1 Plawng taix Siyiex ot ka piang aux mai khwan Siyiex viex aux hu mai deuh aux ot ka daux si ngreung daux lung ka dee naog si-ang khankix. 2 Nawh Cao kieh aux lailing sinax vung viang kix mai jhak heue, ka daux lung an koe si-ang tom nie mai si-ang an khankix hoik mawh pa kied kroh heue. 3 Nawh Cao ah nin ka aux, “Kawn pui eue, mawh sang chix im si-ang in lie?” Mai aux deeh pawk ah nin, “Siyiex eue, Maix Cao hoik tawng heue.” 4 Nawh Cao baox ah nin ka aux, “Krai lox ka si-ang inkix mai ah nin ka kix, si-ang kroh khankix eue, nghiet ka gumlox Siyiex. 5 Siyiex ah nin ka si-ang in khankix, jhak heue, Aux tak sau bhawm im ju laig ka daux pex mai pex tak im ju heue.” 6 “Aux tak sang sau siniag ka piang pex mai viex nex haok ka piang pex mai kieh hak kheem ka piang pex mai sau bhawm im ju ka daux pex mai pex tak im ju mai pex tak tawng mawh Aux Siyiex heue.” 7 “Mawh kheu nan, Aux hoik krai lox jhai awm pa hoik tawm tix mai yam krai aux lox jhai, lox sinum lih koe tan mai jhak heue, si-ang khankix chix chuh mai kleuk paox tix, tix mu hoik tix mu heue.” 8 Yam jhak aux ka ankix, siniag koe ka piang kix mai nex haok ka piang kix mai hak kheem ka kix, viang mawh nan, ju pa im ang nyang koe ka daux kix heue. 9 Khaix an Nawh Cao ah nin ka aux, “Krai lox jhai ka bhaung, kawn pui eue, krai lox jhai mai ah nin ka bhaung Siyiex ah nin, bhaung pa kaoh khawm pon plak eue, hoek phlu ka si-ang inkix sonsang im ju pa yum inkix.” 10 Aux hoik krai lox awm pa hoik tawm Nawh Cao ka aux mai bhawm im ju laig ka daux kix mai kix kawx im ju mai kaoh cung awm kru naing cub pa ting lhaong heue.Ref 37:10 Jhi 11:11 11 Nawh Cao ah nin ka aux, “Kawn pui eue, si-ang inkix mawh cub nyiex ma pui Isarelax khankix, jhak heue, kix ah nin, si-ang yix hoik mawh pa kroh mai krax keud pot jun pot yix hoik grai, mai tokaux yix hoik laux leeing heue.” 12 “Mawh kheu nan, krai lox jhai ah nin ka kix, Siyiex ah nin, jhak heue, Aux tak paoh simeeig pex mai yaog pex lih khaing simeeig tix, pui Aux khawmuik eue, Aux tak viex pex hoek ka nyiex pex daux haktiex Isarelax. 13 Pex tak tawng ka mawh Aux Siyiex, yam paoh Aux daux simeeig pex mai yaog pex lih khaing daux simeeig pex heue.” 14 “Aux tak sang sau khwan tix ka daux pex mai pex tak im ju mai Aux tak kieh pex ot ka daux haktiex cao pex, khaix an, pex tak tawng mawh Aux Siyiex, pa hoik krai mai pa hoik yuh ka an, Siyiex ah nin heue.”

15 Gumlox Siyiex hoek ka aux ah nin, 16 “Kawn pui eue, teei khaox tix gawng mai tiiem lai piang an, grawng ceu pui Yudax mai son kawn praix ceu pui Isarelax mai son paox grawm paox gru nawh, khaix an baox teei khaox tix gawng mai tiiem lai piang an, son Yosiep, pa mawh khaox cie ceu pui Epharem mai son nyiex ma ceu pui Isarelax mai son paox grawm paox gru nawh, 17 “Kleuk khaox an tau kieh mawh tix gawng khaing mai giex khaox pa mawh tix gawng an ka daux taix maix heue.” 18 “Yam krai ceu pui maix ka maix ah nin, mawh ang maix pon krai ex tawng dee bleeh ceu in khankix lie?” 19 Ah nin ka kix, Siyiex ah nin, “Aux tak teei gawng khaox cie Yosiep, pa koe ka daux taix Epharem mai ceu pui Isarelax mai khawm paox grawm paox gru nawh mai Aux tak kleuk tau mai khaox ceu pui Yudax mai kix mawh tix gawng khaing mai an tak mawh khaox tix gawng khaing ka daux tai Aux heue.” 20 “Giex gawng khaox pa hoik tiiem maix lai ka plak sivoe ngai kix, 21 “Khaix an ah nin ka kix, Siyiex ah nin, Aux tak teei ceu pui Isarelax khaing sinax ceu pui ka dee hoik hu kix mai tak khrawm kix hoek khaing ku praok ku dawn mai viex kix laig ka daux haktiex cao kix, 22 Aux tak kieh kix mawh pui tix ceu khaing ka daux haktiex, ka piang gawng pui Isarelax mai simiang tix kaux khaing pa kwang ka piang kix khawmuik, kix tak ang lai mawh ceu pui ra ceu mai meung haktiex ra meung tix bawg kawx heue. 23 Kix tak ang lai seeing yuh tokaux tix, ka riang grang krub mai ka ceu pa seeing brai, tau mai ka ceu pa lud tix bawg kawx, Aux tak deeh taoh kix lih khaing ka can dee hoik lud yuh kix phimap mai tak kieh kix singax, mai kix tak mawh pui Aux mai Aux tak sang mawh Siyiex kix heue. 24 “Kawncau Aux Davit tak mawh simiang ka piang kix mai kix tak koe cao liang yung tix kaux khaing, kix tak sang hawt lox tat jhawm prawng Aux mai priex rien ka lox lai beenli Aux heue.”Ref 37:24 Yez 34:24 25 Kix tak yaox ti ot ka daux haktiex tawx Aux ka kawncau Aux Yakop, pa mawh dee pa hoik ot keeing kix mai kix tak sang yaox ti ot tau mai kawn praix kix mai khawm kawn saux kawn sex kix leeing ju mai kawncau Aux Davit tak mawh simiang kix leeing ju heue. 26 Aux tak yuh sijax mukheu pa nhim tau mai kix, mai sijax mukheu an tak koe mai kix leeing ju, Aux tak nawb bwan ka kix mai kieh kix pre haoh hun mai Aux tak deuh dee pa singax singeh Aux ka daux sinax kix leeing ju heue. 27 Nyiex bwan Aux tak koe tau mai kix mai Aux tak mawh Siyiex kix mai kix tak mawh pui Aux heue.Ref 37:27 2Kaw 6:16; Jhi 21:3 28 Ceu pui kuceu tak tawng ka mawh Aux Siyiex pa kieh pui Isarelax singax singeh, yam koe dee pa singax singeh Aux ka daux sinax kix leeing ju heue.