1 Gumlox Siyiex hoek ka aux, 2 “Kawn pui eue, veeh pakngai tix ka plak simiang Gawgax, pa mawh pui haktiex Magawgax, pa kwang ka piang haktiex Rawsha, haktiex Meshiet, haktiex Tubalax mai krai lox jhai pa sang puing ka nawh,Ref 38:2 Jhi 20:8 3 ah nin, Siyiex ah nin, jhak heue, Simiang Gawgax cao pa kwang ka piang haktiex Rawsha haktiex Meshiet mai haktiex Tubalax khankix eue, Aux tak yuh maix laux heue. 4 Aux tak feuk kap maix ka miiet mai bluh maix hoek, tau mai cub kru naing maix, khawm brung maix mai pui naing brung maix, pa ceep ka kraung naing pa koe min sibrawm, pa giex plah rhiem tiep tie naing mai pa giex vaig. 5 Pui Pasha pui Ethiopia mai pui Libia khankix pa ot tau mai kix pa giex plah rhiem tiebtie naing mai pa ceep mhok rhiem, 6 haktiex Gawma mai cub lien nawh khankix, nyiex ma cub ceu pui Biettawgamax khaing haktiex plak laong mai khawm lien nawh khankix, pa mawh pui hun ot tau mai maix heue. 7 “Maix mai can pui pa khrawm tix mai maix, rien rhawm ti yuh satix mai pau ti jhak kix heue. 8 Khaix hoik luan bawg yam tom rheung maix tak yaox ti kraix khrawm sonsang yuh naing ka daux haktiex an, pa hoik deeh hoek khaing haktiex kudah pa glawd khaing krax kha rhawm ka lawm vaig khaing pui kuceu tom nie pa ot ka piang gawng haktiex Isarelax, pa hoik dawg mawh haktiex dee pa yiien, kix mawh pa kaoh khaing daux haktiex kudah, yam in kix hoik yaox ti ot yiien yawg heue.” 9 “Maix tak sang hoek awm lih bhaung ting mai kheem ka haktiex awm ceep paiawm, khawm maix mai kru naing maix mai khawm pui pa ot tau mai maix tom nie heue.” 10 Siyiex ah nin daux singaix an, rhawm keud pa caox caig tak lih ka daux rhawm rhi maix, 11 maix tak ah nin, Aux tak hu puing ka haktiex nyiex yaong pa ang koe guh veng, Aux tak yuh laux ka pui pa koe krax yiien yawg mai pa ang koe krax khi glawh khawmuik, dee pa ang guh veng koe mai dee pa ang jhong siviex koe mai siviex veng khankix, 12 sonsang tud rhim mai con ka kraung khrai mai to brie kix mai nyeu taix ti yuh laux leeing ka dee pa hoik sax yiien pui ka, pa mawh dee ot pui yam in mai dee khrawm ceu pui kuceu ti ot kah, pa chix pon tobrie mai kraung khrai khankix, pa ot ka sigreung haktiex heue. 13 “Pui Shebax mai pui Dedan mai cao lai geu veng Tasux mai pui awn ju daux nyiex yaong, tak ah nin ka maix, mawh sang hoek maix ti sang tud rhim ka kraung khrai kix lie? Mawh khrawm cub kru naing ti hoek sonsang rhim kraung khrai sinngao mai mau khri, to brie mai kraung pa mhawm khankix sonsang yuh krax laux leeing pa kied ting lhaong lie?” 14 “Mawh kheu nan, kawn pui eue, krai lox jhai mai ah nin ka Gawgax, Siyiex ah nin, daux singaix yam yaox pui Aux Isarelax tix ot yiien yawg, ang maix tawng ka lie? 15 Maix tak hoek khaing dee pa kied singai ka plak laong maix mai ceu pui kuceu tom nie mai kru naing pa ting riang pa brug brung khankix, 16 maix tak hoek puing ka pui Aux Isarelax awm ceep paiawm ka haktiex. Gawgax eue, yam hoek bawg yam Aux tak sang viex maix hoek puing ka haktiex Aux, sonsang tawng ceu pui kuceu ka Aux, yam jhi Aux grawng singax singeh tix ka daux maix ka plak sivoe ngai kix heue. 17 “Siyiex ah nin maix mawh pui an pa hoik kieh Aux kawncau tix cao jhai ceu pui Isarelax hoik gruh krai ka daux bawg yam pa hoik luan sonsang viex Aux maix hoek puing ka kix ang mawh lie?”

18 Siyiex ah nin yam hoek Simiang Gawgax ti puing ka haktiex Isarelax, krax pa kied song rhawm Aux tak lih hoek heue. 19 Mawh kheu pa kied song rhawm Aux hoik rup awm ngu mai ceu pa kied ting lhat graung ka daux ngaix an tak hoek yung yiang ka daux haktiex Isarelax, 20 Kax ka daux rawm sigrit sigra mai sim sai daux raoma, totiag daux tiagtu mai ceu pa chix chuh chix mu ti hu ka piang tiex khankix mai can pui pa ot ka piang ca haktiex khawmuik, tak siyaung ka plak sivoe ngai Aux, gawng khankix tak sang grhup mai dee pa kied rieh rhauk tak grhup mai guh veng ku mu tak sang bhieh ka piang tiex heue. 21 Siyiex ah nin, Aux tak viex vaig tix hoek khaing gawng Aux ku gawng mai puing ka Gawgax mai vaig pui ku kaux, tak sang mug ka puxaik nawh heue. 22 Aux tak viex krax ciyang saux preng mai krax jauh nham hoek ka nawh, Aux tak sang kieh lhiex lih ka piang nawh mai lien nawh mai pui pa ot tau mai nawh khankix mai pa kheem rawm mai pre pa kied ting, khawm ngu mhat lih ka piang kix heue. 23 Mawh kheu nan, Aux tak jhi min pa ting lhaong tix mai pa singax singeh tix, sidawng ka plak sivoe ngai ceu pui khankix. Khaix an kix tak tawng mawh Aux Siyiex heue.