6
1 Simiang Darix khaw rhawm ti sang deuh cao pa kwang veng khankix tix yieh tixnga kaux, sonsang mawh kix cao pa kwang ka daux meung haktiex nawh khawmuik khawm leeing,
2 mai piang kix, nawh hoik deuh cao kwang ting loe kaux mai ka daux kix hoik mawh Danyelax tix kaux heue. Cao kwang veng khankix tak tawx grawh grawng haktiex kuceu ka kix, son ang simiang lai yaox tix som nai heue.
3 Khaix an Danyelax in, hoik sidawng blon ting lhaong khaing piang cao kwang meung an kix mai cao kwang veng khankix, kheu jao hoik koe khwan pa kied mhawm ka daux nawh mai simiang hoik keud ti sang deuh nawh mawh pa kwang piang meung haktiex nawh khankix khawmuik heue.
4 Mawh kheu nan, cao kwang meung mai cao kwang veng khankix sawg ti yaox dee deuh phimap piang Danyelax, son grawng pa kwang ka meung haktiex heue. Viang mawh nan, kix ang yaox krax pa lud nawh, kheu jao grawng hoik kaux sijax nawh mai ang yaox krax pa lud nawh tix ceu kawx heue.
5 Khaix an pui inkix ah nin, “Ex ang lai yaox grawng pa sang deuh phimap piang Danyelax in, phan ang mawh son grawng gumlox been pa dex dawd mai Siyiex nawh heue.”
6 Mawh kheu nan, cao kwang meung khankix mai cao kwang veng khankix, khrawm paox tix hoek ka plak sivoe Simiang ah nin ka nawh, “Simiang Darix eue, kieh maix lang ju heue.”
7 “Cao kaing ting pa kwang meung khankix mai simiang cao fa khankix mai cao pa kwang haktiex khankix, cao pa tawx krax keud mai cao pa kwang veng khankix, hoik kum paox tix tau, sonsang kieh simiang yuh ti deuh gumlox pa kaux cong koe tix ceu, ka can pui pa rawg bwan ka Siyiex ang ah, pui ang ah, ka daux tixngoe singaix, lheu khaing maix simiang tak sang teei tix sau nawh ka daux kawg sivai sangsi heue.
8 Yam in Simiang eue, tawx gumlox mai tawk cum piang lai pa tiiem an, son ang lai pon ti deeh tieh awm koe been ceu pui Medix mai ceu pui Pasha pa ang chix tieh loh tix heue.”
9 Mawh kheu nan, simiang Darix tawk cum tix piang gumlox pa hoik tiiem tix heue.
10 Yam in viang Danyelax tawng ka hoik tawk cum piang lai an, nawh hu ka nyiex tix. Laig ka daux lawg plak piang daux nyiex nawh mai paoh siviex iak tix ka plak see veng Yerusaliem, nawh grux ngawng tix rawg bwan mai tawx krax pa yaogyaw ka plak sivoe Siyiex nawh, tix ngaix loe bawg awm hoik koe been pa deuh nawh singaix phao voe khankix heue.
11 Khaix an pui inkix khrawx khrawm paox tix hoek mai yaox ka rawg Danyelax bwan mai krax pa yuh nawh krax khyox khaw ka plak sivoe Siyiex heue.
12 Kix deeh hu ka plak sivoe simiang mai krai son grawng gumlox pa hoik tawx simiang ah nin, “Ang mawh maix pa hoik tawk ti deuh cum ka gumlox in, son pui ku kaux, pa rawg bwan ka Siyiex ang ah mai ka pui ang ah, ka daux bawg yam tixngoe singaix, lheu khaing maix pa mawh simiang tak sang mawh pa teei ti sau ka daux kawg sivai sangsi lie? Simiang deeh pawk lox ah nin, “Ceu an mawh tete, awm krax koe gumlox been ceu pui Medix mai ceu pui Pasha, pa ang chix tieh loh tix heue.”
13 Mawh kheu nan, kix deeh pawk lox ka plak sivoe nawh ah nin, simiang eue, Danyelax pa mawh pui tix kaux khaing daux pui pa giex laung khaing daux meung Yudax, ang tie tawx krax nab yam tix ka son maix, pa mawh simiang mai son gumlox pa hoik tawk maix cum mai ca yuh krax pa rawg bwan tix ngaix loe bawg heue.”
14 Yam mhong simiang gumlox inkix, nawh kied koe krax pa khi rhawm mai hoik tat rhawm tix, sonsang deeh taoh ka Danyelax mai hoik kied sau riang tix tom hoek bawg yam klip singaix sonsang deeh pon taoh tix ka nawh heue.
15 Khaix an pui inkix, hoik greed ti dex hawt simiang mai ah nin ka nawh, “Simiang eue, tawng ka mawh an, been gumlox ceu pui Medix mai ceu pui Pasha, ka ang gumlox mai been tat been prawng pa hoik yuh simiang ti deuh, mawh pa ang lai pon tix tieh loh heue.”
16 Mawh kheu nan, simiang tawx gumlox tix mai kix viex Danyelax hoek mai sau nawh ka daux kawg sivai sangsi heue. Simiang ah nin ka Danyelax, “Kieh Siyiex maix pa yuh maix ti tawx kaing jhaw sijheeng, Nawh Cao tak deeh taoh ka maix heue.”
17 Khaix an kix viex khlawp simaox hoek tix khlawp mai deuh piang moing kawg sivai sangsi an mai simiang hoik tawk ti deuh cum cao nawh mai ka cum simiang greem nawh khankix, son ang grawng Danyelax lai mawh pa pon deeh tieh loh tix heue.
18 Yam in, simiang deeh ing ka nyiex haw nawh mai twah pa ih leeing sawm mai lox tah ting kawx hoik mawh pa ang lai viex ti hoek ka plak sivoe nawh, ang lai laig it laig tum heue.
19 Ngaix khaix simiang yaog ti kaoh khaing dee it tix caocao yam jah praix tix riang mai nied ti hu ka daux kawg sivai sangsi heue.
20 Yam hoik hoek nawh ka praok kawg an, nawh yiiem mai kok yo ka Danyelax ah nin ka Danyelax, “Danyelax pa mawh siliex Siyiex pa im ju eue, mawh hoik pon taoh Siyiex maix, pa yuh maix ti tawx kaing jhaw sijheeng ka maix luan khaing sivai sangsi lie?”
21 Khaix an Danyelax deeh ah nin ka simiang, kieh simiang lang ju heue.”
22 “Siyiex aux hoik ploi kawncau Nawh hoek mai thox daux jheeh sivai sangsi son ang pon mat yuh aux, kheu hoik yaox Siyiex ang aux koe phimap ka plak sivoe Nawh Cao heue. Simiang eue, lheu khaing an, aux ang tie mawh pui pa yuh krax pa lud loe ka plak sivoe ngai maix heue.
23 Yam an simiang kied koe krax gaux rhawm ka son nawh mai tawx gumlox tix, sonsang deeh teei kix Danyelax lih khaing daux kawg sivai sangsi mai krax pa mat tix ceu kawx ang yaox piang nawh, mawh kheu yum rhawm nawh ka Siyiex Cao tix heue.
24 Simiang tawx lox tix mai viex pui pa hoik kao Danyelax hoek mai tik kix khawm moeng khawm kawn praix kix ka daux kawg sivai sangsi khawmuik heue. Sivoe ang kix nyang bax pon ti hoek ka daux tiex mai sivai sangsi khankix hoik pex kix mai kraing si-ang kix pot phawng vid heue.
25 Yam an simiang Darix hoik tiiem tix tawx lai ka pui khawmuik, ceu pui khankix mai ceu pa sikah lox kuceu, pa ot piang haktiex khawmuik ah nin, “Kieh krax pa nhim pa haok hwan grum naog ka pex heue.
26 Yam in aux yuh ti tawx gumlox ka pui meung haktiex dee kwang dee pang aux khankix kudah dee, sonsang koe krax lhat graung pui ka plak sivoe Siyiex Danyelax, mawh kheu Nawh Cao mawh Siyiex pa im ju mai pa kaux cong leeing ju. Meung haktiex Nawh, ang chix laux leeing, mai krax pa kwang Nawh ang koe dee sidah sidu heue.
27 Nawh Cao tawx krax teem mai tawx krax taoh ka kawn pui, mai Nawh Cao yuh mhai rug pa daox deng koe, piang raoma mai piang haktiex mai deeh taoh Danyelax khaing jheeh sivai sangsi heue.
28 Mawh kheu nan, Danyelax in, hoik haok hwan ka daux baux kwang simiang Darix mai ka daux baux kwang simiang Kurux, pa mawh ceu pui Pasha heue.”