1 Belashieza pa mawh simiang yuh pawie pa khan kheu pa ting lhaong son cub simiang greem nawh khankix tix rheng kaux mai yaux rawm, plai plix siiet ka plak sivoe ngai pui an kix tix rheng heue. 2 Yam kawn cim nawh ti yaox rawm plix siiet, simiang Belashieza tawx gumlox tix nhie pui teei ti viex kawk nyaux khri mai mau khankix, pa hoik rhim keeing nawh simiang Nebukhaneza ti viex hoek khaing daux nyiex bwan veng Yerusaliem, sonsang nyaux simiang mai simiang greem nawh khankix mai moeng nawh mai khawm moeng iak nawh khankix rawm plix siiet khaing daux kawk ankix heue. 3 Khaix an kix hoik teei ti viex kawk nyaux khri an khankix pa mawh kawk nyaux pa hoik khaing daux krao nyiex bwan Siyiex, pa koe ka daux veng Yerusaliem mai simiang mai khawm simiang greem nawh khankix, khawm moeng nawh mai moeng iak nawh khankix hoik nyaux rawm plix siiet khaing daux kawk nyaux ankix heue. 4 Kix hoik nyaux ka rawm plix siiet mai hoik yaogyaw ka siyiex khri, siyiex mau, siyiex tawng, siyiex rhiem mai siyiex khaox, siyiex lon simaox khankix heue. 5 Ka daux bawg yam an tix taix neh, giien taix pui hoik bleeh tix hoek mai tiiem lai piang ding tiex phawng pid daux nyiex haw pa koe see rong jung kawk ngu mai simiang hoik yaox giien taix pa tiiem lai an heue. 6 Pakngai simiang hoik tieh loh tix mai rhawm nawh hoik siyaoh mai jhong si-ang nyoi nawh khankix hoik dex bheeik mai nge ngawng nawh khawm ra khawn hoik deeh ra lai klah paox tix heue. 7 Simiang hoik riag yo lox tix pa ting mai tawx lox kieh kix hu kok cao pa chix tawng singaix pa sang hoek khankix, pui Khaladie khankix mai cao pa sibawk khankix hoek heue. Simiang krai ka pui ting pingnya cuyi haktiex veng Babulon khankix ah nin, “Pui pa pon phat ngai lai in mai pon krai aux tawng dee bleeh, tak mawh pa sang ceep kraung pa raoh rawt mai tak yaox ti tauk maox soi khri ka ping ngawg nawh mai nawh tak mawh cao pa kwang haktiex loe kaux tix kaux ka daux meung haktiex in heue.” 8 Pui ting pingnya cuyi simiang khankix khawmuik hoik bleeh tix hoek heue. Viang mawh kawx nan, kix ang pon phat ngai lai an mai ang pon krai dee bleeh ka simiang heue. 9 Khaix an simiang Belashaza pa kied koe krax yaoh yeu mai pakngai nawh hoik tieh loh tix mai cub simiang greem nawh khankix hoik daox deng ka heue. 10 Yam an, kheu mhong miex simiang lox sikah simiang mai cub simiang greem nawh khankix, tom hoek ka daux bang pawie khan kheu an ah nin, “Simiang eue, kieh maix lang ju heue, paw kieh rhawm maix yaoh yeu mai paw kieh pakngai maix tieh loh tix liak, 11 koe pui tix kaux ka daux meung haktiex maix mai ka daux pui an koe khwan singax Siyiex ka heue. Kadaux baux ju keeing maix nawh hoik mawh pa kied lhak lhiem mai koe krax tawng yung mai koe pingnya cuyi awm koe pingnya cuyi Siyiex heue. Simiang Nebukhaneza pa mawh keeing maix hoik kieh nawh mawh cao kaing ting ka ping pui ting pingnya cuyi khankix, cao pa chix tawng singaix pa sang hoek khankix, pui Khaladie khankix mai khawm ka piang cao pa sibawk khankix heue. 12 Mawh kheu koe khwan pa kied mhawm ka daux nawh mai krax tawng yung mai krax lhak haing mai krax pa chix tawng ka dee bleeh grawng pa camaox khankix, krax pa pon krai lox nieb mai pa krai ceu pa daox deng khankix, hoik yaox ka daux Danyelax in, ka pui pa hoik tawx simiang ceu kaux nawh mawh Belateshaza mai yam in kieh pui kok Danyelax hoek mai nawh tak krai dee bleeh lox an heue.”

13 Khaix an Danyelax hoik viex ti hoek ka plak sivoe simiang heue. simiang chawk ka Danyelax ah nin, “Mawh maix Danyelax khaing daux pui Yudax pa giex laung an khankix lie? Ka pa mawh can pui pa hoik viex keeing aux nawh hoek khaing haktiex Yudax lie? 14 Aux hoik mhong grawng maix mai koe khwan singax Siyiex ka daux maix mai krax pa riang mai krax tawng yung an kix mai khawm pingnya cuyi pa kied mhawm khankix, hoik mawh pa yaox ti ka daux maix heue. 15 Yam in, pui ting pingnya cuyi an khankix cao pa chix tawng singax pa sang hoek khankix hoik dawg viex tix hoek ka plak sivoe aux sonsang phat tix ngai lai in mai krai dee bleeh ka aux heue. Viang mawh kawx nan, kix ang pon krai dee bleeh heue. 16 “Aux hoik mhong grawng maix mai ka pon krai maix dee bleeh lox ankix mai ka pon krai grawng krax pa daox deng khankix heue. Yam in, phan maix chix phat ngai lai an mai pon krai dee bleeh khankix maix tak mawh pa ceep ka kraung raoh rawt mai pa tauk ka maox soi khri piang ngawg maix mai tak sang mawh cao pa kwang haktiex loe kaux tix kaux ka daux meung haktiex aux heue.” 17 Khaix an Danyelax deeh pawk lox mai ah nin ka plak sivoe simiang, “Kieh totaix pa ah maix khankix mawh son tokaux maix mai tawx totaix ankix ka pui tang kaux, viang mawh nan, aux tak sang phat ngai lai an ka son simiang mai kieh maix tawng ka dee bleeh lox an heue. 18 Simiang eue, Siyiex pa kied ting lhaong hoik tawx keeing maix Nebukhaneza koe meung haktiex mai sibrawm krax kwang mai sibrawm mai min plakngai heue.” 19 Mawh kheu grawng sibrawm pa hoik tawx Siyiex ka nawh pui khankix, ceu pui ku meung mai can pui pa sikah lox kuceu khankix hoik siyang mai koe krax lhat graung ka plak sivoe nawh heue. Can pui pa simie nawh tix pah khankix, nawh pah yum heue. Can pui pa simie nawh tix im khankix, nawh kieh im ju heue. Can pui pa simie nawh tix yaog lhaong khankix, nawh yaog lhaong heue. can pui pa simie nawh ti kieh tiem khankix, nawh kieh tiem heue. 20 Viang mawh nan, yam hoik yaog nawh rhawm tix ting lhaong mai rhawm nawh hoik kiien ka daux krax pa lhaong rhawm lhaong rhi tix, nawh hoik mawh pa grheu ti lih khaing dang ngeung simiang pa mawh nawh mai teei min plakngai nawh luan ti hu khaing nawh heue.” 21 “Nawh hoik mawh pa grheu tix lih khaing ka daux kawn pui khankix mai rhawm nawh hoik tieh loh tix awm rhawm totiag khankix mai ot tau mai la tiag khankix heue. Nawh sawm rib riem awm mawie khankix mai tokaux nawh hoik caux ka rawm ciex pa kaoh khaing daux raoma, tom hoek daux bawg yam hoik tawng nawh ka kwang Siyiex pa kied ting lhaong ka daux meung haktiex kawn pui khankix mai yaog ti deuh can pui pa koe rhawm Nawh Cao ti deuh kwang piang meung haktiex heue.” 22 “Belashaza eue maix mawh kawn simex nawh mai ang cu ti viex rhawm awn rhawm tiem heue. Viang maix hoik tawng ka grawng inkix khawmuik kawx, 23 maix hoik yaog min tokaux tix lhaong khaing piang Siyiex daux raoma, kieh pui viex kawk nyaux daux nyiex bwan Nawh Cao khankix hoek ka plak sivoe maix mai cao maix khawm cub simiang greem maix khankix, moeng maix khawm moeng iak maix khankix, hoik nyaux rawm plix siiet khaing daux kawk nyaux ankix heue. Cao maix kawx hoik yaogyaw ka siyiex khri mai siyiex mau, siyiex tawng lheung mai siyiex rhiem, siyiex khaox mai siyiex lon simaox khankix, pa chix yaox chix mhong mai pa ang chix koe krax tawng heue. Siyiex pa jhawp ti deuh ka bhawm toek maix khankix ka daux tawm taix Nawh Cao mai kwang ka grawng pa yuh maix khankix maix ang tie tawx krax pa yaogyaw min plakngai ka heue. 24 Mawh kheu nan, Nawh Cao hoik ploi ngien taix tix lih hoek mai tiiem ka ngai lai in heue.” 25 “Ngai lai pa hoik tiiem tix mawh nin, “MENE, MENE, TEKALA, UPHARASIN.” 26 “Dee bleeh lox ngai lai an khankix mawh nin, MENE, koe dee bleeh yuh nin, Siyiex hoik simin ti yaox meung haktiex maix mai hoik sidah phao heue. 27 “TEKALA, koe dee bleeh yuh nin maix hoik ciang tix ka daux jiang yoi mai yaox ka krax pa cud cha maix heue. 28 “PERIET, pa mawh ngai lai UPHARASIN an, koe dee bleeh yuh nin, meung haktiex maix hoik gwieh tix mai hoik tawx ka pui Medix mai ka pui Pasha khankix heue. 29 Khaix an simiang Belashaza, tawx gumlox tix mai kieh kix ceep Danyelax ih kraung raoh rawt mai sau nawh tauk maox soi khri piang ngawg nawh mai tawx lox kieh pao ti krai grawng mawh nawh cao pa kwang haktiex loe kaux tix kaux ka daux meung haktiex heue.Ref 5:29 Jah 41:42

30 Ka daux sawm an tix dom neh Belashaza pa mawh simiang pui Khaladie khankix, hoik mawh pa pah tix yum heue. 31 Darix pa mawh ceu pui Medix hoik pon teei meung haktiex Khaladie yam hoik koe ju nawh tigliah ra num heue.