex Samarix mai ka son can pa kawn deuk khankix daux haktiex plak toi rawm klawng, kieh pa nhim koe piang pex heue. 18 Lai pa sipaox pex ka aux hoik toe tix phat sidawng ka plak sivoe aux heue, 19 mai aux hoik tawx lox tix kieh kix sawg ciied ti yaox mai hoik yaox veng in yuh krax tieh feen ka simiang ka daux bawg yam pa hoik luan mai pa tieh feen mai grawng kaing pa ang mhawm khankix, hoik kleuk tix ka daux veng an heue. 20 Simiang pa koe sibrawm khankix pasax ot ka daux veng Yerusaliem mai kix hoik kwang ka kien haktiex an khawmuik pa koe toi rawm klawng plak klip singaix mai hoik tawx gha mai keen mai mau gawng khankix ka kix heue. 21 Yam in, naox ka pa sum pex veng in, sonsang krox jun tom hoek bawg yam tawx aux lox tix hoek heue. 22 Yuh satix tix, paw lai nhim, chix lai sang kieh pa som nai pa laux leeing pa cien hoek piang simiang yuh ka mawx lie? 23 Yam in yam phat kix lai simiang Atazerit ka sivoe Rehum mai Shimashie cao tiiem lai khawm paox kiex khankix, kix niied tix hu ka veng Yerusaliem tiebtie khin ka pui Yudax khankix, kieh naox ka kaing yuh kix heue. 24 Mawh kheu nan kaing jhaw nyiex bwan Siyiex daux veng Yerusaliem hoik kaog tom hoek bawg yam kwang simiang haktiex Pasha ra num tix num heue.